LAWIN 25 - PIPÏLIA

¹ Kïlenchï ECHOTYON Musa ompö kutïng pö Sinay,

² “Mwochinö pipö Israel lö, nyini katïtekwa koronini okonokwa, mongorsyö könyi mut nko odeny ompöwölo könyi Sapato* ompö ECHOTYON.

³ Olechinekwa kösïgh parenikwo akwïnchïr sapipunekwo alisyekwa ompö könyis mut nko akonga.

⁴ Wölo könyi mut nko odeny kïlïku könyi Sapato nyo pö kimïny ompö kor. Lïku köny nyo kakitïlilchï ECHOTYON. Molechï kösïgh parenikwo anta akwïnchïr sapipunekwo.

⁵ Motöp ntol pagh cho kapit opïn amopït sapipun cho melö kyakwïnchïrakwa ompö könyinoni pö kimïny ompö kor.

⁶ Kïrkegh kemungöy korö könyinoni, onyorukwa omisyö nyo mïchinokwa nko sekeyikwa cho le mïrön nko cho le kor nko mötworikwa nko to cho möngöy nko akwa

⁷ akïpïghyongöy kyakikwa tïkwïl nko tyonkïn cho mi korenkwa. Lïku omisyö kïgh anka tïkwïl nyo rïro kor.

Könyi kilïngat

⁸ “Oyitekwa könyis mut nko odeny kïnyïl mut nko odeny, lïku könyis 49 löwïr.

⁹ Atolapay ayontekwa chi nyo wetöy kïkutöy kontï kïghömï kor asisini pö taman ompö arawa mut nko odeny ompö asispa linyot.*

¹⁰ Oghekwa nyu könyi tömönut mut kïtïlilit. Omwotïtokwa kityakat ompö pipö korenkwa löwïr, lïku kinanata könyis tömönut mut ompö akwa, lïngöy chi anka tïkwïl kinyi, kïmïla sekeyonta katangwa.

¹¹ Mongorsyö anta ol tïkwïn cho kapit opïn anta opït sapipun cho makwïnchïrnye chi.

¹² Tïlil könyinoni kïmïkul ompö akwa. Omekwa tïkwïn cho kapit opïn.

¹³ “Lïngöy chi kinyi nyo kyalta ompö könyinoni.

¹⁴ Ato iolchï pöröryengu par anta iyala nyinte, kï mïchini oghchinö kegh nyo karam.

¹⁵ Iyalta par kïrïp kegh olye nko könyiswechini kïngoröy kïtomö kwit könyi kilïngat.

¹⁶ Ato changit könyiswö itas olye kïyetï anta ngörïngit ireyteghö olye, ompöwölo paghechini rïro paranini chini olenyi.

¹⁷ Moghchï kegh nyo gha, wölo okonyït Tororöt. Ochan ECHOTYON Tororötïnkwa.

Kömpölelyo könyi mut nko odeny

¹⁸ “Orip kirurutköchan löwïr, atamanga koronï ompö kalya.

¹⁹ Rïröy korö paghechi cho omekwa apïghyö amöngisyö ompö kalya.

²⁰ “Wölo ato olekwa, ‘Kyomecha ne ompö könyi mut nko odeny ato mökïngorsyechanye?’

²¹ Okonokwa kisoyönutköchan ompö könyi mut nko akonga, tökïrïr pagh cho mïchini könyis sömök.

²² Ato ongorsyekwa könyi mut nko sömök kïtö omekwa pagha könyiswechay le sömök ntökïtenö kïrïr pagha könyi mut nko angwan.

Kilïngata tïkwïn

²³ “Moltonye chi kor kokay, ompöwölo nyinyan kore. Ochikwa to achï pïnot.

²⁴ “Mïchini kechömchï chi nyo kyalta parenyi kwal ngat.

²⁵ Ato lïkwï werïngwo meywon akwalta tïkuchi kareran, kungwïnöy chitöngwa kwolöy akuyoda kini kyalta werïngwa.

²⁶ Ato chi nyo mötïnye chitöngwa nyo olöy, kï köngöy nyinte ato sïch tïkwïn cho muköy ntökwal, kwal.

²⁷ Ghoktoy ropïyen cho pö könyis cho köngötï tökutomtö könyi kilïngat otini kyalta nyinte. Kïwö nyu kwal kinyi.

²⁸ Wölo ato möghömöy ropïyeni cho kyolo, kïtöpo kini mori chichini kyal ntökïtenö kwitïta könyi kilïngat, kulïng nyu könyinoni.

