LAWIN 18 - PIPÏLIA

¹ Atolapay kïlenchï ECHOTYON Musa,

² “Mwochinö pipö Israel lö, ochan ECHOTYON Tororötïnkwa.

³ Magh le ato kighöy pipö Misri wölay kyomöngekwa anta agh le pipö Kanan wölini omïtokwa. Motöp ntarïp otöptinekwa cho ghach.

⁴ Orip kirurutköchan agh le ato komwowokwa. Ochan ECHOTYON Tororötïnkwa.

⁵ Mïchinokwa oripö kirurutköchan löwïr ompöwölo chi nyo rïpöy kïsöpöy. Ochan ECHOTYON.

⁶ “Merï chi nko tïlya. Ochan ECHOTYON.

⁷ Merï nko yongu, ompöwölo keratanyi papongu nko yongu.

⁸ Merï nko korketo papongu, ompöwölo keratanyi papongu.

⁹ Merï nko cheptöngwo, kïrkegh kö chepto papongu anta chepto komöt, ato kikïyichï kaw anta sany.

¹⁰ Merï nko kukötineku, ompöwölo arasï nyoni ompö nyi.

¹¹ Merï nko chepto korketo kon anka, ompöwölo cheptönkwa nyinte.

¹² Merï nko sankengu, ompöwölo tupchö nko kon.

¹³ Merï nko chepto ompö yongu, ompöwölo tupchö chane.

¹⁴ Merï nko korketo werto ompö papongu, ompöwölo yongu.

¹⁵ Merï nko korketo werïngu, ompöwölo potïchtöngu

¹⁶ anta nko korketo werïngwo.

¹⁷ Merï nko korka nko cheptanyi amerï nko potïchtanyi anta irï nko kokötinechi, ompöwölo takalnan nyoni.

¹⁸ Mep orötöngu nyini tupchö nko korkengu otini tökïsatate korkengu.

¹⁹ “Merï nko korka nyo töpo yona, ompöwölo sïmnyon nyinte.

²⁰ Amerï nko korketo pöröryengu isïmnyon kegh nko nyinte.

²¹ Metötö montöngu kïlïkwï amöros nyo kïpelchini Molek, ompöwölo melö mïchininyi tönö arasï kaynata ECHOTYON Tororötïngu.

²² Merï nko chi nyo le mïrön le ato korka nyinte, ompöwölo takalnan nyoni.

²³ Amerï mïrönö anta korka nko tyony anka aisïmnyon kegh, ompöwölo takalnan nyoni.

²⁴ “Mosïmnyonö kegh ngalechoni, ompöwölo kisïmnyonö kegh puntonichï owetan oyono tawunkwa.

²⁵ Kilïkwï koronï sïmnyon akwompö ngoki pich, kïmuny ECHOTYON korononi ntökïtagh chane pikachi.

²⁶ Orip kirurutköchan löwïr amagh tïkuchoni kïkïröy, ata kö ton nyo möngöy nko akwa.

²⁷ Kïlenyona kilïkwï koronï sïmnyon, ompöwölo melö kikïr pïchï möngöy koronï tïkuchoni.

²⁸ Ato osïmnyonökwa koronï kïtöghokwa le nyay kitagh pipö puntonichï kimi koronï.

²⁹ Akï chi anka tïkwïl nyo ighöy tïkuchoni kïkïröy, kepesyöt nko pikachi.

³⁰ Kïlenyona orip ngalechan, amagh tïkuchï kïkïröy kigh pich cho kimöngöy koronï, mosïmnyonö kegh tïkuchoni. Ochan ECHOTYON Tororötïnkwa.”