KIRWOKÏ 6 - PIPÏLIA

¹ Kwigh pipö Israel ngokï ngat ompö tawu ECHOTYON, kutö ECHOTYON chane mori pipö Midyan könyis mut nko odeny.

² Kïpar pipö Midyan pipö Israel tya, kïlenyona kïyörchï kegh pipö Israel köpönot nko wölo ghïpate ompö komos.

³ Otini kikötköt pipö Israel parenikwa, kïpusta pipö Midyan wölini nko pipö Amalek nko pich cho kimöngöy okumpö kongasis akïporyö nko chane.

⁴ Kimang chane par akunyar pagh cho kirïrö korononi ntökwit atolekïtö kanasyanta Kasa. Melö kitukyï pipö Israel omisyewut anta kechir nko tïch nko sïkïröy.

⁵ Kipka chane nko twakwa nko emenikwa, kïtuwit le talamnya ompö chongïn, kimemuchönye chi ntökuyit pïchoni nko tamasayikwa. Kïtïkatïk chane kore kunyara.

⁶ Kïlïkwï chane mey akwompö pipö Midyan. Kïlenyona kïrirchï pipö Israel ECHOTYON kungarak chane.

⁷ Otini kilokyï pipö Israel ECHOTYON ompö pipö Midyan,

⁸ kuyokyï ECHOTYON pipö Israel werkoyon nyo kimwochï chane lö, “Lentöy ECHOTYON, Tororöt pö Israel, ‘Kyamïtwakwa apkanena Misri koro mötwornön,

⁹ asörunenokwa mori pipö Misri nko punton löwïr cho kipïrokwa, ayonan chane tawunkwa, akonokwa korengwa,

¹⁰ omwowokwa lö, “Ochan ECHOTYON Tororötïnkwa, masagh tororötino pipö Amori cho omöngekwa korengwa.” Wölo kyapenyakwa ngalechan.’ ”

¹¹ Kungwïn nyu malaykayanta ECHOTYON akïtöpö ket ghït nyo tïlil nyo pö Yoas nyo kipö ara Apieser ompö Opra akimi werïnyi Kidyon kïkötöy nkanun ompö ato kïpïro kinyero sapipun, atö kïwïnya nkanunechoni pipö Midyan.

¹² Kuchumchï nyinte malaykayanta ECHOTYON akïlenchï, “Mi ECHOTYON nko nyi, ompöwölo ichinyi chi pö lïk nyo awes.”

¹³ Kuyokyï Kidyon lö, “Kïkany ato mi ECHOTYON nko acha, kï kölö ne tökïpkonchecha ngala cho lata chï? Akipa onö ighisyewutkachi löwïr cho pö töngönchin cho kimwoghöy papotïnecha lö, ‘ECHOTYON nyo kimïtunenecha koro Misri.’ Kunko ye nyu akwanyï köpïstecha ECHOTYON akutönecha mori pipö Midyan.”

¹⁴ Wölo kïmwochï ECHOTYON lö, “Wïyö ompö owesyonete itïngetenyi atesörunenö pipö Israel mori pipö Midyan, ani nyo oyokteninyi.”

¹⁵ Kuyokyï Kidyon lö, “We Echotyon, osörunan pipö Israel lö ne? Akwanyï nyarkalal koncha ompö ara Manase, akwani nyo ochï mïnïng tya ompö koncha.”

¹⁶ Kuyokyï ECHOTYON lö, “Omitan nko nyi, ipörenyi pipö Midyan le ato chi akonga.”

¹⁷ Kïlenchï, “Ato konyorwan pöropchö ompö tawungu, iporwanïn kïgh nyo poru lö nyi ECHOTYON, nyete ingölonöy nko ani.

¹⁸ Asoghinyi lö meweghö yete ntökïtenö amïlan opunyi ropöw.” Kïlö, “Owöy, otöponan ntökïtenö mïlenanyi.”

¹⁹ Kïlenyona kïwö Kidyon konyi, akïyeng wawa aran, akwigh makatin cho puryö mumar cho pö pïsya cho ngata kilen taman. Kutö panye köröp akuyin sute töwït akwipchï malaykayantanay pö ECHOTYON ompö ketay tïlil ghït.

²⁰ Kïlenchï malaykayantanay nyinte, “Chengunö panye nko makatinechoni cho puryö mumar aitö ghatyanï, aimïlchï sute parak.” Kwigh Kidyon lenyoni.

²¹ Atolapay kïswanga malaykayanta ECHOTYON panyecha makatine lïkïp nyo kitïng. Kungwïna ma ghatyanay, panini akïpel panyechay nko makatinechay cho puryö mumar. Atolapay kupot lö weng malaykayantanay pö ECHOTYON.

