KOLOSAY 4 - PIPÏLIA

¹ Akwa echot, oghchinö man sekeykökwo amowutyeghö lö otïngetekwa tïkwïl Echotyontengwo nyo mi yïm.

Kirurut

² Okilö kegh ompö saghat kïnomnyö. Akwotini omitö osoghöy, otïpï kïpsach, ayokyï Tororöt sörö.

³ Osoghwecha tïkwïl atökïyotwecha Tororöt ortïn cho kyomtegho ngölyontenyi nyo ngölono wïnyata Kristo* akï amtaghatanoni nyete kemïtyanïn ye chela.

⁴ Osoghwante atamwatïtan wïnyatanoni ompö or nyo pköchini pich le wölo kerokenanïn angalanta.

⁵ Alïkuna pich cho ngöghomöch ompö tawu pich cho tomöcha kughan Echotyon, apöghisyeghö nyo karam pöroyïn anka tïkwïl nyo otïngetö.

⁶ Nya kïnyïghi pöropchö ngal cho pkono kutïwekwa akwonyïne kïtenö osis, atonkïtunö wölo omölyöngtoy kuten kïgh anka tïkwïl nyo tepokwa pich.

Kitakwesat nyo pö söröm

⁷ Ngwïnöy kïmwowokwa lökoyechan löwïr werïnyo Tukiko nyo le chaman akughanate ompö ighisyonete pö Echotyon kighecha tïkwïl.

⁸ Nka nyoni koyonwan nyinte kukil mïkuliskökwa otini mi kwomwekwa lökoyecha.

⁹ Ngwïnöy nyinte nko werïnyo Onesimo, chito korenkwa nyo ghanate tökïmwowokwa wölo lata ngala ompö wölete kïmitecha.

¹⁰ Ketakwesakwa Aristarko nyo kïmitecha chela tïkwïl. Ketokwesï tïkwïl Marko nyay tupchö kwanta nko papoto Parnapa. (Kyoyokwokwa kut lö atoitï Marko korenkwa atach nyinte.)

¹¹ Ketakwesakwa tïkwïl Yoswö nyo kïkuro ompö kayne anka Yusto. Pïchoni le sömök opïn ompö pipö Yaudi cho kikughan Echotyon, cho kighecha tïkwïl pöghisyo Pöyunöto Tororöt akikungarakanïn chane nyoman.

¹² Ketakwesakwa tïkwïl Epapra nyay ngwïno korenkwa akï mötworinto Yeso Kristo. Soghwokwa nyinte nyoman kïnomnyö atamukakwa oghyongö le pich cho kikïkil lasiny ompö ngal cho mököy Tororöt.

¹³ Omukan osöwintönchini ante lö wow ighisyö nyo keghwakwa Epara akwighchï tïkwïl pipö Laodikea nko cho pö Iyerapoli.

¹⁴ Ketakwesakwa Luka nyay le chepsakïtyantencha nyo le chaman nko Dema.

¹⁵ Otokweswecha tupchenicho cho mi Laodikea atokwesï cheptönyo Nimpa nko kanisa nyo tuyegho konyi.

¹⁶ Otini kawanyakwa osomön palalyantanete, mïchini opchinö kusomön pipö kanisa Laodikea tïkwïl. Osomön tïkwïl palalyan nyo kinyorï tupchenichoni pö Laodikea.

¹⁷ Omwochï Arkipo kulïtit ighisyonay kitö Echotyon.

¹⁸ Kakiran takwesnete ante Paulö morïchu. Mowutyeghö kïnye lö omitan chela! Nya kïtöpö pöropcho Tororöt nko akwa.