LAWIN 12 - PIPÏLIA

¹ Kïlenchï ECHOTYON Musa,

² “Lenchinö pipö Israel, Korka nyo kösïkisyö akïyï monïng nyo le weri, kïlïku sïmnyon nyinte osis mut nko odeny le atay töpo yona.

³ Kemut weray ompö asisto mut nko sömök.

⁴ Atolapay kïtöpö kokonay osis 33 tökïtïs kegh. Melö nömöy kïgh anka tïkwïl nyo tïlil anta lïtï ato tïlil ntökïtenö kuwonyö osiswö cho kitïso nyinte.

⁵ “Ato yï monïng nyo le cheptö kïlïku sïmnyon osis taman nko angwan, le atay töpo yona. Atolapay kïtöpö osis 66 töketïs nyinte.

⁶ “Nyini kewonyö osisweko tïsenyi nyo pö weri anta cheptö, kurechï tïsin wawa nyo tïng köny akonga le amöros nyo kïpelöy ompö otini kïlïto Ema nyo mi ECHOTYON* nko chepïrïm anta kayuntï le ropöwonto ngokï.

⁷ Roptoy tïsin ompö tawu ECHOTYON tökïtïs nyinte, ato kïtïlilit. Chete kï kirurut cho pö korka nyo kölusyö.

⁸ “Ato melö muköy kïnyorï wawa, kwipï chepïrïmpen odeny nko kayuntun odeny pö akonga amöros nyo kïpelöy, kïpö anka ropöwonto ngokï. Tïsöy nyu tïsin nyinte, atökïtïlilit.”