KINONO KIRURUT 9 - PIPÏLIA

¹ “Atere, pïchï pö Israel. Opetekwa asiswanete nyï oghsot lalwa Yordan, atape achenga koroswo pipö punton cho owesöch kïtïlokwa nko kanastin cho echön cho kikïtek kïnam yïm.

² Akïmi pich cho tïrusöch akï koghöch cho onkïtokwa akï pïchoni kï pipö Anak, chay olïmekwa kelentöy, ‘Möminye chi nyo muköy kïrïntoy chane.’

³ Kïlenyona, onkïtï asisete lö, ECHOTYON Tororötïnkwa nyo ntöghoghwokwa le ma nyo nöghöy. Nyinte nyu nyo rïntoy pïchoni atamukakwa nyu ayona chane awany kïrïp kegh nko kiyomisöto ECHOTYON.

⁴ “Amotöp ntolö otini kayon ECHOTYON Tororötïnkwa chane lö, kökonecha nyinte koronete kechenga ompö mantancha. Mölenye nyoni, kayon ECHOTYON chane ompö ghöyityengwa.

⁵ Melö ompö mantankwa anta ompö otöptönkwa nyo karam, nyo ighöy ECHOTYON kïkonokwa korengwa wölo kayon nyinte chane ompö ghöyityengwa. Atö kumï ngat kukïniniö ngölyontenyi nyo kiwolwolchï papotïnekwa ompö Apraam nko Isak nko Yakopo.

⁶ Kïlenyona onkïtï lö melö konokwa ECHOTYON Tororötïngwo koronete nyï karam achenga ompö mantankwa, ompöwölo ochikwa pich cho le oghïghe mötöwöy.

⁷ “Mowutyeghö wölanye kyadekwa ECHOTYON Tororötïnkwa kïnarek ompö surkwen, kïngata asisanye kyapkanekwa koro Misri ntökïtenö atunakwa wölete wölï, ompöwölo kyalïkukwa pich cho kyapeny ECHOTYON.

⁸ Apechikwa ngat agha ECHOTYON kïnarek ompö kutïng pö Sinay ntökïmach kuwanyakwa.

⁹ Kïkany atanya kyapustan kutïng owö opï koghïn cho töpölöl, cho kikikirchï ngala muma* nyo kyam ECHOTYON nko akwa. Kyotöpan kutïngoni osis tömönut angwan nangat nko pöghet. Melö kyaman omisyö anta aghegh pögh.

¹⁰ Kïkonanïn ECHOTYON koghichanye le odeny töpölöle kikira morichi. Kimi ori ngalechanye löwïr kimwowokwa nyinte ompö kutïng kïngetuno kwenu ma ompö asisanya pö tuyot.

¹¹ Kïkany otini kiwonyö osiswechoni le tömönut angwan nangat nko pöghet, kïkonanïn ECHOTYON koghichanye le odeny kikirchï ngala muma.

¹² “Kïlenchanïn ECHOTYON, ngeta wïyö lawel, ompöwölo kikunyorisyö piköku chay kimïtunenyi Misri. Kamasta kïnyini lawel kïpïstö arananya kyomwochan chane. Keghchï kegh körkeyïn.

¹³ “Atolapay kïlenchanïn ECHOTYON ngat, ‘Kasïwan pïchï lö pich chane cho oghïghe mötöwöy.

¹⁴ Pïswanïn awany chane, atökupot kaynatengwa ompö ngwïny, ataghinyi lïkuna pipö punton akonga nyo wow kïsir chane.’

¹⁵ “Kïlenyona orökunan kutïngay akïmi koghichay töpölöle kwodeny morichan, kikikirchï ngala muma. Akimi ma kïnögho kutïngay.

¹⁶ Asïwan lö kyoghchikwa ngokï ECHOTYON Tororötïnkwa. Kyaghakwa körkeyïn pö mogh nyo kikitany, owöghökisyö lawel ompö arananya kimwowokwa ECHOTYON arïpa.

¹⁷ Awirtan koghichay le odeny, ompö tawunkwa kïmutmutisyö.

¹⁸ Kyorïwön ngwïny tawu ECHOTYON osis tömönut angwan nangat nko pöghet, le atanya le tagh. Melö kyomisyan anta aghegh pögh ompöwölo kyoghchikwa ngokï ECHOTYON, otini kyaghakwa kïnarek nyinte.

¹⁹ Kyawaghan nörekyö ECHOTYON nko köromnyenyi nyo kinörekyokwa akimököy kuwonyokwa. Wölo kïterwanïn ngat nyinte asisoni.

²⁰ Kïnörekyï ECHOTYON Aron nyoman ntökïmach kïpar, osoghchan ngat Aron ompö atoni.

²¹ Atolapay achengan kïyoni pö ngokï le mogh kyaghakwa apel atïghotïgh angagh ntökïnyöryö le terïtyon. Alösyan terïtyechoni champilwa nyo kirökuno kutïngoni.

²² “Aghakwa ngat ECHOTYON kïnarek ompö Tapera nko Masa nko Kiprot Atapa.

²³ Kyapenyakwa ECHOTYON atanya kiyontokwa ompö Kades Parnea, kilenchokwa nyinte, ‘Apustena ape achenga kor nyo kyokonokwa.’ Melö kyaghanakwa anta ater ngalechi.

²⁴ Kalïkukwa penyï kïngata atanye kyonkïtwokwa.

²⁵ “Kïlenyona orïwan ngwïny tawu ECHOTYON osiswechoni le tömönut angwan nangat nko pöghet, ompöwölo kilenchanïn ECHOTYON owonyokwa.

²⁶ Asaghan nyinte lö, ‘We Echotyon TORORÖT, mewany piköku kegh cho kisörunyi aimïtunenyi koro Misri ompö owesyengu nyo wow.

²⁷ Inan mötworiku ompö Apraam nko Isak nko Yakopo. Meros oghïghyo mötöwöyi pïchï anta ghöyityengwa anta ngokikwa,

²⁸ tömötöp pipö koro Misri ntökïlö, “Kimemïnye ECHOTYON ntökumït chane kwit kor nyo kiyomisyï chane. Nka nyoni kipar ompö surkwen ompöwölo kilil.”

²⁹ Akwanyï piköku chane kegh, cho kimïtunenyi Misri ompö owesyengu nyo wow.’