KOLOSAY 3 - PIPÏLIA

¹ Kïkany ato kyotutukwa nko Kristo,* ayarena kong tïkwïn cho mi yïm, wölini mi Kristo kumpuruno ewu tagh nyo pö Tororöt.

² Opïrchinö tya tïkwïn cho mi wölnö le yïm, melö cho mi wölï le ngwïny.

³ Ompöwölo kyomeghekwa, akikewïny söponwekwa nko Kristo orito Tororöt.

⁴ Akwotini kechumï Kristo nyini le söpontönkwa nyo pö nyoman ochumunekwa tïkwïl nko nyinte ompö ororyö.

Otöp nyo pö köny nko otöp nyo rel

⁵ Kïlenyona, otïghö otöptino ngwïnyinï cho ghach cho mi orinkwa cho lata: cheporesnan nko sïmnyontön kinonut cho ghach nko pïrchin nyo gha nyo karkegh nko saghata körkeyïntin.

⁶ Chumchini pich cho le penyï sïngiryo Tororöt.

⁷ Kyomitekwa chete le akwa osiswe walaka orïpöy ngal cho lata choni, atanya kitökïpöywokwa ngalechoni.

⁸ Wölo mïchinokwa ye opïstenö nörekyö, pïrchin, ghöyityö, kimwoghsyö nko ngala sïmnyon cho merokocha kïngetunö kutïwekwa.

⁹ Momwochï kegh ngala putintön, ompöwölo kyangwïstekwa otöp nyo kipö köny nko ighisyewutkachi,

¹⁰ alak otöp nyo rel. Letoy tagh Tororöt kupïchöy otöpnoni kïrelit kïnomnyö ntökïkarkegh nko nyinte, nyini le ighintenyi kegh atamukakwa nyu onkïtunö Tororöt lasiny.

¹¹ Melö tökïmi nyu sisïn nyo pö pipö punton nko pipö Yaudi, anta nyo pö chi nyo kiwö tum nko nyo le somchon, anta nyo pö chi nyo kisomön nko nyo melö kisomön, anta nyo le sekeyon nko nyo melö sekeyon, wölo kïgh nyo wow tya ompö choni kï Kristo, akï nyinte nyo mi orito choni löwïr.

¹² Ochikwa ye pipö Tororöt, kichamakwa nyinte akïkïlakwa alïkuna pikachi kegh. Kïlenyona, olokyinö kegh tïkuchï: kisyonöt, köromnyö, ipöto kegh ngwïny, tölosyö nko mïkukönöt.

¹³ Omïkukönchinö kegh akwane, alöstoghchï kegh ato mi chi nyo kölechï chito anka. Mïchinokwa olöstoghchine kegh le wölo kilöstowokwa Echotyon.

¹⁴ Kïtas kegh nko choni, mïchini alaka chomnyogh, ompöwölo nyoni nyo tusot tïkwïn löwïr kïtïpï nyo karam.

¹⁵ Akanya kïpayta kalya Kristo mïkuliskökwa, ompöwölo kalyanoni nyo kökurchokwa Tororöt atalïkuna por akonga, ayokyï nyinte sörö kïnomnyö.

¹⁶ Akanya kïtöpö orinkwa ngölyonto Kristo kïmïchï. Aneta kegh, arur kegh ompö ngöghomnyö anka tïkwïl. Otumö sölut nko tumwöyi mïkulögh cho kïtumchini Tororöt, ayokyï nyinte sörö.

¹⁷ Akï kïgh anka tïkwïl nyo oghekwa anta nyo omwoghekwa kïmïchini agha ompö kaynata Echotyon Yeso, ayokyï sörö Tororöt Papo ompö nyinte.

Otöp pö pich cho tïng söpon nyo rel

¹⁸ Ateka korï santokökwa ompöwölo chömöy Echotyon lenyoni.

¹⁹ Kïkany akwa mïrön achama korukwo, amaghapghap chane.

²⁰ Akwa monïng oterchinö yiyikwo ompö ortïn lapay ompöwölo ighöy nyoni Echotyon kïngarak.

²¹ Akwa yïyi, mosus monekwo kïnörekyö atömömeghö mutïnö chane.

²² Akwa sekey pö pipö ngwïnyinï, oterchinö echotkökwo ompö ngal lapay amelö pat otini otopönekwa chane ompöwölo omökekwa oporchine kegh chane owöghekwa, wölo agha lenyoni ompö mïkulöwekwo kïmïkul, ompöwölo opöghisyechïnekwa Echotyon.

²³ Kïgh anka tïkwïl nyo oghekwa mïchini agha ompö mïkulöwekwo kïmïkul le ato koghchinekwa Echotyon, melö le ato koghchinekwa pich

²⁴ ompöwölo onkïtökwa lö konokwa Echotyon ropöwon nyo omïlekwa, nyo kirorchï nyinte pikachi. Ompöwölo nyinte nyo opöghisyechinekwa kï Echotyon Kristo.

²⁵ Ato igh chi nyo gha, keropchini kïrïp kegh nko ghöyityenyi, ompöwölo ropchini Tororöt chi anka tïkwïl kïrïp kegh nko ighisyenyi.