²² Kunkïtï nyu Kidyon lö kichï malaykayanta ECHOTYON nyini kingölonöy nko nyinte, kïlö, “Heywey! Echotyon TORORÖT! Kasïwan ye malaykayanta ECHOTYON lötok.”

²³ Wölo kïlenchï ECHOTYON nyinte, “Pöghisyö. Mewöghisyö, melö imeghenyi.”

²⁴ Kïtekyï Kidyon ECHOTYON ato kïpelo amöros, akïkurö atoni, “ECHOTYON kï kalya,” akï kaynatenyi nyoni nko nyete le ye ompö wölini le Opra nyo pö pipö ara Apieser.

²⁵ Kïlenchï ECHOTYON nyinte oghononi, “Kata kïrkïto papongu nyo pö odeny nyo pö könyis mut nko odeny, aiwö irul ato kipelo papongu amörostino Paal,* aitör Asyera* nyo lekïto atoni.

²⁶ Atolapay itek ato kïpelo amöros ompö ECHOTYON Tororötïngu ato sïtote, aitat koghi lasiny, atolapay ikat kïrkïyay, aitötö kïlïkwï ropöwon aipela kwenchay pö Asyera, ketörönyi.”

²⁷ Kïlenyona kïwö Kidyon nko pich taman ompö mötworichi akwigh kïrïp lenyini kimwochï ECHOTYON. Wölo ompöwölo kiwagh nyinte piko katangwa nko kanasyan, kïtagh kwigh ighisyononi ato le pöghet, wölo kwigh oghö.

²⁸ Kïkany otini kinget pïchay pö kanasyantanay kiwasan, kïlö kiros kikïrul ato kïpelo amöroso Paal, aketörotör Asyera nyo kimi atolekïtö atoni akïpela kïrkïyay ato kïpelo amöros nyo kitek chane atoni.

²⁹ Kïteptep kegh lö, “Akï ngo nyï kegh kïyï?” Kïkït ntökunkïtï lö, Kidyon wero Yoas nyoni kigh.

³⁰ Kïlenchï pïchay pö kanasyantanay Yoas, “Mïtune werïngu kungwïn yi, atö keparacha, ompöwölo kerul ato kïpelo amörostino Paal akïwechï kïtörotör Asyera nyo kilekïtö atoni.”

³¹ Wölo kïlenchï Yoas pïchay kimölöy kegh tïkwïl, “Osöröpunekwa so Paal? Anta omukekwa oghete nyinte? Chi anka tïkwïl nyo söröpu nyinte kïmïchini kepar ato teno yeköy. Ato lentöy Paal ochï tororöt, kïne maghet kegh, ompöwölo kakirultö ato kïpelo amörosechi.”

³² Kïlenyona kekurö Kidyon asisoni, “Yerupaal,” ompöwölo kilö Yoas, “Akanya kïghet kegh Paal, ompöwölo kerultö Kidyon ato kïpelo amörosechi.”

³³ Atolapay kïghamït kegh pipö Midyan nko cho pö Amalek nko pich cho kimöngöy okumpö kongasis, kwoghyö lalwa Yordan akïwudö emenikwa ompö mpöghoghyo Yesrel.

³⁴ Wölo kungwïnchï Mïkulöwu ECHOTYON Kidyon, kïkut kontï akïkur pipö ara Apieser kïrïp nyinte.

³⁵ Kïyonta kut kïghömï koro Manase kïmïkul, kïghamït kegh chane tïkwïl akïnap kegh kïrïp nyinte. Kïyonchï kut kïpa pipö Asyer nko Saplon nko Naptali, kïpa kïghömï nko chane.

³⁶ Atolapay kïlenchï Kidyon Tororöt, “Ato ipöghisyeghenaninyi isörï Israel lenyini kemwanyi,

³⁷ iros nyu lö otöninan sïra kech ghatya pagh. Ato nam röyöntö sïranoni onkït, akïtïyame ngwïnya kïmïkul, onkïtunan nyu lö ipöghisyeghenaninyi isöru Israel lenyini kemwanyi.”

³⁸ Kwigh lenyoni. Otini kinget tökwoghö, kuryan sïranay kïpkana pögho röyön cho kinyïghï tïwan.

³⁹ Atolapay kïlenchï Kidyon Tororöt ngat, “Menörekyante. Pïswante angalan nyo pö akanya. Kanya nyu ye kïyam sïre onkït, wölo ikany kulum röyöntö ngwïnye kïmïkul.”

⁴⁰ Kwigh Tororöt lenyoni oghononi. Kitïyame sïranay onkït, wölo kulum röyöntö kore kïmïkul.