KIRWOKÏ 9 - PIPÏLIA

¹ Kïwö wero Apimelek, wero Kidyon kutang kanasyanta Syekem ka mamatanyi akïlenchï chane nko pikökwa löwïr cho pö areto ompö kame,

² “Otepunö pipö Syekem löwïr lö, ‘Nyono nyo karam ompö akwa, kepïsyï werpö Kidyon löwïr cho le 70 kïpaytekwa, anta kepïsyï chi akonga onkït?’ Amowutyeghö lö kyangwïnan koyekwa nko kisönkökwa.”

³ Kïmwochï mamatina Apimelek pipö Syekem ngalechoni löwïr, kïcham pïchay kïrïp Apimelek, ompöwölo kilö, “Kïtupchecha nko nyinte.”

⁴ Kutö pïchoni nyinte ropïyeni silpa cho le 70 ompö kö pö Paal Muma nyo pö saghat, atolapay kïpöghisyeghö Apimelek ropïyenichay kukira pich cho le wowes nko pkatis cho kirïp nyinte.

⁵ Kïwö kato kwanta nyo kimi Opra akïpörchï werkökwa löwïr ghat akonga. Choni kï werpö Kidyon cho le 70. Wölo kïngötï Yotam wero Kidyon nyo mïnïng ompöwölo kiwïny kegh.

⁶ Kïpka nyu pipö Syekem löwïr nko pipö Pet Milo, akïpa kwigh Apimelek pöytoghin ompö ato kilekïtö ket nyo tïlil nyo kimi Syekem.

⁷ Otini kikïmwochï Yotam ngalechoni, kïwö kïpus kutïng pö Kerisim akïngalan ompö kut nyo wow lö, “Atera ngalechan, akwa pipö Syekem, atö kïter Tororöt ngalekwa.

⁸ Kimi asistanka ketï cho kimököy kïkïl pöytoghintengwa. Kïlenchï ket pö orolwö, ‘Lïkuna pöytoghintencha.’

⁹ “Wölo kuyokyï orolwonay lö, ‘Melö opïstonan mwadanyu nyay kïkonyïto tororötin nko pich awan apayta ket?’

¹⁰ “Kïpa ketichay kïlenchï moköngwö, ‘Nyonö, lïkuna pöytoghintencha!’

¹¹ “Wölo kuyokyï moköngwonay lö, ‘Melö opïstonan oyinöy makanykachu cho karamach awan apayta ket?’

¹² “Kïpa ketichay kïlenchï ket pö sapipïyon, ‘Nyonö, lïkuna pöytoghintencha.’

¹³ “Wölo kuyokyï sapipïyontonay lö, ‘Melö opïstonan dipaykachu* cho ighöy tororötin nko pich kïngörekyot awan apayta paraku ket?’

¹⁴ “Ato mi söröm, kïpa ketichay löwïr akïlenchï ket pö kato, ‘Nyonö, lïkuna pöytoghintencha.’

¹⁵ Kïlenchï ketay pö kato ketichay, ‘Ato omökekwa nyo nyoman oyilanïn alïkwan pöytoghintenkwa, apkan owurö rurwenyan, wölo atomölenye nyona, nya kungwïna ma ket pö kato akïpel tarakitpa Lepanon!’ ”

¹⁶ Kïlenyona kïtep Yotam pïchay lö, “Kyaghakwa so man otini kyakïlakwa Apimelek kïlïkwï pöytoghin? Olentekwa so kikighchï Kidyon nyo karam nko konyi, kïrïp kegh nko tïkwïn cho kiwongunö nyinte ompö akwa?

¹⁷ Amowutyeghö lö kiporyewokwa paponyan. Kiwisï nyinte söpontanyi ket atö kïsörunenokwa mori pipö Midyan.

¹⁸ Wölo kopechikwa asisete owöghökisyö apar piko paponyan. Kopörchikwa werkachi cho le 70 ghat akonga, atö Apimelek nyo le kighosan kïpayta pipö Syekem, ompöwölo werïnkwa nyinte.

