KIYITUT 5 - PIPÏLIA

¹ Kïlenchï ECHOTYON Musa,

² “Mwochinö pipö Israel kïyona chi anka tïkwïl möngengwa nyo kanam psenkwet nko chi anka tïkwïl pkono pïrutït nko chi nyo kalïkwï sïmnyon atonam mïntïrïch.

³ Oyonekwa mïrön nko kor kïngeta möngot atömesïmnyon möngot wölo omitan nko piköchan.”

⁴ Kwigh pipö Israel lenyini kimwochï ECHOTYON Musa.

Ghaktagh pö lelut

⁵ Atolapay kïlenchï ECHOTYON Musa,

⁶ “Mwochinö pipö Israel lö, ato igh chi ngokï cho ighöy pich tökunyar kighanatengwa ompö ECHOTYON, akinam nyinte ngala,

⁷ kïmïchini kïnganyta ngokichi akïghakta kïmïchï akïtösyï kareranpa tömönut odeny chichini keghchï nyo gha.

⁸ Wölo ato kima chichay amötïngetinye tïlyenyi nyo lekït nyo kïghokyini, ketöni ECHOTYON kïpöyit tïsin, kïmi nko makal nyo kitïlilo chi nyo kegh ghöyityö.

⁹ Lïku chechi tïkwïl ropöw walaka nko tïkwïn cho tïlilöch cho ipchini nyinte pipö Israel le ropöwo ECHOTYON.

¹⁰ Akï kïgh anka tïkwïl nyo tïlil kï nyenyi, akï kïgh anka tïkwïl nyo töni chi tïsin, kïlïku nyenyi.”

Kirwoko kor cho kïngomchini tïlata kasar

¹¹ Atolapay kïlenchï ECHOTYON Musa,

¹² “Mwochinö pipö Israel lö, ato tïl koko chi kasar,

¹³ amasïwanye pontenyi, ompöwölo kegh ompö wïngat amöminye chi nyo kasïwa,

¹⁴ anta ngomchï chi karkenyi kïrökegh melö kegh kïgh nyo gha,

¹⁵ kumïtöy chichoni korkenyi wölo mi tïsin. Ipöy nyinte kilo akonga cho pö pïsya matay cho pö ropöw, ametöninye mwaghpa orolwö anta tïkwïn cho ngutoy, ompöwölo ropöwo chi nyo köngomchï, akïmököy kwipu man wölo löpoyïn.

¹⁶ “Mïtu nyu Tïsin kokonini akïkany kughyongö tawu ECHOTYON.

¹⁷ Atolapay kïcheng Tïsin pögh cho tïlilöch ompö tïwan nyo kikigha nyïngwïtyan akïchenga terïtyon Ema nyo mi ECHOTYON* akutö pöghechay.

¹⁸ Mïtu nyu tïsin kokanay tawu ECHOTYON akutyak pute akutö morichi ropöwo pagh cho pö kinonchin, choni kï ropöwo pagh cho pö sastagh. Nömöy nyu tïsin tïwananay mi pögh cho ngwonöch cho ipu chïpöt.

¹⁹ Ighöy nyu Tïsin kokonay kwam muma akïlenchï, ‘Atometïlanyinye kasar ato kitemitenönyi nko pontengu, kï melö nyorunyi chïpötonï pö pöghechï ngwonöch.

²⁰ Wölo ato kitïlanyi kasar ateritenö nko pontengu, aisïmnyon kegh,

²¹ ikany kïchïp ECHOTYON kaynengu ompö kwenu pikökwa.

²² Nya kïpa pöghechï ipu chïpöt muyengu akï kutun mu akïnïnö kïpesöyiku.’ Ghönöy nyu kokonay kïlentöy, ‘Amen, amen.’*

²³ “Kirchini nyu Tïsin chïputchï kitapï, akuwunchï kikirutkö tïwananay mi pögh cho ngwonöch,

²⁴ kïtomö kïgha kokonay pöghechay pö ngwonïn ipu chipo. Nyini kipa pöghechay kwipï ngwonïn.

²⁵ Chengöy nyu Tïsin ropöwechay pö pagh mi mori kokonay, akuwiswisö tawu ECHOTYON akwip kutang ato kïpelo amöros.

²⁶ Atolapay kïram tïsin cho pö römut kïlïkwï ropöwo pagh akïpel ompö ato kïpelo amöros, atolapay kutö kokonay pöghechay kïgha.

²⁷ Otini kikïgha kokonay pöghechay, akökikïtïl kasar, kutöni pöghechay nyinte ngwonïn, akïkutï mu akïnïnö kïpesöy akïchïpö nyinte ompö kwenu pikökwa.

²⁸ Wölo atomelö kitïl kokononi kasar kïmomönye kïgh nyinte akumuköy nyu kïsïkisyö.

^29-30 Lïku nyï kirurut nyo pö sastagh, atongomchï chi korkenyi lö katïl kasar. Kimïtu kokononi kughyongö tawu ato kïpelo amöros, atolapay kurwokyï tïsin nyinte ompö kirurutyonï.

³¹ Melö pöyitu ponte lelutyö, wölo korketö nyo pöyitu ghöyitye.”