KIRWOKÏ 12 - PIPÏLIA

¹ Kïtuyö pipö Epraim akïnap kegh atö kïpa poryot. Kwoghyö lalwa Yordan kutang okumpö Sapon akïlenchï Yepta, “Kilö ne tewinyi pöryenö nko pipö Amon amelö kimwoghwechanyi kepe tïkwïl? Kïpeltocha nyi kongu!”

² Wölo kuyokyï Yepta chane lö, “Kikïtïngetecha syala nyo wow nko pipö Amon, kïkany okurokwa, kïmelö kyapkanakwa osörwanïn ompö mori pïchoni.

³ Kïkany asïwan lö melö tosörwanïkwa, owusyan söpontanyu ket aghyan lalwa atoporyö nko pipö Amon, kutö ECHOTYON chane morichan. Ompö ne topkonchinanïkwa asete alentöy kïporyot nko ani?”

⁴ Atolapay kutuyö Yepta pipö Kiliad kïmïkul, akïporyeghö pipö Epraim akïrïnta chane. Ki pïchoni pö Epraim cho kïlö, “Ochikwa nyökoröch pipö Kiliad cho kyopertegho koro Epraim cho omöngöy koro Epraim nko nyo pö Manase!”

⁵ Kusyep pipö Kiliad adoketis cho kikyoghyegho lalwa Yordan atö kepa koro Epraim, ato kimi chi nyo pö Epraim nyo kichïwïta pörchö, akïsomsyö lö, “Pïswante oghyö,” kïpechï pïchay pö Kiliad kïtep nyinte lö, “Ichinyi so chi pö Epraim?” Ato yokyï lö, “Ewo,”

⁶ kïlenchï pïchay, “Mwaghe lö, ‘Syipolet.’ ” Ato mwa lö, “Sipolet,” ompöwölo kimelö muköy kïkuröy ngölyontononi lasiny, kenam nyu nyinte akepar ompö adoketischoni kyoghchinegho Yordan. Kikïpar osiswechoni pipö Epraim cho le 42,000.

⁷ Kurwokyï Yepta Israel könyis mut nko akonga. Atolapay kirapas Yepta chichay pö Kiliad. Ketïpchï nyinte kanasyantenyi ompö koro Kiliad.

Ipsan nko Elon nko Apdon

⁸ Otini kirapas Yepta, kurwokyï Ipsan Israel nyo kingwïno Petleem.

⁹ Kitïng wor tömönut sömök nko tipïn tömönut sömök. Kuyilchï tipichi are anka, atolapay kïkensyechï werkachi chay le tömönut sömök tipïn cho kipkana or anka. Kurwokyï Ipsan Israel könyis mut nko odeny,

¹⁰ atolapay kirapas aketïpchï Petleem.

¹¹ Otini kirapas Ipsan, kurwokyï Elon Israel nyo kingwïno Saplon könyis taman.

¹² Atolapay kirapas aketïpchï Ayalon ompö koro Saplon.

¹³ Otini kirapas Elon, kurwokyï Apdon wero Ilel Israel nyo kingwïno Piraton.

¹⁴ Kitïng wor tömönut angwan nko kukötin tömönut sömök cho kipegho sïkïröy 70. Kurwokyï Apdon Israel könyis mut nko sömök,

¹⁵ atolapay kïrapas aketïpchï Piraton koro Epraim ompö koro kutïngkoti pipö Amalek.