LAWIN 23 - PIPÏLIA

¹ Kïlenchï ECHOTYON Musa,

² “Mwochinö pipö Israel lö, achï kirurut cho orïpekwa ompö ichontin cho tïlilöch ato oryomekwa asagh ECHOTYON.

³ Kighöy ighisyewut ompö osis mut nko akonga, wölo Sapato* ompö ECHOTYON nyo tïlil nyo pö saghat asis nyo pö mut nko odeny nyo kimungöy ompö wöloni omöngekwa.

Pasaka* nko makatin cho mömicha mumar

⁴ “Chete kï ichontino ECHOTYON cho oghekwa ketomtö osiswekwa.

⁵ Nyini ketïta mönon ompö asispa taman nko angwan ompö arawa tagh kïlïku Pasaka ECHOTYON,

⁶ atolapay asispa taman nko mut nyo pö arawanoni kïlïku asispa Ichon pö makatin cho poryö mumar ompö ECHOTYON. Omekwa makatin cho mömicha mumar osis mut nko odeny.

⁷ Otuyonekwa asisini tagh ato konyïtö ECHOTYON, magh ighisyö anka tïkwïl.

⁸ Wölo otönekwa ECHOTYON amöros nyo kïpelöy osis mut nko odeny, nyini ketïta asisoni, kïlïku tuyot nyo kïkonyïto ECHOTYON, magh ighisyö anka tïkwïl.”

Ichon pö poretayi pagh

⁹ Atolapay kïlenchï ECHOTYON Musa,

¹⁰ “Mwochinö pipö Israel lö, otini katïtekwa koronini okonokwa alökwa paghekwo, opchï nyu tïsin poretayi paghechoni.

¹¹ Atö kuwiswis tïsin paghechoni ompö ECHOTYON le ropöwon atonyorunö chömchin. Ighöy nyu nyinte lenyoni ato le asïyech tökwoghö otini kewonyö Sapato.

¹² Owiswisekwa poretayi paghekwa asisini aropta makal nyo tïng köny akonga nyo lïpop le amöros nyo kïpelöy.

¹³ Atolapay aropta tïkwïl pïsya kilen odeny cho kikïtasta mwaghpa orolwö le ropöwo omisyö ompö ECHOTYON cho ngutoy nyo karam nko dipay* lita akonga.

¹⁴ Momekwanye makatyan anta pïsya cho kakïkel anta cho lyöghöy ntökwitïta asisoni opunekwa ropöwo Tororötïngwo. Nyete kï kirurut nyo pö kokay ompö pïnwöy löwïr ompö wop anka tïkwïl nyo omöngekwa.

Ichon pö Ilö

¹⁵ “Oyitekwa nyu wikin mut nko odeny kïngeta asisini kewonyö Sapato, otini kopukwa poretayi paghekwa cho kïropchini ECHOTYON.

¹⁶ Opchinekwa nyu ECHOTYON ropöwo pagh ompö asispa tömönut mut, asis akonga otini kewonyö wïkinö mutï nko odeny cho pö Sapato.

¹⁷ Opunonekwa kestonikwa makatin odeny cho lïku ropöw cho sis cho kikigha akonga pïsya kilen odeny cho kakïtasta mumar aketö ECHOTYON le ropöwo poretayi pagh.

¹⁸ Oroptonekwa nyu makatin nko wara kechir mut nko odeny cho pö köny akonga cho lïpopöch nko egh akonga nko mökol odeny kïlïkwï amöros nyo kïpelöy ompö ECHOTYON kïmi nko ropöwo pagh nko dipay. Choni kï ropöw cho ngutoy cho onyïn ompö ECHOTYON.

¹⁹ Atolapay aropta kwagha akonga nyo pö ropöwo ngokï nko mökol odeny cho tïng köny akonga le ropöwo pöghisyö.

²⁰ Atolapay kutötö tïsin makatyante nko mökolchay kwodeny le ropöw cho sis cho pö ECHOTYON ompö tïsin. Tïlilöch ropöwechoni.

²¹ Okïrurekwa kegh asisoni, ompö tuyot nyo kïkonyïto ECHOTYON, magh ighisyö anka tïkwïl. Nyete kï kirurut nyo pö kokay ompö pïnwöy löwïr ompö wop anka tïkwïl nyo omöngekwa.

