KIYITUT 8 - PIPÏLIA

¹ Kïlenchï ECHOTYON Musa,

² “Lenchinö Aron, ato inoghenyi tatïnechay le mut nko odeny ompö ketay kikönoghöy kitömöwo, ikany kïlöpochï okumpö tagh nyo pö ket pö kitömöwon.”

³ Kwigh Aron lenyini, kutö tatïnechay ketay kikönoghöy kitömöw okumpö tagh lenyini kimwochï ECHOTYON Musa.

⁴ Kikigha ket pö kitömöw koltin kïngeta ngwïny ntökwit parak, kïrïp kegh lenyini kiporchï ECHOTYON Musa.

Kitïlilöt nko kitötogh pö pipö Lawi

⁵ Kïlenchï ECHOTYON Musa,

⁶ “Kïla pipö Lawi ompö kwenu pipö Israel, aitïlil chane.

⁷ Ighenyi le nyï atetïlilö chane: Isonyi chane pögho kitïlilöt aimwochï kïrwak porwoyikwa kïmïkul akuwun sïrokökwa akutïlil kegh.

⁸ Atolapay ikany kicheng chane ngaryan nko ropöwo pagh cho le pïsya cho kikinyoryö nko mwaghpa orolwö aicheng edö anka kïpöyit ropöwonto ngokï.

⁹ Atolapay ituyö pipö Israel löwïr aikany kughyongö pipö Lawi tawu Ema nyo mi ECHOTYON.*

¹⁰ Könoghöy nyu pipö Israel morikwa mötöwöyi pipö Lawi otini kekanyanyi kughyongo chane tawu pipö Israel,

¹¹ atolapay kïkonanïn nyu Aron pipö Lawi le ropöwon nyo pö Israel atökïpöghisyeghwanïn chane.

¹² Könoghöy nyu pipö Lawi morikwa paraku mötöwöyi eghinechay. Lïku akong ropöwonto ngokï, kïlïkwï anka amöros nyo kïpelöy ompö ECHOTYON, atökïpöyit kitïlilöt nyo pö pipö Lawi.

¹³ Ighenyi nyu pipö Lawi kipöghisyechi Aron nko werkachi, akïlïku chane ropöwon nyo kiwiswisöy ompö ECHOTYON.

¹⁴ “Ikïlenyi nyu lenyoni pipö Lawi ompö kwenu pipö Israel atökïlïkwï chichan.

¹⁵ Otini ketïlilönyi pipö Lawi le ropöwon nyo kiwiswisöy kumï nyu chane kwigh ighisyö ompö Ema nyo mi ECHOTYON.

¹⁶ Chichan chane, le ato kötö ochengan poretayi pipö Israel löwïr,

¹⁷ kïngeta atanye kyaparan poretayi pipö Misri akïlan chane kïlïkwï chichan,

¹⁸ wölo kachengan ye pipö Lawi le ato kötö ochengan poretayi pipö Israel löwïr.

¹⁹ Akoropchan Aron nko werkachi pipö Lawi ompö kwenu pipö Israel atökïpöghisyechï pipö Israel ompö Ema nyo mi ECHOTYON, atökïlïkwï kinyoryogh ompö pipö Israel, tömökïpar chane ato töp ntökïrikyï wölay Tïlil.”

²⁰ Kutötö nyu Musa nko Aron nko pipö Israel löwïr, pipö Lawi lenyini kimwochï ECHOTYON Musa.

²¹ Kutïlil nyu kegh pipö Lawi ompö akuwun sïrokökwa, kutötö nyu Aron chane le ropöwon nyo kiwiswisöy ompö tawu ECHOTYON akutïlil chane.

²² Kwigh pich lenyini kimwochï ECHOTYON Musa ompö paraku pipö Lawi. Kïpa nyu pipö Lawi kwigh ighisyö ompö Ema nyo mi ECHOTYON akughyongchï Aron nko werkachi.

²³ Kïlenchï ECHOTYON Musa,

²⁴ “Achï ngal cho mïchini pipö Lawi: pöghisïyi ompö Ema nyo mi ECHOTYON chi nyo tïng könyis 25 kutok.

²⁵ Kipïstoy ighisyo nyo kakwit könyis tömönut mut kï köpïstö ighisyö.

²⁶ Wölo ngöroköy werkökwa ompö Ema nyo mi ECHOTYON kipöghisyö lasiny. Wölo melö pöghisïyi chane. Lenye nyete wölo ightoy pipö Lawi ighisyengwa.”