KIRWOKÏ 5 - PIPÏLIA

¹ Kïtum asisoni Depora nko Parak wero Apinoam tumï:

² Kesala ECHOTYON! Kinyorï pipö Israel owesyo poryot akïkonï kegh chane kïpa poryot ompö machatengwa.

³ Atera nyu pöytoghï! Alïm kintöghoghï! Otumchinan ECHOTYON, osölan ECHOTYON, Tororöt pö Israel.

⁴ ECHOTYON, atakinye kipïstenyi kutïngkoti Seir, atakinye kingwïnenyi okumpö Edom, kïpotan ngwïnya akïchïnuno pögh yïm. Owöy, ropönu poltoy pögh.

⁵ Kuyotyot kutïngkotï ompö tawu ECHOTYON nyo pö Sinay, ompö tawu ECHOTYON Tororöt pö Israel.

⁶ Mömicha pich cho kiweröy ortïna mït ompö osiswo Syamkar wero Anat, nko ompö osiswo Yael, kipetöy pich ara wuw.

⁷ Kipïstö pich kestonikwa ompöwölo kimöminye pöghisyö koro Israel ntangetan Depora, le yoto ompö Israel.

⁸ Otini kikïl Israel tororötin walaka, kutor poryot korengwa. Wölo kimöminye chi nyo kitïng longa anta ngot ompö Israel ompö kwenu pich elpun tömönut angwan?

⁹ Mi mïkulöwunyan nko wowïntino Israel cho nko kikonï kegh ompö machatengwa. Kesala ECHOTYON!

¹⁰ Amwatïtena, cho le akwa cho opegho sïkïröy cho relach, akwa cho otïpïyot sïro cho pö olyot nyo wow nko akwa cho opestoy ompö ara mït.

¹¹ Kïtum tumï kughum kïmwotïtoy ighisyewut pö man cho pö ECHOTYON, ompö rïntagh pö pipö Israel, kïtïl pölö ompö kori pöghon. Kïpkana pipö ECHOTYON kukoti kanastinekwa.

¹² Ngeta, ngeta, Depora! Ngeta, ngeta, aitum! Ngeta Parak, wero Apinoam, atanama punkökwo.

¹³ Kirökwï nyu nyökon pö ECHOTYON, pkonöy tökïporyeghö pich cho owesöch.

¹⁴ Kipkana chane kanasyanta Amalek nyo mi koro Epraim kïrïpunyi, Penchamen nko pikökwa. Kïrökunö wowïntino Makir, Akïpkana walaka Saplon cho kile kintöghoghï.

¹⁵ Kirïp kintöghoghi Isakar Depora. Owöy, akimi pipö Isakar nko Parak. Kïryagh chane kïlïtöy mpöghogh kïrïp nyinte. Kitomtomön pipö Rupen.

¹⁶ Ompö ne totïpïyenökwa akalu kechir? Atelïma mösöw cho kuröy kechiryekwa? Kitomtomön pipö Rupen.

¹⁷ Kidong Kiliad Yordan antakwagh. Kwompö ne tökïtöpö Dan wölo tïghume? Kïsisa Asyer sörömu nanam lasay, akïmang wölo lekïto rerangu nanam.

¹⁸ Kutö kegh Saplon tapan nko Naptali tïkwïl ompö wölini kïporyegho.

¹⁹ Kipka pöytoghï kïporyö, kiporyeghö pöytoghi Kanan ompö Tanak ato lekïto pögho Mekido, wölo melö kïnyorï silpa.

²⁰ Kingarak kokel tïkwïl ompö yïm, kïporyeghö Sisera otini kiweröy mïröt.

²¹ Kuchut chane puseryonto lalwa Kisyon, lalwanay pö Kisyon pö könyisyok. Owetan tagh ompö owesyö!

²² Kitoyö angoletinö akïryagh kurïngring ngwïnya.

²³ Kïlö malaykayanta ECHOTYON, “Ochïpö kanasyanta Meros, ochïpö tya nko pikachi, ompöwölo melö kipka chane kungarak ECHOTYON. Kungarak ECHOTYON ompö pich cho le nyökon.”

²⁴ Nya kusoyönö Yael koko Eper nyo pö Ken, nya kusoyönö nyinte kïsir kor cho möngöy emen.

²⁵ Kisom chichoni pögh, kutö kokononi nyinte chö, kutö nyinte lölon ompö otupö nyo pö konyït.

²⁶ Kughïtö ewunyi akïnam wöwyon, kïnama ewunyi nyo pö tagh kunyïk pö tekï, kulïwö kunyïkay Sisera möt kïtoyö kunyit.

²⁷ Kupïtyï kelyechi, kïrï ngwïny kelyo kokonay. Kipït akïma ompö atoni.

²⁸ Kïtopönteghö yoto Sisera tïrisya, kiriröy nyinte akïtepöy lö, “Kölö ne nkarinyi tökuropï le nyï metï? Kölö ne tömömïlonchö lawel angoletinechi?”

²⁹ Kuyokyï korï cho ngöghomöch, akuyokyï kegh nyinte tïkwïl lö,

³⁰ “Kinyorï chane pöröw mi kuporöy Atö kïchöghchï kegh chi anka tïkwïl työ akonga anta odeny, akutö Sisera sïro cho pö olyot nyo wow. Ketö tipichay pöröw cho pö sïro cho kikïnap söremwok akesïlö munytin cho sis tolokyan.”

³¹ Nya kuwonyö punköku, we ECHOTYON! Wölo ikany kulïwï kongotiku le asis otini kapusï ompö owesyenyi. Kïnyorï korononi kalya ompö könyis tömönut angwan.