KIRWOKÏ 11 - PIPÏLIA

¹ Ki chi pö lïk nyo le nyakan awes Yepta nyo kingwïna koro Kiliad, aki wero chepores. Kiyï Kiliad Yepta.

² Kïyï koko Kiliad tïkwïl werkö walaka. Otini kïyetu werchay, kïyon chane Yepta akïlenchï, “Möminye kïgh nyo imïlenyi ompö katancha, ompöwölo ichinyi wero korka anka.”

³ Kïlenyona kupertegha Yepta wölo mi werkökwa, akïwö kïmang koro Top. Kïtuyö ompö wöloni nko pich cho ghach, akïpa kïpörisyö tïkwïl.

⁴ Ato mi asista anka, kïpa pipö Amon kïporyö nko pipö Israel.

⁵ Atolapay kïpa poyi Kiliad kumïtuna Yepta koro Top

⁶ akïlenchï nyinte, “Nyonö atentöghoghwecha, atö keporyeghenö pipö Amon.”

⁷ Wölo kuyokyï Yepta chane lö, “Kyareyanïkwa nyoman ayonenanïn koto paponyan. Kwompö ne topkonekwa wölo omitan otinö konyorukwa kömpölelyö?”

⁸ Kuyokyï poyichay pö Kiliad Yepta lö, “Kakïpkanacha wölo imitenyi ompöwölo kïmökecha nyi wete nko acha atö keporyenö nko pipö Amon, atelïkunanyi nyu kintöghoghinto pipö Kiliad löwïr.”

⁹ Kuyokyï Yepta chane lö, “Ekwoto töp ntamïlan nko akwa wölini le kaw atö keporyenö nko pipö Amon akïcham ECHOTYON kutö chane morichan, oghanïkwa nyoman olïku kintöghoghintenkwa?”

¹⁰ Kuyokyï poyichay pö Kiliad nyinte lö, “Nya kïlïkwï söwinte ECHOTYON. Kighecha lenyini kemwaghanyi.”

¹¹ Kïwö nyu Yepta nko poyichay pö Kiliad akwigh pich nyinte kïlïkwï kintöghoghintengwa. Kïngalan Yepta ngalechi lapay ompö tawu ECHOTYON ompö kanasyanta Mispa.

¹² Atolapay kïyonta Yepta pich kïpa kïtep pöytoghinto Amon lö, “Itïngetenyi ne nyo isyölonyi nko acha temökenyi nyone poryeghone korencha?”

¹³ Kuyokyï pöytoghintonay pö pipö Amon pïchay kiyonï Yepta lö, “Kicheng pipö Israel korenyan atakinye kiwuwunö koro Misri, kïngata lalwa Arnon ntökwit lalwa Yapok, akïwö ntökwitïta lalwa Yordan. Nyo mïchinokwa ye okonunö koroswechoni ompö kalya.”

¹⁴ Kïyonta Yepta pikö walaka ngat wölo mi pöytoghintonay pö Amon,

¹⁵ kïlenchï, “Melö man lö kicheng pipö Israel koro pipö Moap anta koro pipö Amon.

¹⁶ Wölo atanye kipkana chane koro Misri, kuwerata kor nyo kile surkwen ntökwitïta Nanam nyo Pïrir akïpa ntökwitïta Kades.

¹⁷ Atolapay kïyonta pipö Israel ngat pich kïpa wölo mi pöytoghinto Edom, kïlenchï, ‘Chömwecha kewera korengu,’ wölo melö kichömchï pöytoghintonay pö Edom chane. Kïyonta pikö walaka wölo mi pöytoghinto Moap, kïtagh nyoni tïkwïl. Kïtïpï nyu pipö Israel wölini le Kades.

¹⁸ Atolapay kuwer wölo le surkwen akuwit koro Edom nko nyo pö Moap ntökwitïta okumpö kongasispa koro Moap, lalwa Arnon antakwagh. Kïtek möngengwa atoni, wölo melö kyoghyö Arnon ompöwölo ki rotyot nyo pö koro Moap.

¹⁹ “Atolapay kïyonta pipö Israel pich wölo mi Sion pöytoghinto pipö Amori nyo kipöytoy ompö kanasyanta Espon, kïlenchï, ‘Chömwecha kewera korengu atö kepe korenyo.’

²⁰ Wölo melö kighan Sion pipö Israel kuwer korenyi. Kïlenyona kïghamïtï piko lïkenyi löwïr akïtek möngengwa kanasyanta Yaas akïporyeghö nko pipö Israel.