¹⁹ Kïlenyona, ato olentekwa kakighchï Kidyon nko konyi man, ongörekyö ompö Apimelek akany kïngarak nyinte tïkwïl ompö akwa!

²⁰ Wölo ato melö lenye nyoni, olentan tengwïna ma Apimelek akuwanyekwa pipö Syekem nko Pet Milo lömïs. Alentan tengwïna ma pipö Syekem nko pipö Pet Milo akïpel Apimelek!”

²¹ Atolapay kurïp Yotam akïwö kïwïnya kegh kanasyanta Peer akïmang wöloni, ompöwölo kiwagh werïngwa Apimelek.

²² Kïpayta Apimelek Israel könyis sömök.

²³ Kïyonta Tororöt mïkulögh nyo le sïmnyon kuwulyö Apimelek nko pipö Syekem. Kimökughancha pïchay ngat Apimelek.

²⁴ Kigh Tororöt lenyoni atö ketaka kisön pö werpö Kidyon chanya le 70 Apimelek nko pipö Syekem cho kingarak nyinte kïpar werkökwa.

²⁵ Kutö pipö Syekem pich kusyep Apimelek ompö komos parak akïsara chi anka tïkwïl nyo kiweröy wölini tïkwïn. Kemwochï Apimelek ngalechoni.

²⁶ Atolapay kïwuchï Kaal wero Eped Syekem nko werkökwa, kughan pipö Syekem nyinte.

²⁷ Kïpa chane löwïr parenikwa cho pö sapipun akïpït akwe akïpït kïlïkwï dipay akwigh omisyö nyo wow, atolapay kïpa kïlïtöy kö pö tororötïngwa, kwomisyö akïgheghsyö akïchïp Apimelek.

²⁸ Atolapay kïlö Kaal wero Eped, “Kamecha ne nya pipö Syekem? Ompö ne tökïpöytonecha Apimelek? Lentöy nyinte ochï ngo? Melö so kötö wero Kidyon nko ripintenyi Sepul cho köpöghisyechini Amor nyo kitor Syekem? Melö mïchini kïpaytecha Apimelek.

²⁹ Ntökontöghoghchinan pïchï kötö oyonan Apimelek! Kolenchan Apimelek, ‘Tasa piköku pö lïk, aingwïn keporyenö!’ ”

³⁰ Kïnarek Sepul nyo kiwowö kanasyantanoni otini kilïm ngalechoni kimwoghöy Kaal.

³¹ Kïyonta pich sison kïpa wölo mi Apimelek ompö Aruma kïmwochï lö, “Kengwïn Kaal wero Eped Syekem nko werkökwa akï kïnkïn pich cho mi kanasyantanï.

³² Nyo karam nyonö nko piköku oghö asyepisyö ompö paren.

³³ Otini kapusï asis, apkan apokyï kanasyantanï. Kïkany atopkonchokwa ompö Kaal nko pikachi, oporyeghö kïgh anka tïkwïl nyo mi morikwa.”

³⁴ Kïnget Apimelek oghö nko pikachi löwïr cho kimi nko nyinte, akïpa kusyepisyeghö sanypa Syekem ompö söpïchis angwan.

³⁵ Kïwö Kaal weray pö Eped, akughyongö wölo le kuka kanasyan. Nyini kisïwa Apimelek kïngetunö nko pikachi wölaye kesyepisyegho.

³⁶ Nyini kisïwa Kaal pïchay, kïlenchï Sepul, “Rose köny! Achinö pich rökuno kutïng!” Kuyokyï Sepul lö, “Kelelteghenyi rurwonoy pö kutïngkot pich.”

³⁷ Wölo kïlö Kaal ngat, “Rose köny! Achara pich rökuno kutïng, kungwïno söpïchtö anka okumpö ket nyo tïlil nyo kïngorsyegho.”

