KIRWOKÏ 19 - PIPÏLIA

¹ Kimi osiswechoni chi pö Lawi nyo kimöngöy le ton koro komoswo pö Epraim, akimöminye pöytoghintö Israel. Kip chichoni korka nyo kimi kanasyanta Petleem nyo mi Yuda kïlïkwï chemïnïngwenyi.

² Wölo kïsyal chemïnïngwonay nko pontenyi, akuperta kïwö katangwa Petleem koro Yuda, kïtöpö wöloni aro angwan.

³ Kïwö chichay kïrïp akumukyï kïsaghsagh nyinte kïmïla kaw. Kiwö nyinte nko mötworintenyi nko sïkïröy odeny. Nyini kitïta kuporchï kokonay chichay pö Lawi kö, nyini kisïwa kwanta, kïtaroch ompö ngörekyö.

⁴ Atolapay kïmir kapikoyenyi nyinte kïpöghön osis sömök, kïlenyona kwomisyö akïgheghsyö ompö wöloni.

⁵ Nyini kitïta asisto angwan, kïnget chane kiwasan akïnap kegh. Wölo kïlenchï kapikoyenyi chichay pö Lawi, “Ama makatyan kite atolapay apa nyu.”

⁶ Kumpur pïchay kwodeny akwomisyö akïgheghsyö, atolapay kïlenchï kapikoyenyi chichay, “Osominyi lö kaykay pöghönö ngat ama emö.”

⁷ Kïnget chichay lö towechï kegh, wölo kïmir kapikoyenyi, kïrï oghe anka wölini.

⁸ Otini kïyech asisto mut, kïmach chichay kïwö, wölo kïlenchï papoto chepay, “Omisyenö kïny aitöpö ntökïmala asis!” Kwomisyö nyu pïchay kwodeny.

⁹ Otini kimach chichay kutor pantanyi nko chemïnïngwenyi nko mötworintenyi, kïlenchï kapikoyenyi, “Atï mach kwimön nya, pöghönö nko asïyech, mesïwïyenyinye so lö mach kwimön. Rïwö wölete, aiyam emö, atewechinö kegh katangu asïyech tökwoghö.”

¹⁰ Wölo kïtagh chichay kïpöghön oghononi, kïwechï kegh kutang okumpö Yepusi (nyoni kï Yerusalem), kimi nko sïkïröyichi kwodeny nko chemïnïngwenyi tïkwïl.

¹¹ Otini kirich chane Yepusi, kwimön. Kïlenchï mötworintonay echotyontenyi, “Ne makïpa kanasyanta pipö Yepusi atö keruyenö wölini nya?”

¹² Wölo kïlö echotyontenyi, “Melö kïpetöy kanasyanta pipö punton nyo melö pö pipö Israel. Kepe ntöket Kipea.

¹³ Kepe lawel tömanyïl ket Kipea anta Rama.”

¹⁴ Kïlenyona kulet tagh nko pantangwa, wölo kïröytochï asis atolekïtö Kipea kanasyanta pipö Penchamen.

¹⁵ Kïpa atoni kïlïtöy kanasyanta Kipea atö kïruyö. Wölo kumpur sany wölo le kokwö ompö kanasyan, ompöwölo melö kimi chi nyonikïny nyo kitach chane.

¹⁶ Kite kwitï poyon nyo kingwïno parenyi otini kikwimön. Ki pö chichoni koro komoswo Epraim, akimöngöy Kipea le ton, wölo kimang pipö Penchamen wölini.

¹⁷ Kïlö pontonay atopöntö kïsïwa rutoghintonay mi kokwö, kïtep lö, “Iwetenyi onö? Akengwïnonyi onö?”

¹⁸ Kïlenchï, “Kïpkonocha Petleem nyo mi Yuda, akepetecha ketöngöy komoswo Epraim, akï wöloni korenyan, wölo omitan ye owetöy katanyu, möminye chi nyo kemïtanïn konyi.

¹⁹ Kïtïngetecha omisyö nko mopö cho pö sïkïröyicha, aketïngetö makatyan nko kumi sapipun cho le chichan nko cho pö chemïnïngwenyan nko cho pö mötworintenyan nyï kïmitecha tïkwïl. Möminye kïgh nyonikïny nyo rarteghate ompö acha.”

²⁰ Kïlenchï pontonay, “Ochikwa tokote ompö konyan, anyorukwa kïgh anka tïkwïl nyo omökekwa, wölo merï sany.”

²¹ Kumït nyu konyi akïpagh sïkïröyichi akuwun kelyekwa, akwomisyö akïgheghsyö.

²² Akwotini kimi chane kwomisïyi akïgheghsïyi, kïpka piko kanasyantanoni cho kile mwokïyis akuwit köyay. Kïwirwir kukat, akïlenchï pontonay, “Mïtuna chichï sany kengwïn kongu atö keghchinöcha takalnan!”

²³ Kïwö sany chichay pö köyay wöloni mi pïchay akïlenchï, “Ewo, werköcho! Osoghokwa lö, magh kïgh nyo gha lenyoni! Moghchï nyinte kipö arasï nyo lata nyoni, ompöwölo tontenyi nyinte.

²⁴ Rose köny lö mi yi cheptönyan nyo le chepkïltït nko chemïnïngwo chichï. Omïtunan ye chane kïpka wölo omitekwa atoghchinökwa nyu chane le wölo komöktoy. Wölo moghchï kïgh nyo pö arasï chichï.”

²⁵ Wölo melö kitökïter pïchay ngalechi. Kïlenyona kutötö chichay pö Lawi chemïnïngwenyi. Kïpa kïpatal kokonay kïyech, kïpïstö kïwechï kegh.

²⁶ Kïmïla kiwasan akungwïn kupïtyï kuketo köyay kimi pontenyi. Kumpur atoni ntökïyech.

²⁷ Kïnget pontenyi tökwogho akïyat kukat, akimököy kuletöy tagh nko pantanyi. Kïlö aros nkwanyï chemïnïngwenyi kipïtyï otini le kukat, akimi ewunechi otini le ket pö kukat.

²⁸ Kïlenchï chichay korkenyi, “Ngeta, kepe.” Wölo melö kingalan kokonay. Kïlenyona, kïsïtyï chichay kokonay sïkïryenyi akïwechï kegh katanyi.

²⁹ Otini kitïta katanyi, kïcheng rotwö akïsakasaka ngichayayi korkonay kïlïkwï taman nko odeny, atolapay kuyoktö ngichayayichoni kïghömï koro Israel kïmïkul.

³⁰ Kïlö chi anka tïkwïl nyo kisïwa, “Tomönye nyu kwigha kïgh nyo lata nyï! Akïtomönye kesïwa kïngeta atakinye kiwuwunö pipö Israel koro Misri! Anane nyu köny, arwok akwane, amwowï kïgh nyo kighöy!”