KIRWOKÏ 1 - PIPÏLIA

Kanam pipö ara Yuda nko Simion Adonipesek

¹ Kikany kïma Yoswö, kïtep pipö Israel ECHOTYON lö, “Ngo ompö piköcha nyo nyoghöy kïwetöy kïporyeghö pipö Kanan?”

² Kuyokyï ECHOTYON lö, “Nyoghöy pipö ara Yuda, kotönön korononi morikwa.”

³ Kïlenchï pipö Yuda werkökwa pipö Simion, “Apkana kepe tïkwïl kepustena kor nyo kakekonecha, atö keporyeghenö pipö Kanan, atolapay kepa nyu tïkwïl korenkwa.” Kïpa nyu pipö Simion nko chane.

⁴ Otini kïpa pipö Yuda kïpusta, kutö ECHOTYON pipö Kanan nko cho pö Peris morikwa. Kïpara wölnö le Pesek pich cho le 10,000.

⁵ Kïnyorchï wöloni le Pesek Adonipesek, kïporyeghö nyinte akïrïnta pipö Kanan nko Peris.

⁶ Kuperta Adonipesek, wölo kïyonota chane nyinte ntökïnam, kïdïng morichi cho echön cho pö ewun nko cho pö kelyön.

⁷ Kïlö Adonipesek, “Köghokwanïn ye nyu Tororöt kïgh nyo kyoghchan pöytoghï 70 cho kikïdïng morikwa cho echön cho pö ewun nko cho pö kelyön cho kikwöghöy rarakan cho kichïntegho mesenyan.” Atolapay kemït nyinte kutang Yerusalem, kïmeghchï wöloni.

Karïnta pipö Yuda Yerusalem nko Epron

⁸ Kupokyï pipö Yuda Yerusalem akïnam akïpar pikö akïpel kanasyantengwa.

⁹ Nyini kiwang, kïpa pipö Yuda kïröytö akïporyö nko pipö Kanan cho kimöngöy komos nko koro Nekep* nko wölo le tömkö.

¹⁰ Kïpa pipö Yuda kïporyö nko pipö Kanan cho kimöngöy Epron akïrïnta pipö Syesyay nko Aiman nko Talmay. Kikïkuro ato le tagh Epron Kiryatarpa.

Karïnta Otniel kanasyanta Depir

¹¹ Kïpegha pipö Yuda atoni akïporyeghö pikö walaka cho kimöngöy Depir nyo kikïkuro ato le tagh Kiryat Seper.

¹² Kïmwa Kalep lö, “Oyilchinan chi cheptanyan Aksa nyo poryegho kanasyanta Kiryat Seper akïnam.”

¹³ Kïwö Otniel wero Kenas werto ompö Kalep nyo mïnïng kïporyeghö akïnam, keyilchï nyinte chepay.

¹⁴ Otini kiwö wölo mi nyinte kïmwochï kïsom paponyi par. Kïrökunö sïkïryenyi chepay, kïtep Kalep lö, “Imökenyi ne?”

¹⁵ Kïlenchï, “Konante ropöwon, ompöwölo kekonaninyi koro Nekep wölo tïyame, kono nyu koriko pöghon.” Kutö nyu Kalep kori pöghon cho mi wölo toka nko wölo porö.

Rïntaghpa pipö Yuda nko Penchamen

¹⁶ Kïpustegha pipö ara Ken, monïngo kapikoyo Musa nko pipö Yuda Yeriko, kanasyanta sos, kutang surkwen pö Yuda nyo mi Nekep nyo lekïto Arad akïmang nko pipö Amalek.

¹⁷ Kïpa pipö Yuda nko werkökwa pipö Simion akïrïnta pipö Kanan cho kimöngöy Sepat, kïpar chane lömïs. Kïlenyona kïkurö kayneto kanasyantanoni Orma.

¹⁸ Melö kinam pipö Yuda kanasyanta Kasa nko Askelon nko Ekron kïmi nko söremwokökwa.

¹⁹ Wölo kimito ECHOTYON nko Yuda. Kïlenyona, kïyon nyinte pich cho kimöngöy korononi le kamas wölo kimemïnye kïyon cho kimöngöy wölo le tömkö, ompöwölo kitïng nkaritin cho pö karïn.

²⁰ Ketö nyu Kalep Epron lenyini kimwa Musa. Kïyona Kalep wöloni ortïn sömök cho pö Anak.

²¹ Wölo melö kiyon pipö Penchamen pipö Yepusi cho kimöngöy Yerusalem. Kïlenyona kïmang nyu pipö Yepusi Yerusalem nko pipö Penchamen nko nyete le ye.

Karïnta pipö Epraim nko Manase kanasyanta Petel

²² Kïpusta tïkwïl pipö Epraim nko cho pö Manase werpö Yosep akïporyeghö kanasyanta Petel, akimi ECHOTYON nko chane.

²³ Kïyonta pipö ara Epraim nko Manase ghotï cho kighot Petel. Kikïkuro kayneto kanasyantanoni ato le tagh Lus.

²⁴ Kïsïwa ghotichay chi nyo kingwïno kanasyan, kïtep chane nyinte lö, “Porwecha or nyo lïtöy kanasyan, melö kidocha nyi kïgh.”

²⁵ Kuporchï nyu nyinte chane or nyo lïtöy kanasyan. Kïpar pïchoni pö Epraim nko cho pö Manase piko kanasyantanoni löwïr, kïpoto chichay nko piko konyi.

²⁶ Kïwö chichay kutang koro pipö Ititi kïtek kanasyan, kïkurö kayneto kanasyantanoni Lus. Kïlïkwï nyoni kaynatenyi nko nyete le ye.

Pich cho melö kiyon pipö Israel

²⁷ Melö kiyon Manase pich cho kimöngöy kanastina Pet Syan nko Tanak nko Dor nko Ipleam nko Mekido nko kanastinekwa cho mïnkech, ompöwölo kitas tagh pipö Kanan kïmang korononi.

²⁸ Otini kisïch Israel owesyö, kutö pipö Kanan kwigh ighisyo sekeynön wölo melö kiyon chane.

²⁹ Melö kiyon pipö Epraim pipö Kanan cho kimöngöy Keser, wölo kitas tagh kïmang nko chane.

³⁰ Melö kiyon pipö Saplon pipö Kanan cho kimöngöy Kitron anta cho kimöngöy Naalol, wölo kitas tagh kïmang nko chane, akutö kwigh ighisyo sekeynön.

³¹ Melö kiyon Asyer pich cho kimöngöy kanastina Ako nko Sidon nko Alap nko Aksip nko Elpa nko Apek nko Reop.

³² Kimang nyu pipö Asyer nko pipö Kanan, ompöwölo melö kiyona pipö Asyer chane korononi.

³³ Melö kiyon pipö Naptali pich cho kimöngöy kanastina Pet Syemes nko Pet Anat. Kïmang nyu pipö Naptali nko pipö Kanan akutö chane kwigh ighisyo sekeynön.

³⁴ Kïyon pipö Amori pipö Dan kïpa wölo le komos amelö kichömchï kïrökï wölo le tömkö.

³⁵ Kïtas tagh pipö Amori kïmang kutïng pö Eres nko Ayalon nko Syaalpim, wölo otini kitasa owesyö pipö ara Epraim nko Manase, kïpechï chane tïkwïl kutö pïchay kwigh ighisyo sekeynön.

³⁶ Kingata sörömu koro Amori ato kïpustegho Akrapim akïngata Sela kutok.