KINONO KIRURUT 6 - PIPÏLIA

¹ “Achï nyu kirurutkö cho kimwowanïn ECHOTYON Tororötïnkwa anetakwa, atamuka oripö ompö kor nyo opetekwa ochengöy

² akwa nko monekwo nko moneko monekwo. Okonyïtö ECHOTYON Tororötïngwo, ompö osiswekwo löwïr, arip kirurutkachi löwïr chete omwowokwa asete, atökïchangit osiswekwo ompö koronini.

³ Ater ye nyu ngalechï, pïchï pö Israel arip. Atökuten osiswekwo atotösisyenö awesöchitu lenyini kiyomisokwa ECHOTYON Tororöt pö papotïnekwa lö lïku nyoni ompö kor nyo chang chö akïwow kumata.

⁴ “Atere ye nyu, pïchï pö Israel! ECHOTYON Tororötïncha kï ECHOTYON akonga.

⁵ Achama ECHOTYON Tororötïngwo ompö mïkuliskökwo kïmïkul nko ompö söponwekwo kïmïkul nko ompö owesyengwo kïmïkul.

⁶ Amowutyeghö kokay kirurutchï komwowokwa asete.

⁷ Anet monekwo, angalana otini ompuröy korikwo nko otini opestoy nko ato omungöy nko ato opöghisïyi.

⁸ Orötyinö ewunekwo nko tökochwekwo atökïlïkwï kiporunöt, atökunonwok.

⁹ Akirchï pölöwo kukoti korikwo nko parakuto ortïnekwa.

Rirunat nyo pö tighintön

¹⁰ “Kïkany otini kikumïtwakwa ECHOTYON Tororötïnkwa atolïtö koronanye kiyomisyï papotïnekwa ompö Apraam nko Isak nko Yakopo lö okonokwa, kanastin cho echön cho kipïpi cho melö kyatekakwa

¹¹ nko korïn cho nyïghitote tïkwïn löwïr cho pïchighöch cho melö kyanyïghitakwa nko kori pöghon cho melö kyapalakwa nko pareni sapipun nko arol cho melö kyakatkatakwa, cho omekwa ntopïghyö.

¹² Wölo orip kegh atömowutyeghö ECHOTYON nyo kimïtunenokwa koro Misri, wölanye kyochikwa sekey.

¹³ Okonyït ECHOTYON Tororötïngwo asagh nyinte onkït awalwal kegh ompö kaynenyi onkït.

¹⁴ Marïp tororötine walaka cho pö pipö punton cho möngöy kuwitwitokwa.

¹⁵ Tömötöp ntökïngwanit lakat ECHOTYON Tororötïngu ompö nyi akuwangenokwa ngwïny. Ompöwölo ECHOTYON Tororötïnkwa nyo mi nko akwa akï Tororöt nyo le söstoghin ompö tororötin walaka.

¹⁶ “Matyam ECHOTYON Tororötïngwo, le atanya kyatyamekwa ompö Masa.

¹⁷ Okil kegh lasiny arïp kirurut löwïr cho pö ECHOTYON Tororötïngwo cho kimwowokwa.

¹⁸ Agh nyu tïkwïn löwïr cho karamach cho pö man ompö ECHOTYON, atökuten osiswekwo. Atape achenga koronini karam kiyomisyï ECHOTYON papotïnekwa,

¹⁹ lö oyonöy pung löwïr cho mi tawunkwa le nyanye kiyomis nyinte.

²⁰ “Kïkany ato tepakwa asïyech monekwa lö, ‘Ompö ne tökïmwowecha Tororötïnyo keripö kirurut löwïr?’

²¹ Olenchï nyu chane, ‘Kikïchicha sekeyi Parao, ompö Misri. Kïsörunenecha ECHOTYON wöloni le Misri ompö owesyenyi.

²² Kuporchï ECHOTYON pipö Misri nko Parao nko konyi kïmïkul, tïkwïn cho echön cho pö töngönchin cho kikïsïwecha achane.

²³ Kumïtunenecha ECHOTYON korononi kepkana wölete wöl, atökïkonech koronï kiyomisyï papotïnecha.

²⁴ Akïmwowecha nyinte keripö kirurutkachi löwïr, akekonyït nyinte atökïripech kenyorunö köromnyö osis löwïr, le asete.

²⁵ Ato kikilöcha kegh kerip kirurut cho mwowecha ECHOTYON Tororötïnyo kï kakighacha kïgh nyo pö man.’