²⁹ “Ato alta chi konyi nyo kömöngöy nyo kitek nayatu kanasyan, kumuköy kwal ngat atowonyö könyï akonga kïngata otini kyalta.

³⁰ Ato malnye nyinte otini kewonyö könyï akonga, kïpöyitu kot chichay kyal kokay nko monechi. Melö tökulïngöy ompö könyi kilïngat.

³¹ Wölo ato korïn cho melö mito kanasyan keghöy le wölo kidoy paren cho muköy chito kïpö kwolöy ngat anta kilïng ompö könyi kilïngat.

³² Wölo muköy pipö Lawi ntökwal ngat korïn cho mi kanastinekwa ompö asis anka tïkwïl.

³³ Wölo ato al chi pö Lawi köyoni, atolapay kuyoku kegh chichay kikyala kot tagh kungwïn kwala nyinte, kïmïchini keyokyï chichay pö Lawi ompö könyi kilïngat. Ompöwölo korïn cho mi kanastin cho kimöngöy pipö Lawi kï pö pipö Israel.

³⁴ Wölo melö kyoltoy koro ocheywo pipö Lawi ompöwölo nyingwa kokay.

Kemongchï mey tïkwïn

³⁵ “Ato lïkwï meywon chi pö Israel nyo möngöy nko nyi nyo memukönye kungöroköy kegh, inam nyinte le ato kenömenyi ton anta pïnotyon aimang tïkwïl.

³⁶ Meghach nyinte kïtïl tïkwïn cho ketönönyi, wölo ikonyït Tororöt aikany kïmang nyinte nko nyi.

³⁷ Memongchï nyinte ropïyeniku anta omisyö lö tonyorï kinyiwut.

³⁸ Ompöwölo ochan ECHOTYON Tororötïnkwa nyo kyamïtunenekwa koro Misri ato konokwa koro Kanan talïkwan Tororötïnkwa.

Kityakata sekey

³⁹ “Ato lïkwï meywon chi akonga ompö akwa akwolunyi kegh, megh nyinte kïpöghisyö le sekeyon.

⁴⁰ Wölo inam nyinte le ton anta pïnotyon, pöghisyewunyi le mötworin ntökwit könyi kilïngat.

⁴¹ Kïwö nyu nyinte nko monechi kïmïla katangwa wölo mi pikökwa.

⁴² Ompöwölo mötworichan chane cho kyamïtunan koro Misri. Melö kyoltoy le sekey.

⁴³ Meghapghap chane, wölo ikonyït Tororötïngu

⁴⁴ Imukenyi ole sekeyköku cho le mïrön anta kor ompö puntonichï kiwitakwa.

⁴⁵ Omukekwa ole pïnot tïkwïl cho möngöy nko akwa nko monekwa cho kiyichï korenkwa kïlïkwï chikwa.

⁴⁶ Mïlöy monekwa sekeyikwa, tökïpöghisyechï chane kokay. Wölo maghapghap werkökwo pipö Israel.

⁴⁷ “Ato lïkwï sïkön chi nyo le pïnotyon nyo möngöy nko akwa akïlïkwï werïnkwa meywon akwoltochï kegh pïnotyontonay anta arengwa le sekeyon,

⁴⁸ kumuköy nyu werkökwa kwal ngat,

⁴⁹ anta mamatanyi anta werkökwa walaka anta arengwa anka ntökwal ngat anta ato lïkwï sïkön kwal kegh.

⁵⁰ Mïchini kïtepa echotyonte nyini kyal nyinte, atolapay kuyit tïkwïl könyis kïngata otini kyalta kegh ntökwit könyi kilïngat kighöy olyenyi kïrïp kegh nko könyiswechini kötöpöghisïyi le mötworin.

^51-52 Ato köngötï könyiswö cho ngörï ntökwit könyi kilïngat kutyoköy kegh kïrïp kegh nko könyiswechini kötöpöghisyechini nyinte,

⁵³ le ato köle mötworin nyo nömöy ropïyen. Amekany kïpayta nyinte ompö ghapghapat.

⁵⁴ Ato memuko kyal ngat nyinte le nyï, ketyoköy nyu nyinte nko monechi ompö könyi kilïngat.

⁵⁵ Ompöwölo mötworichan pipö Israel cho kyamïtunan koro Misri. Ochan ECHOTYON Tororötïnkwa.”