²² “Ato olöy paghekwo, mol ntökwit nyini le söröm, amaghamït ngötunön ompö par, opïsyinekwa mey nko cho le to. Ochan ECHOTYON Tororötïnkwa.”

Ichon pö köny nyo rel

²³ Atolapay kïlenchï ECHOTYON Musa,

²⁴ “Mwochinö pipö Israel, kïrip asispa kimïny akïkut kontin kunonchï kegh tuyot nyo kïkonyïto ECHOTYON ompö asispa tagh nyo pö arawa mut nko odeny.

²⁵ Magh ighisyö anka tïkwïl, atolapay aropta ropöwo omisyö ompö ECHOTYON.”

Asispa linyot*

²⁶ Atolapay kïlenchï ECHOTYON Musa,

²⁷ “Lïku asispa linyot asis nyo pö taman ompö arawa mut nko odeny akï asispa tuyot nyo kïkonyïto ECHOTYON ompö akwa nyo omïnïngitekwa kegh atötö ropöwo omisyö ompö ECHOTYON.

²⁸ Amagh ighisyö anka tïkwïl asisoni, ompöwölo asis nyo pö linyot ompö ECHOTYON.

²⁹ Ato chi nyo memïnïngitönye kegh asisoni kepesyot nyinte nko pikachi,

³⁰ otïghan chi anka tïkwïl nyo ighöy ighisyö asisoni.

³¹ Nyete kï kirurut nyo pö kokay ompö pïnwöy löwïr ompö wop anka tïkwïl nyo omöngekwa.

³² Lïku asispa Sapato ompö akwa nyo omïnïngitekwa kegh, otorekwa nangatu asispa mut nko angwan nyo pö arawa ntökwitïta nangatu asispa taman.”

Ichon pö Tunkun

³³ Atolapay kïlenchï ECHOTYON Musa,

³⁴ “Mwochinö pipö Israel lö, toröy Ichon pö Tunkun asispa taman nko mut ompö arawa mut nko odeny ompö ECHOTYON akïtas tagh osis mut nko odeny.

³⁵ Otuyonekwa kegh asisini tagh ompö tuyot nyo kïkonyïto ECHOTYON, magh ighisyö anka tïkwïl.

³⁶ Otönekwa ECHOTYON ropöwo omisyö ompö osis mut nko odeny, atolapay otuyekwa ompö tuyot nyo kïkonyïto ECHOTYON asispa mut nko sömök atö nyinte ropöwo omisyö. Lïku nyoni asispa saghat magh ighisyö anka tïkwïl.

³⁷ “Chete kï ichontin cho tïlilöch cho pö ghamïtata kegh ompö tuyot nyo kïkonyïto ECHOTYON nyo kitöni nyinte ropöwo omisyö nko amörostin cho kïpelöy nko ropöwo pagh nko amörostin nko ropöwo dipay kïrïp kegh nko asistanyi.

³⁸ Ichontinechï kï walaka cho sis ompö Sapatotino ECHOTYON nko ropöwekwa nko ropöwo kipuntogh nko ropöwo chamat cho otönekwa ECHOTYON.

³⁹ “Nyini kolökwa parenikwo agh ichon ompö ECHOTYON osis mut nko odeny kutorö asispa taman nko mut nyo pö arawa mut nko odeny. Kutor asispa taman nko mut nyo pö arawa mut nko odeny. Lïku asispa kimïny asis nyo pö tagh nko asispa mut nko sömök.

⁴⁰ Opekwa asisoni akwa ketikwo cho karamach, apït mori sos nko söko cheptuya nko mori ket cho pito lalwatïn, atolapay ongörekyekwa ompö tawu ECHOTYON Tororötïnkwa osis mut nko odeny.

⁴¹ Oghekwa ichon ompö ECHOTYON osis mut nko odeny ompö köny akonga arawa mut nko odeny. Nyete kï kirurut nyo pö kokay ompö pïnwöy löwïr.

⁴² Omöngekwa löwïr tunkun osis mut nko odeny cho ochï pipö Israel,

⁴³ atökunkïtï monekwa lö kyaghan pipö Israel kïmang tunkun otini kyamïtunan chane koro Misri. Ochan ECHOTYON Tororötïnkwa.”

⁴⁴ Kïlenyona, kïmwochï Musa pipö Israel kirurut pö ichontin cho tïlilöch cho kïkonyïto ECHOTYON.