LAWIN 26 - PIPÏLIA

¹ Kïlö ECHOTYON, “Moghchï kegh körkeyïntin anta körkeyïn nyo kipötöy anta pchörin anta nyo pö kagh ompö korengwo lö tökekïtïngchinö. Ochan ECHOTYON Tororötïnkwa.

² Orip Sapatotinechan* akonyït Konyan otini opetöy osoghöy. Ochan ECHOTYON.

³ “Ato arïpakwa kirurutköchan akamanakwa ngalechan,

⁴ okonokwa nyu rop ompö oroyechi tökïrïr pagh akuyin ketï akwekwa.

⁵ Rïröy nyu paghekwa nyo olisyïyekwa ntökurel atö kïpïtöy sapipun, opïtisïyekwa ntökurel ato kïkötkötisïyi, omisïyekwa apïghyö amöngisyö ompö korengwa akalyan.

⁶ “Okonokwa pöghisyö ompö korenkwa atompurö ngwïny aperesan, amökïminye chi nyo otyeghonokwa, anoteghonan tïpö wudïn kïngeta kor amökïminye ngot korenkwa.

⁷ Onyorukwa owesyö nyo orïntegho punkökwo awany ompö ngot.

⁸ Omukekwa pich cho le mut ntayon pich 100, kïyon pich cho le 100 pich 10,000 akuwonyö nyu pungkökwa ompö ngot.

⁹ Osoyönokwa otösisyenö, aripan mumenyan nyay kyaman nko akwa.

¹⁰ Omekwa paghekwa ntökuryam, ntostekwa chinö pö köny atökïrumï pöroyïn nyo pö cho relach.

¹¹ Omöngan nyu nko akwa, amökïwöchokwanye mïkulöwunyan.

¹² Owesteghonan kwenunkwa alïkwan Tororötïnkwa alïkukwa piköchan.

¹³ Ochan ECHOTYON Tororötïnkwa nyo kyamïtwakwa apkanena koro Misri lö tömö alïkuna sekey arïntan owesyö nyo kipöytonekwa aghekwa otyokisyenö.”

Sito tighintön

¹⁴ Kïlö ECHOTYON, “Ato moterwanïkwanye arïp kirurutköchan

¹⁵ anta ato ataghakwa ngalechan apenyakwa mumenyan,

¹⁶ onkïtön nyu wölo odenokwa. Owironekwa mïghö nyo pö sömewut cho ghach aköryökwa ayuyö ntömeghö. Ongorekwa paghekwo wölo melö omekwa, pöyitu pungkökwa.

¹⁷ Onörekyinokwa akïparakwa pungkökwa, chane chona reyokwa kïpöytonekwa. Okörköritukwa nyo oryöghekwa kwïle kïrkegh melö kayonokwa chi.

¹⁸ “Kïnyïl ato moterwanïkwanye ompö choni, otösan sitenkwa kïnyïl mut nko odeny akwompö ngokikwa.

¹⁹ Onyornyoran owesyonï owulokwa kegh akupot rop akïyam korenkwa le ghat.

²⁰ Akïwir wuw ighisyewutkökwa ompöwölo melö tökïrïröy pagh ompö korenkwa anta akwa ket.

²¹ “Wölo ato amastekwa amoterwanïn otösan ngat sitenkwa kïnyïl mut nko odeny.

²² Opïsunan tïpö wudïn cho köromöch kwam monekwa nko twakwa akwighakwa ongörïngitunö ompö kor amökïmicha pich cho pestegho ortïnekwa.

²³ “Kïnyïl ato malïmakwanye choni löwïr awöghökisyö otöngwï wölo omitan,

²⁴ omungokwa ante kïnyïl mut nko odeny kïtïl chay pö tagh.

²⁵ Opwokwa nyu ngot kïlïku sitenkwa ompö mumenyan nyï kapenyakwa. Ato oryöghchikwa kanastinekwa agheta kegh ayonunan sömew nyo yonchinokwa wölo mi pungkökwa.

²⁶ Atolapay omïnïngitan omisyewutkökwa ntökwigha korï tamanï makatin tör akonga atolapay kechagha kipimöwon, omekwa wölo melö opïghyongekwa.

²⁷ “Kïnyïl ato malïmtekwanye choni löwïr ato openyekwa ngalechan amoterwanïn,

²⁸ onörekyinokwa nyoman amungokwa kïnyïl mut nko odeny kïtïl chay pö tagh.

²⁹ Omokwa kömöy ntamakwa monekwo.

³⁰ Onyornyoran ato osoghokwa körkeyïntin atörotörön ato opelokwa tïkwïn cho ngutoy cho onyïn, awirchan mïntïruchkökwa wölo köchïnchï körkeyïntinekwa akïwöchokwa mïkulöwunyan.

³¹ Onyoran kanastinekwa arultan korikwa pö saghat. Amelö tökïnguchinanïn nyo karam tïkukwa chay onyïn.

³² Oghan korenkwa kïlïku kïratyan, kïmïghyö pungkökwa cho kiwuchï koronï.

³³ Atolapay otoytoyokwa oghömunö ngwïny atöninan ngot kïrïpekwa, akïlïku korenkwa kïratyan anyaran kanastinekwa.

³⁴ Kingörökyï nyu korö könyi Sapato otini kilïkwï kïratyan, ato kyomitekwa koro punkökwo,

³⁵ ompöwölo melö kimuny korenkwa otini kyomöngekwa.

³⁶ “Oghan chane cho köngötu kïnyökoritu ompö koreto pungkökwa. Ryöghöy chane ato chögh sökon le chi nyo rïpo poryot. Akupïtyot kïrkegh melö kayon chi.

³⁷ Kwötöy kegh chane kïrkegh melö mi chi nyo kayon. Amelö onyorunekwa owesyö nyo omukekwa ntoporyeghö punkökwo.

³⁸ Owonyechinekwa punton koreto punkökwo.

³⁹ Kuyuyö cho köngötï ompö koroswo pungkökwa ompö ngokikwa nko ngokiko papotïnekwa.

⁴⁰ “Wölo ato nganyta ngokikwa nko ngokiko papotïnekwa nko ghöyïn nyo kighwanïn, otini kipeny kirurutköchan

⁴¹ akwighanïn onörekyan chane ayonchan koro pungkökwa. Kïkany atotenö kikipkegh ngwïny ompö penyatengwa akïkötö ngokikwa,

⁴² ananan nyu mumenyu nyo kyaman nko Yakopo nko Isak nko Apraam nko kore nyo kyoyomisyan chane.

⁴³ Wölo mïchini kïlïkwï korö kïratyan tökumuny ompö könyi Sapato ntökïtenö kïghakta pich ngokikwa löwïr ompöwölo melö kirip kirurutköchan löwïr.

⁴⁴ Wölo kïrkegh kimi chane koro pungkökwa, kïmelö ocholtenan chane awany lömïs, tömenyara mumenyan nko chane, ompöwölo ochan ECHOTYON Tororötïngwa.

⁴⁵ Wölo ononan mumenyu nyo kyaman nko papotïnekwa cho kyamïtwan kïpkana koro Misri kïsïwïyi puntonï lö talïkwan Tororötïngwa, ompöwölo ochan ECHOTYON.”

⁴⁶ Chete kï kinetut nko kirurut cho kimwochï ECHOTYON pipö Israel kuwerï kuti Musa ompö kutïng pö Sinay.