KOLOSAY 2 - PIPÏLIA

¹ Omökan ya omwowokwa wölo kyonoghyan kïlïkwï ompö parakunkwa nko ompö pich cho mi Laodikea nko ompö pikö walaka cho tomöcha kïsïwanïn.

² Kaghan lenyoni atökïsïch chane nyakanat ompö mïkuliskökwa akïlïkwï kïgh akonga ompö chomnyogh atökïsïch chane mökosyö nyo pö kinkïtöt nyo ipu pköchin pö man. Muköy chane ompö aranoni kunkïtu wïnyata Tororöt, nyoni kï Kristo* nyinte.

³ Kikïwïnchï orinyi kaplawachtin cho pö ngöghomnyo Tororöt kïmïkul nko kinkïtöt.

⁴ Komwowokwa lenyoni tömemï chi kïlïsenak ngalechi kïrkegh kö onyïne lö ne.

⁵ Ompöwölo kïrkegh kochan low ompö por, wölo mi mïkulöwunyan nko akwa. Ochan ngarakate otini osïwïnan wölini kachïchïmtekwa tïkwïl ompö kighanatengwo ompö Kristo.

Möngot latïny ompö Kristo

⁶ Ato kyatakakwa Kristo Yeso kïlïkwï Echotyon, otïpinö nyu ompö linyogh nko nyinte.

⁷ Mïchinokwa osïkö sikin ompö nyinte achïchïm ompö kighanatengwo kïle wölo kikinetïtakwa. Alïkwï pich cho oyokyini Tororöt söro nyoman.

⁸ Orip nyu kegh tömetönok chi ngöghöp ompö ngöghomnyenyi nyo le kwïle akï pö lïs akï, nyo ngwïno asïl pö ptangengmöt nko mïkulis cho pöytoy wölnö le mïröt melö ngwïno Kristo.

⁹ Ompöwölo mi asïl pö Tororöt kïmïkul orito por pö Kristo ompö otöptanyi nyo pö ptangengmöt

¹⁰ akikekonokwa söpon kïmïkul otini kyolinyekwa nko nyinte. Wow nyinte ompö pöytoghi mïkulis löwïr nko yetïntin lapay.

¹¹ Atanya kyolinyekwa nko Kristo alïkukwa pich cho kikemut amelö mutata por nyo kïpöghisyegho rotwö, wölo nyo mutöy nyinte otini kamutïta otöptonkwa nyo pö ngokï, anyorï kityakat.

¹² Ompöwölo kikïtïpokwa nko Kristo otini kikipatisanakwa! Akwompö kipatisanatanoni, kyotutukwa nko Kristo ompöwölo kyaghanakwa owesyo Tororöt nyo kigh nyinte kututunö ngwen.

¹³ Kyochikwa pich cho kimeghö ato kile tagh ompö ngokikwa ompöwölo kyochikwa pipö punton cho kimelö kitïng kirurut, pö Tororöt, wölo keghakwa Tororöt ye onyoru söpon nko Kristo. Kilöstowecha Tororöt ngokicho löwïr,

¹⁴ akïngongoghta ghosyö nyo kirwokyinecha lö kikelelacha. Kiwonyö choni lö döng otini kiwudochï nyinte kimurtöwon.

¹⁵ Akwompö kimurtöwontononi, kirïnta Kristo owesyo pöytoghi mïkulis nko wowïn anka tïkwïl akutö chane arasï ompö tawu pich otini kisara kariko lïk akuretö chane le ratan ompö rïntaghtanyi.

¹⁶ Kïlenyona makany kurwokwok chi ompö kïgh nyo kyomöy anta ompö nyo kïgheghöy anta ompö Ichon pö Relïn pö Arawa anta ompö ichontin walaka anta ompö asispa Sapato.*

¹⁷ Tontögh pat ngala cho lata choni nyo pö ngal cho tökïpkonöy, wölo ompö choni löwïr Kristo onkït nyo le man.

¹⁸ Makany kurwokwok chi anka tïkwïl nyo ipöy kegh yïm, tya lö ompöwölo könyorï nyinte sïwïyagh nyo sis akïmi kïsïngo wölo kiptoy kegh ngwïny ompö lïs. Lenchini pich asagha malayken. Syolöy kegh chichoni kwïle ompö kinonutkachi cho pö ptangengmöt.

¹⁹ Pesyote chi nyo lata nyoni nko Kristo nyini le mötïto poroni. Ato Kristo nyo pöyu, kï paghate portö kïmïkul, por nyo chïchimate ompöwölo nömöy kegh tikit nko ngichaye lasiny akïmi kïnöröy le wölini kömöktöy Tororöt.

Kemeghyö akemöngisyö nko Kristo

²⁰ Ato kyomeghekwa nko Kristo aketyakenakwa paytaghpa mïkulis cho mi wölnö le mïröt, kwompö ne tomöngisyenökwa le ato tochikwa pipö ngwïnyinï? Akwompö ne torïpekwa kirurutchay lentöy,

²¹ “Manam kïyï,” nko “Machamcham kïyara,” anta “Maswany kïyinö.”

²² Pö ngalechoni lapay tïkwïn cho wïryot lawel otini kökïpöghisyeghö. Pkono kinetuchoni ptangengmöt pat.

²³ Muköy kïlenchï chi kegh pö le cho tïng ngöghomnyö kinetutchoni otini sïlumönchini kegh saghata malayken nko tölosyö nyo pö lïs nko pïröt nyo pö por ompö ngwonïn, wölo nyo pö nyoman memuköcha kïmir pïrchinogh pö por nyonikïny.