KIRWOKÏ 7 - PIPÏLIA

¹ Kïnget Kidyon asistanka kiwasan nko pich cho kimi nko nyinte kïpa kïwudochï emenikwa atolekïtö kö pö pögh nyo pö Arod. Kimi möngo Midyan mpöghogh atolekïtö kutïng pö More wölo le okumpö löt ompö möngo Kidyon.

² Kïlenchï ECHOTYON Kidyon, “Chang tya pïchï imitenyi tïkwïl nyo mochömanye otöni chane kïrïnta pipö Midyan, atö mökwol egh pipö Israel asïyech lö, ‘Kakïsörï kegh.’

³ Mwatïtena nyu kïlïm pich löwïr lö, ‘Chi anka tïkwïl nyo nyakor akïpotönöy, kïmïlegha kutïngï pö Kiliad akïwö kutang katanyi.’ ” Kïlenyona kïmïlonchö kestonikwa pich cho le 22,000, kïngotï cho le 10,000.

⁴ Atolapay kïlenchï ECHOTYON Kidyon, “Tökï chang tya pïchï imitenyi tïkwïl. Wïyö nko chane wölo mi pögh atotörunyi chane ompö atoni. Ato omwowunyi lö, ‘Wetöy chichï nko nyi,’ kïwetöy. Kïkany ato atagheninyi, kïmöwetönye.”

⁵ Kumït Kidyon pïchay wölo mi pögh, kurur ECHOTYON nyinte lö, “Pesyenö chi anka tïkwïl nyo gheghöy pögh kulyöpöy le kukïy, aipesyö chi anka tïkwïl nyo kïtïngöy atö kïgha pögh.”

⁶ Akwotini kikiyit pich cho kirama pögh ewunekwa akulyap, kïlïkwï 300. Wölo kïkïtïng pikö walaka löwïr otini kigheghöy pögh.

⁷ Kïlenchï ECHOTYON Kidyon, “Osörwokwa ompö pïchoni le 300 cho kagha pögh kulyöpöy, atöninan moriku pipö Midyan yodena nyu pïchona walaka löwïr kïmïlisyö kestonikwa.”

⁸ Kïchenga nyu Kidyon pïchay omisyewutkökwa nko kontinekwa akuyoda chane löwïr kïmïlisyö kestonikwa. Poto pïchay le 300 cho kingötï. Kimito möngo pipö Midyan mpöghoghye wölo porö ompö atoni kimi chane.

⁹ Kïmwochï ECHOTYON Kidyon oghononi lö, “Ngeta, airöytö ateporyeghenö chane ompö möngengwa, ompöwölo kyokoninyi rïntagh.

¹⁰ Wölo ato iwöghenyi poryeghone inyagh iwö nko mötworintengu Pura

¹¹ atelïma kïgh nyo mwoghöy chane, atesïkö owesyö nyo iporyegho möngononi.” Kïröytö nyu Kidyon wölini le möngot nko mötworintenyi Pura ntökwit sörömu pipö lïk cho kimi möngononi.

¹² Kimi wöloni le mpöghogh pipö Midyan nko cho pö Amalek nko pïchoni pö okumpö kongasis. Ki chang chane le talam, akitïng tamasay cho chang le ngayam cho mi nanam.

¹³ Nyini kitïta Kidyon, kïlïm chi nyo kyomchini kongenyi kirwotïtoghtanyi. Kimi kïlentöy, “Korwotïtan lö, kötörenchï makatyanta matay möngo pipö Midyan akïwir ema. Kïrul lö wanka.”

¹⁴ Kuyokyï kongenyi lö, “Choko Kidyon wero Yoas nyoni, chichay pö Israel nyo mötïny! Kikutö Tororöt morichi pipö Midyan nko pipö lïk kïmïkul.”

¹⁵ Nyini kilïm Kidyon kirwotïtogh pö chichoni nko kïgh nyo kiporu, kïsagh Tororöt, akïmïla wölaye le möngo Israel akïlenchï pïchay pö lïk, “Ongetyenö! Kikonokwa ECHOTYON owesyö nyo orïntegho pipö Midyan!”

¹⁶ Kïtat pïchay le 300 kïlïkwï woptin sömök, atolapay kutö chane kontin kïnama ewunekwa akutö chane tören cho melö kimi kïgh ori, kïpoto kitömöw.

¹⁷ Kïlenchï pïchay, “Arosanïn, nyini katïtan sörömu möngot agh lenyini oghan.

¹⁸ Ato akutan kontï nko söpïchtönyan, akut lenyoni tïkwïl kuwit mönge kïmïkul, atolapay oteghyö lö, ‘Pö ECHOTYON akï pö Kidyon!’ ”

¹⁹ Kïkany kwitïta Kidyon nko pïchay le 100 kimi nko nyinte sörömu möngot kwen, otini kikïwaghach kegh ripï, kïkut kontinekwa akïtïgh törenichay kötïng chane.

²⁰ Kïpechï söpïchtinechay walaka tïkwïl kïkut kontinekwa akïtïgh törenikwa. Kinömo ewunekwa cho pö löt kitömöw akïnömo kontine ewunekwa cho pö tagh akuteghyö lö, “Choko ECHOTYON nko Kidyon!”

²¹ Kughyö chi anka tïkwïl ompö pïchay kiwit möngonay kïmïkul. Kupertoy pïchay pö Midyan akïmi kuteghyotoy.

²² Akwotini kipechï kïkut kontinechay le 300, kwigh ECHOTYON chane kïpar kegh. Kupertoy chane ntökwit Pet Syita wölnö pörtoy Serera, ntökwit kanasyanta Apel Meola, wölo lekïto Tapat.

²³ Atolapay kekurï pipö Israel cho kimöngöy koro Naptali nko Asyer nko Manase tïkwïl kïpa kïyonota pïchay pö Midyan,

²⁴ akïyonta Kidyon pich kïpusta komoswo Epraim, akïlenchï, “Orökunö atoporyeghenö pipö Midyan, anyagh tagh osyep ompö lalwa Yordan nko akodetiskachi ntökwit champilwoy pö Petpera.” Kïlenyona kïtuyö tïkwïl pipö Epraim akïcheng kore ntökwit Petpera nko lalwa Yordan.

²⁵ Kïnam wowïntino lïko Midyan cho le odeny, Sinay nko Seep. Kikïpara Sinay ghatya Sinay, akepara Seep ato kïpïro sapipun ompö Seep, akïrïpata nyu pïchay pö Midyan akwipchï Kidyon möt pö Sinay nko nyo pö Seep ompö lalwa Yordan antakwagh.