²¹ “Wölo kutö ECHOTYON Tororöt pö Israel Sion nko lïkenyi mori pipö Israel. Kïlenyona kïnam chane korononi kïmïkul pö pipö Amori cho kimöngöy wöloni.

²² Kïnam chane koro Amori kïmïkul, kïngata lalwa Arnon ntökwitïta lalwa Yapok akïngata surkwen ntökwitïta lalwa Yordan.

²³ ECHOTYON, Tororöt pö Israel nyo kitö koro pipö Amori pipö Israel. Ichengonyi nyu chane lö ne?

²⁴ Chenga kor nyo koninyi tororötïngu Kemos, kïchengecha kor nyo konecha ECHOTYON Tororötïncha.

²⁵ Ilentenyi so ochï karam kïtïl Palak wero Sipor pöytoghinto Moap? Melö kisyal nyinte anta poryö nko acha.

²⁶ Kimang pipö Israel Espon nko Aroer nko kanastinekwa cho mïnkech nko kanastin löwïr cho kimi sörömu lalwa Arnon ompö könyis 300. Ompö ne tömoyokukwa kanastinekwo atoni?

²⁷ Nyo melö kawunyi nyo gha, poto nyi nyo keghwanïn nyo gha otini kengwïnanyi iporyö nko acha. ECHOTYON nyo le Kirwokinte, nyo mutöy asisete ngal cho mi kwenu pipö Israel nko cho pö Amon.”

²⁸ Wölo kïtagh pöytoghintonay pö Amon ngalechoni kimwochï Yepta nyinte.

²⁹ Atolapay kungwïnchï Mïkulöwu ECHOTYON Yepta. Kïwö kuwerata koro Kiliad nko nyo pö Manase, akïmïla kutöngwï kanasyanta Mispa nyo mi Kiliad, atolapay kïwö kutang wölo mi pipö Amon.

³⁰ Kuwolwolchï Yepta ECHOTYON lö, “Ato töp ntetönönyi pipö Amon morichan,

³¹ okoninyi chi anka tïkwïl nyo nyoghöy kïlïtuno kukenyan kungwïnöy kïtörokanïn otini kangwïnan rïntagh nyo pö pipö Amon. Okoninyi kïlïku amöros nyo kïpelöy.”

³² Kïlenyona kwoghyö Yepta lalwanay akïwö wölo mi pipö Amon atö kïporyö nko chane. Kutö ECHOTYON chane morichi.

³³ Kïpar pïchay lömïs ompö kanastin tömönut odeny, kïngata Aroer ntökwit Minit nko Apel Keramim, kïpar pich cho chang nyoman. Kïrïnta nyu pipö Israel pipö Amon.

Chepö Yepta

³⁴ Otini kïmïla Yepta katanyi wölini le Mispa, kïlïtï sany cheptanyi nyo kitïng kwïrkwïris kungwïn kïtaroch nyinte kïnyolonu. Kimötïngnye montö anka kïpoto nyoni.

³⁵ Nyini kisïwa kïkarer sïrokachi ompö nyarïl akïlö, “Heywey! Cheptanyu! Kekonaninyi nyarïl nko kisusöt nyo wow ompöwölo kowolwolchan ECHOTYON amomukanye ntayoda.”

³⁶ Kuyokyï cheptanyi lö, “Paponyu, ighwante kïrïp kegh nko ngölyon nyo kiwolwolchinyi ECHOTYON, ompöwölo kakutökunyi ECHOTYON pungköku, pipö Amon.”

³⁷ Akïlenchï ngat kwanta, “Ighwante ngölyontononi, wölo pïswante otöpan onkït aro odeny, atowan wölnö le kutïngkot owestotö atarir nko kongotichu, ompöwölo omeghan atochan chepkïltït.”

³⁸ Kïlenchï, “Winyi.” Kïchömchï kïwö aro odeny. Kïwö chepay nko kongotichi wölo le kutïngkot akïpa kïriryö, ompöwölo meghöy nyinte kïtomö kep amösïch monïng.

³⁹ Nyini kiwonyö oroyechay le odeny, kïmïla wölo mi kwanta, kwighchï nyinte cheptanyi kïrïp kegh nko kiwalwalatenyi, akitomönye kïrï cheponi nko chi. Kungwïna atoni otöp ompö koro Israel

⁴⁰ nyo petöy tipö Israel köny anka tïkwïl ompö osis angwan kunonöy chepö Yepta nyo kipö Kiliad.