³⁸ Atolapay kïlenchï Sepul nyinte, “Kunko ye nyu ngaleku chay kilentenyi, ‘Lentöy Apimelek ochï ngo, tökïpöytonecha?’ Achï nyu pïchay kisösenyi, wïyö nyu poryenö nko chane.”

³⁹ Kïnap kegh Kaal akïwö kuntöghoghchï pipö Syekem akïporyö nko Apimelek.

⁴⁰ Kïyon Apimelek Kaal akïparata cho chang kïlïkwï kot ntökwit kuka kanasyan.

⁴¹ Kïmang Apimelek Aruma, kïyon Sepul Kaal nko werkökwa kïwuwö Syekem, amelö kitökïmang wöloni ngat.

⁴² Nyini kwitïta asisto odeny, kïpa pipö Syekem wölo le paren, kemwochï Apimelek.

⁴³ Kïlenyona kumït pikachi akïchagh kïlïkwï söpïchis sömök atö kusyepisyö ompö paren. Kïlö otopöntö kïsïwa pich cho kipkono kanasyan, kïngetunö wölaye kiwïnyo kegh atö kepar chane.

⁴⁴ Kïwö Apimelek panini nko söpïchtö anka kusyepisyö ompö kuka kanasyan, kïpa söpïchtine walaka chay le odeny kïporyeghö pich cho kimi paren akïpar chane.

⁴⁵ Kïporyeghö Apimelek kanasyantanoni asisoni kwimön. Ato mi löt kïnam kanasyantanay, akïpar pich cho kimi ori löwïr. Kunyar kanasyantanay akuserserchï partin atö mökïpita kïgh.

⁴⁶ Nyini kilïm ngalechoni pich löwïr cho kimi Mikdal Syekem kïpa kïghïpcheghö kö pö Paal Muma wölo tïghume.

⁴⁷ Kemwochï Apimelek lö kituyeghö pïchay wölini.

⁴⁸ Kïlenyona, kïwö nko pikachi kïpusta kutïng pö Salmon akïtörö oywö sökö akwipö pugh, akïmwochï pikachi cho kimi tïkwïl lö, “Agha le nyete kaghan!”

⁴⁹ Kïtör nyu pïchay löwïr sökö akïrïp Apimelek kutö wölay mi pïchay akïpel. Kuwany ma pich löwïr cho kimi Mikdal Syekem. Kingata chane pich 1,000 mïrön nko kor.

⁵⁰ Atolapay kïwö Apimelek kutang Tepes, akutö pich kuwit kanasyantanay akïnam.

⁵¹ Kimi pchörï nyo anger nyo kikïripsyegho nyo kïryoghchï pipö kanasyantanoni löwïr mïrön nko kor, kïmi nko kintöghoghikwa tïkwïl, akïkörchï kegh ori akïpusta pchöri wölo le parak.

⁵² Otini kit Apimelek pchörinay kïripsyegho, kïwö kïrich kuka pchörinay atö kïpel.

⁵³ Wölo kuchunï korka koghpa pagh nyo kïwir mötïnyi kïkarera.

⁵⁴ Kïkur karöchïnin nyo kipchini nyinte kari lïk akïlenchï, “Ngwïsuna chokengu aiparanïn, atö mötöp ntökïmwa pich lö, ‘Kipar korka Apimelek.’ ” Kïpar Apimelek.

⁵⁵ Otini kïsïwa pipö Israel lö kima Apimelek, kïmïla chi anka tïkwïl katanyi.

⁵⁶ Kighokyï nyu Tororöt Apimelek ghöyityenyi lenyoni nyo kighchï paponyi otini kipar werkökwa cho le 70.

⁵⁷ Kigh Tororöt ngat pipö Syekem kuwongwï ompö ghöyityengwa. Kingwïnchï chane chïpöto Yotam wero Kidyon nyo kichïpisyö.