KIRWOKÏ 2 - PIPÏLIA

¹ Kiweghö malaykayanta ECHOTYON Kilkal kïpus kutang Pokim, akïlenchï pipö Israel, “Kyamïtwakwa apkanena koro Misri, amïtwakwa ntatï kor nyo kyowolwolchan papotïnekwa lö okonokwa. Kyamwaghan lö, ‘Mowöghökanye mumenyu kokay nko akwa.

² Amotöp ntam muma nko pich cho möngöy koronete, wölo onyorekwa ato kïpelo amörostinekwa.’ Wölo melö kyarïpakwa ngölyontenyan. Ompö ne taghakwa le nyï?

³ Nyo omwowokwa lö melö toyonan ye nyu pïchoni kïpegha tawunkwa, wölo opïsinan chane koronete atö kïlïkwï pungkökwa, akïlïkwï tororötinekwa ngöghöp ompö akwa.”

⁴ Nyini kiwang malaykayanta ECHOTYON kïmwochï pipö Israel ngalechoni, kutor chane kïriryö,

⁵ kïkurö kayneto atoni Pokim, kïyenchï amöros ECHOTYON ompö atoni.

Karapas Yoswö

⁶ Otini kimwochï Yoswö pïchay kïpa, kïwö chi anka tïkwïl ompö pipö Israel atö kïcheng kor nyo kikitö.

⁷ Kïpöghisyechï pipö Israel ECHOTYON ompö osiswo Yoswö löwïr, ompö osiswo poy cho kidong lötu Yoswö akisïwa kïgh anka tïkwïl cho kighchï ECHOTYON pipö Israel.

⁸ Kïrapas Yoswö wero Nun, mötworinto ECHOTYON, ato kitïng könyis 110.

⁹ Ketïpchï nyinte sörömu korenyi Timnat Eres ompö komoswo Epraim, okumpö ewu löt nyo pö kutïng pö Kaas.

¹⁰ Kikany nyu kuwonyö pïnoni kïmïkul, kïpusï pïnta anka nyo kimenkïtnye ECHOTYON akimenkïtnye kïgh nyo kighchï nyinte pipö Israel.

Köpïstö pipö Israel kïsagh ECHOTYON

¹¹ Atolapay kwigh pipö Israel ngokï ompö tawu ECHOTYON akutor kïsagh Paaltin.*

¹² Kïpïstö ECHOTYON Tororöt pö papotïnekwa nyo kimïtuna chane koro Misri akïrïp tororötin walaka cho pö pich cho kimang kuwit chane, kïkïtïngchï akïsagh, kwigh ECHOTYON kïnörekyï chane.

¹³ Kïpïstö chane ECHOTYON akïpöghisyechï Paaltin nko Astarot.*

¹⁴ Kïngwanit lö kat nörekyo ECHOTYON ompö pipö Israel, kïpïstö chane kenam akesara tïkukwa, akutö chane moriko pungkökwa cho kimang kuwitwit chane, amelö kitökumï pipö Israel ntökughyongtö ngat.

¹⁵ Otini kilentöy kïpetöy lïk, kupöpek ECHOTYON ntökerïnta chane, kïrïp kegh nko ngölyontenyi nyo kökikuwalwal kegh lö oghöy. Kutö nyinte chane nyarïl nyoman.

¹⁶ Atolapay kutö ECHOTYON pipö Israel kirwokï cho kisörï chane ompö mori pich cho kirïnta chane akïsara tïkukwa.

¹⁷ Wölo kïrkegh kïlenyoni melö kitökïterchï kirwokikwa. Kilïkwï pipö Israel kalomak akïrïp tororötin walaka akïkïtïngchï, kimasta chane akïpïstö or nyo kirïpöy papotïnekwa cho kirïpöy kirurut pö ECHOTYON, amelö kitökwigh chane lenyoni.

¹⁸ Akwompö osis lapay cho kitö ECHOTYON Israel kirwokin, kungarak nyinte kirwokintononi atö kïsörunö chane pungkökwa ompö osis lapay cho kisöpöy kirwokintononi, ompöwölo kisyonchï ECHOTYON chane otini kiriryö ompö pich cho kichop kong akïpïr chane.

¹⁹ Nyini kama kirwokintö, kïmïlisyö chane löt akwigh cho ghach tya kïsir papotïnekwa, kïpa kïrïp tororötin walaka, akïpöghisyechï chane akïkïtïngchï, melö kipïstö otöptinekwa cho ghach.

²⁰ Kïngwanit nörekyo ECHOTYON lö kat ompö pipö Israel, akïlö, “Ompöwölo kapeny pich mumenyan nyo kyaman nko papotïnekwa, amelö kötökïter ngalechan,

²¹ melö toyonan ngat pipö punton walaka tïkwïl cho kipïsyï Yoswö koronï kïtomö kïma.

²² Opöghisyeghonan chane atasïwan lö ekïrïpöy pïchï pö Israel ortïnechan anta pïstoy le papotïnekwa.”

²³ Kïlenyona kïpïstö ECHOTYON puntonichoni, amelö kitökïyon chane lawel, amelö kitö chane mori Yoswö.