LAWIN 16 - PIPÏLIA

¹ Kingölonchï ECHOTYON Musa otini kimeghö werpö Aron odeny, otini kiropta ropöw cho melö tïlilöch ompö ECHOTYON.

² Kïlenchï ECHOTYON Musa, “Mwochinö werïnkwa Aron lö melït ananka okumpö ori Wölo Tïlil Tya* kïnomnyö tömemegh, ompöwölo olïtunan ompö polta paraku köröwonto Santuku Muma.*

³ Wölo ato lïtöy Aron Wölo Tïlil Tya kïkötu ngaryan nyo pö ropöwonto ngokï nko makal nyo pö amöros nyo kïpelöy.

⁴ Wunöy kegh Aron kïtomö kïwö Wölo Tïlil Tya akulak sïro cho tïlilöch cho pö tïsï sïra nyo kogh nyo tïlil nko sïrwali nko angwa mu nko kopiyö nyo pö katani.

⁵ “Chengo pipö Israel kwöghe odeny cho pö ropöwonto ngokï nko makal akonga nyo pö amöros nyo kïpelöy.

⁶ Tötoy Aron egh kïlïkwï ropöwonto ngokichi nko cho pö katanyi atökïlinyö nko ECHOTYON.

⁷ Atolapay kuretö kwöghechay kwodeny kutang kuka Ema nyo mi ECHOTYON.*

⁸ Atolapay kïpar kwegh Aron, kïpöyit arte anka ECHOTYON, kïpöyit anka Asasel.

⁹ Atolapay kutötö Aron artanay kïpöyit ECHOTYON le ropöwonto ngokï,

¹⁰ wölo ato artanay köpöyit Asasel ketötoy kïsatate ompö ECHOTYON atökegha linyot atolapay kuretö ntökwit surkwen wölo mi Asasel, akïpïstö.

¹¹ “Tötoy Aron egh kïlïkwï ropöwonto ngokichi nko cho pö katanyi atökïlinyö nko ECHOTYON.

¹² Atolapay kïchengwï kerony nyo kinyïghï ngeset ompö ato kïpelo amöros akïcheng tïkuchay ngutoy cho onyïn römut akonga cho kikïtïgh kïmïnkechitu atolapay kwip kïlït Wölo Tïlil Tya

¹³ akutö tïkuchay onyïne ma ompö tawu ECHOTYON, tökumï kuyentö ighe köröwonto Santuku Muma, tömöma nyinte ato sïwa.

¹⁴ Atolapay kutö kisönko egh tïkwïte ewunyi akwisö paraku köröwonto Santuku Muma nko wölo le tagh. Ighöy lenyoni kïnyïl mut nko odeny.

¹⁵ “Atolapay kïpar artanay pö ropöwonto ngoki pich, atolapay kwip kisönkö kïlïtöy Wölo Tïlil Tya akwisö kisönkö paraku köröwonto Santuku Muma nko wölo le tagh le wölo kida kisönchay pö egh.

¹⁶ Ighöy nyu lenyoni atö kïtïs Wölo Tïlil Tya akwompö sïmnyontöno pipö Israel nko lelutkökwa nko ngokikwa löwïr. Ighöy lenyoni ompö Ema nyo mi ECHOTYON ompöwölo mi kwenu sïmnyontönengwa.

¹⁷ Möminye chi nyo mi Ema nyo mi ECHOTYON otini lïtöy Aron kwighöy linyot ompö Wölo Tïlil Tya, ntökïtenö kungwïn nyinte sany otini kikwigh linyot ompö ngokichi nko cho pö katanyi nko cho pö pipö Israel löwïr.

¹⁸ Atolapay kïwö sany ato kïpelo amöros akïtïs nyu atoni, atolapay kïcheng kisönko egh tïkwïte nko cho pö aran akïnyïra kuyo ato kïpelo amöros.

¹⁹ Akwisö kisönkö ompö morïnenyi ato kïpelo amöros kïnyïl mut nko odeny. Kigh nyu lenyoni akïtïs ato kïpelo amöros akwompö sïmnyontöno pipö Israel.

Aran nyo chengöy ngokï

²⁰ “Nyini nyu kewany kïtïs Wölo Tïlil Tya nko Ema nyo mi ECHOTYON nko ato kïpelo amöros, kicheng artanay akutötö kïsatat.

²¹ Kukana Aron ewunechi möt pö artanay akïngangtegha parakunyi ngoki pipö Israel nko lelutkökwa löwïr akutö möt pö artanay. Atolapay kuretö chi nyo kikekïl kutang surkwen.

²² Chengöy artanoni ngokikwa löwïr akïwö kutang surkwen.

²³ “Atolapay kïlït Aron Ema nyo mi ECHOTYON akïngwïs sïrochay pö tïsï loköy atay lïtöy Wölo Tïlil Tya akïpïsyï atoni.

²⁴ Akuwun kegh ompö ato melö sïmnyon, atolapay kulak sïrokachi akïwö kutötö amöros nyo pö ngokichi nko cho pö pich.

²⁵ Atolapay kïpel sunet pö ropöwonto ngokï ompö ato kïpelo amöros.

²⁶ Wunöy kegh akuwun sïrokachi chichay keretoy artanay kïwö surkwen wölo mi Asasel, atolapay kïlïtï nyu kanasyan.

²⁷ Kipöy nyu panya eghay nko artanay pö ropöwonto ngoki chay kakïcheng kisönkö kegha linyot ompö Wölo Tïlil Tya kïlïtöy kanasyan kiror tökepel nko eghyante nko menkö.

²⁸ Wunöy kegh nko sïrokachi chi nyo kapel panyechay atolapay kïlïtï kanasyan.

Kekaman asispa linyot*

²⁹ “Lïku nyu kirurut nyo pö kokay ompö akwa lö nyini ketomtö asispa taman nyo pö arawa mut nko odeny, okïrurekwa amagh ighisyö anka tïkwïl nko ton nyo möngöy kwenunkwa.

³⁰ Kighöy linyot asisete atöketïsokwa ompö ngokikwo löwïr.

³¹ Lïku Sapato* nyo omunyekwa akïrur ompöwölo lïku kirurut nyo pö kokay.

³² Ighöy linyot Tïsin nyo Wow* nyo kikekïl kïcheng ngacharuto kwanta, akuloköy sïro pö tïsï

³³ akïtïs Wölo Tïlil Tya nko Ema nyo mi ECHOTYON nko ato kïpelo amöros nko tïsï nko pipö Israel löwïr.

³⁴ Lïku nyete kirurut nyo pö kokay ompö akwa nyo kitïsokwa kïnyïl akonga ompö köny ompö ngokikwa löwïr.” Kwigh Musa lenyini kimwochï ECHOTYON nyinte.