KIRWOKÏ 10 - PIPÏLIA

¹ Otini kima Apimelek, kïpusyï Tola wero Pua nyo kile wero Dodo nyo kisörï Israel. Ki chi nyinte nyo pö ara Isakar nyo kimöngöy Syamir koro komoswo Epraim.

² Kirwokyï Israel könyis 23. Atolapay kïrapas aketïpchï Syamir.

³ Kïrïpta Yair nyo kingwïno Kiliad nyo kirwokyï Israel könyis 22.

⁴ Kitïng wor tömönut sömök cho kipegho sïkïröy tömönut sömök. Kitïng chane kanastin tömönut sömök ompö koro Kiliad cho tökekuro kanastina Yair nko nyete le ye.

⁵ Otini kirapas Yair ketïpchï Kamon.

Yepta

⁶ Kwigh pipö Israel ngokï ngat ompö tawu ECHOTYON otini kisagh Paaltin* nko Astarotin* nko tororötino pipö Sirya nko pipö Sidon nko pipö Moap nko pipö Amon nko pipö Pilisti. Kïpïstö chane kïsagh ECHOTYON.

⁷ Kïlenyona kïnörekyï ECHOTYON pipö Israel akutö mori pipö Pilisti nko cho pö Amon.

⁸ Kichop kong pïchoni pipö Israel könyinoni akwigh lenyoni ompö könyis 18 otini kimöngöy koro pipö Amori, okumpö kongasispa lalwa Yordan nyo mi Kiliad.

⁹ Kwoghyö tïkwïl pipö Amon Yordan atö kïporyeghö pipö ara Yuda nko cho pö Penchamen nko cho pö Epraim. Kïsïch nyu pipö Israel nyarïl nyo wow.

¹⁰ Kïlenyona kïrirchï pipö Israel ECHOTYON lö, “Kakiwucha nyi ngokï, ompöwölo kakïpïstecha nyi nyo ichï Tororötïncha akepa kesaghata Paaltin.”

¹¹ Kuyokyï ECHOTYON chane lö, “Ani nyo kyosörunenokwa mori pipö Misri nko pipö Amori nko pipö Amon nko pipö Pilisti

¹² nko pipö Sidon nko pipö Amalek nko pipö Maon, atakinye kichopokwa kong chane orirchanïkwa.

¹³ Wölo opïstanïkwa asagh tororötin walaka, kïlenyona melö tosörwokwa ngat.

¹⁴ Ape orirchinö tororötinechini kakïlakwa. Akanya kïsörwokwa chane otini konyorukwa nyarïl!”

¹⁵ Wölo kïlenchï pipö Israel ECHOTYON, “Acha cho kikigh ngokï. Ighanyi kïgh nyo kesïwenyi lö karam, wölo kaykay sörwecha ye.”

¹⁶ Atolapay kïlasta pïchay pö Israel tororötinechay pö tontön akïsagh ECHOTYON. Kusus nyinte nyarïl nyo kitïng pipö Israel.

¹⁷ Kïtuyö pipö Amon akïnopchï kegh poryot, kïpa akïtek möngengwa koro Kiliad. Kïtuyö tïkwïl pipö Israel akïpa kïmang kanasyanta Mispa.

¹⁸ Kïmwochinchö kintöghoghi Kiliad lö, “Ekï ngo chitö nyini muköy kïporyot nko pipö Amon? Lïku chichoni pöytoghinto koro Kiliad kïmïkul.”