KIRWOKÏ 14 - PIPÏLIA

¹ Kïwö Samson asistanka kïröyto Timna, kïsïwa ompö wöloni työ nyo kipö pipö Pilisti.

² Otini kimïla, kïlenchï kwanta nko kame, “Kosïwechan työ nyo pö pipö Pilisti ompö Timna nyo kachamanïn kisön. Ape amïtuna kïlïkwï korkenyan.”

³ Wölo kïtep kwanta nko kame lö, “Möminye so korka nyo pö arencha anta nyo pö piköcho, tewetenyi mörone korka pipö Pilisti, cho le sompen?” Wölo kïlenchï Samson kwanta, “Ape olotokïnwanïn ompöwölo ochöman nyinte tya.”

⁴ Kimenkïtcha yiyichi lö ki machata ECHOTYON nyoni, ompöwölo kimököy ECHOTYON pöroyïn nyo poryot nko pipö Pilisti. Kipöytoy pipö Pilisti Israel osiswechoni.

⁵ Kïwö Samson asistanka nko yiyichi kïröyto kanasyanta Timna, kïnyorï pareni sapipun ompö wöloni, kïtïlonï kïrpö ngötïny kungwïn wölo mi nyinte.

⁶ Kungwïnchï Mïkulöwu ECHOTYON Samson ompö owesyö, kïkareran kïrkay pö ngötïny ompö morichi le wawa aran akimötïngnye kïgh ompö morichi. Wölo melö kimwochï yiyichi kïyoni kigh nyinte.

⁷ Atolapay kïwö akïngalan nko chepay, kïcham nyinte cheponi tya.

⁸ Ato mi asistanka, kïmïla kïwö kwip cheponi. Akwotini kimi kungwïnöy, kuwer or kamas atö kuros ngötïnyanya kipar, kïlö aros togho sakam cho chang akïmi kumata.

⁹ Kïcheng kumatanay akwamata otini kimi pan. Otini kinyorï yiyichi, kutö chane kumatanay, kwam tïkwïl. Wölo melö kimwochï chane lö kingwïna kumatanoni por pö ngötïny nyo kima.

¹⁰ Kïwö papoto Samson kato ompö chepay. Kwigh Samson ichon nyo wow wöloni, kïle wölo kilata otöp nyo kipö chumwak.

¹¹ Nyini kisïwa pipö Pilisti nyinte, kïyonta chumwak tömönut sömök kïpa kïtïpï nko nyinte.

¹² Kïlenchï Samson pïchay, “Nyopörwok tyankoy nyo ato angorakwa ompö osis mut nko odeny otete kyomöy ichon, okonokwa sïro tömönut sömök cho pö katani nko sïrokö walaka tömönut sömök cho pö ichon.

¹³ Wölo ato mangorkwanye okonanïkwa sïrochoni pö katani le tömönut sömök nko sïrokö walaka tömönut sömök cho pö ichon.” Kuyokyï pïchay lö, “Mwagha.”

¹⁴ Kïlenchï, “Kingwïna kïgh nyo kyomöy kïgh nyo tïlöy Kungwïna kïgh nyo anyïn kïgh nyo awes.” Kupöl pïchay kïngor ompö osis sömök.

¹⁵ Nyini kitïta asisto angwan, kïlenchï pïchay kokonay pö Samson, “Ngoyngoya pontengu tökïmwowecha kuporï kini mwowu tyankoynoni. Kïkany atomeghanyinye lenyoni, kepelecha nyi nko katankwa kïmïkul. Kopechikwa so okurecha atasarenecha tïkucho?”

¹⁶ Kïlok koko Samson akïlenchï nyinte, “Melö ichömaninyi nyonikïny! Isösaninyi pat! Kimwochinyi kongotichan kïngor tyankoy amelö kimwowaninyi kïgh nyo poru!” Kuyokyï Samson lö, “Nyini tomönye omwochan ompö chini le yiyichu, kwompö ne tomwowunyi?”

¹⁷ Kïrira tawunyi osis mut nko odeny cho kipö ichon. Ato mi asispa mut nko odeny kïmwochï kini poru tyankoynoni, ompöwölo kisus nyinte nyoman. Kïwö kokonay kïmwochï pïchay tyankoynay.

¹⁸ Otini kitomönye kïröytö asis ompö asispa mut nko odeny kïlenchï piko kanasyantanay Samson, “Ne kïgh nyo anyïn kïtïl kumat? Ne kïgh nyo awes kïtïl ngötïny?” Wölo kïlenchï Samson pïchay, “Ntö melö kyopöghisyeghekwa mösörunyan, melö kitö onkïtunekwa kïyoni kiporu tyankoytönoni.”

¹⁹ Kungwïnchï Mïkulöwu ECHOTYON Samson ompö owesyö. Kïwö kïröytö kanasyanta Askelon akïpar mïrön tömönut sömök akïchenga sïrokökwa pö ichon kutö pïchay kingor tyankoynay. Kïngwanit lö kat nörekyo Samson, akïweghö atoni kutang koto kwanta.

²⁰ Wölo keyilchï kokonay pö Samson chi nyo kighyongchini nyinte asispa kensyö.