KINONO KIRURUT 4 - PIPÏLIA

¹ “Atolapay kïlenchï Musa pipö Israel, atera kirurut löwïr cho onetokwa arïp tösöpchenö atape amanga kor nyo konokwa ECHOTYON Tororöt pö kukötinekwa.

² Matas ngölyon nyonikïny ngalechï omwowokwa anta achïchuk ngale walaka, atamuka arïpa kirurut pö ECHOTYON Tororötïngwo.

³ Kyasïwekwa akwane kïyanye kigh ECHOTYON ompö kutïng pö Peor. Kipar nyinte chi anka tïkwïl nyo kisagha Paal* atoni.

⁴ Wölo tochikwa sötote löwïr nko nyete le ye cho kyarïp ECHOTYON, Tororötïngwo.

⁵ “Kyanetakwa kirurut löwïr kïrïp kegh nko wölo kimwowanïn ECHOTYON Tororötïnyan, atamuka arïpa ngalechoni ompö kor nyo opetekwa ochengöy.

⁶ Arip nyu kirurutchoni, ompöwölo porchini nyoni pipö punton löwïr ngöghomnyenkwa nko chïreryenkwa nyo otini kalïm chane kirurutchï, kïlö, ‘Wechï ngöghomöch akï chïreröch pïchï pö koronï awes!’

⁷ “Möminye korö anka kïrkegh kö awes lö ne, nyo tïng tororöt nyo lekïto chane le wölo lata ECHOTYON Tororötïncha otini kakïrirchicha nyinte.

⁸ Akï möminye ngat korö anka kïrkegh kö awes lö ne nyo tïng kirurut cho pö man le cho kanetakwa asete.

⁹ Wölo orip kegh nyoman atömotöp ntowutyeghö tïkuchanye löwïr kyasïwekwa. Amopïstö ngalechï asïyech kokay, omwochï monekwo tïkwïl ngalechoni nko moneko monekwa,

¹⁰ paraku asisanya kyoghyongekwa tawu ECHOTYON Tororötïnkwa ompö kutïng pö Sinay atanya kilenchanïn ECHOTYON, ‘Tuyenö pïchï kïpka wölo omitan atökïlïm ngal cho omwochinan chane, atökumï kunet kegh kïkonyïtanïn ompö osiswekwa löwïr. Atökumï chane kunet monekwa ngalechoni.’

¹¹ “Apkanakwa arikï aghyongö kutïng to, kïnagha ma kutïngay, ntökwit mïröt kwenu yïmwöy nyo kilum poltoy cho tïwöch nko tuwïn nyo wow.

¹² Kïngalana ECHOTYON mayay nko akwa alïmakwa ngalechi, wölo melö kyasïwekwa kïton nyonikïny poto kut onkït.

¹³ Kïmwowokwa lö orip mumanay* kyamakwa nko nyinte, choni kï kirurutchay le taman cho kikikirchï koghïn odeny cho töpölöl.

¹⁴ Kimwowanïn ECHOTYON osiswechoni alïkwï konetintenkwa nyo onetokwa kirurut löwïr cho mïchini arïpakwa ompö koronini opetekwa ochengöy.

Taghata saghata körkeyïn

¹⁵ “Melö kyasïwekwa kïton nyonikïny asisanya kingölonwokwa ECHOTYON ompö ma ompö kutïng pö Sinay. Kïlenyona orip kegh nyoman,

¹⁶ atömagh ngokï cho oghchini kegh körkeyïn anka tïkwïl nyo kipötöy, kö pö mïrön anta korka

¹⁷ anta kö pö tyony anka tïkwïl nyo mi ngwïny anta kö pö tarit anka tïkwïl nyo pilo yïm

¹⁸ anta kö pö työny anka tïkwïl nyo chuto mu ngwïny anta kö pö koghoghwö nyo mi pögh ori.

¹⁹ Makany ketyamak asagha anta opöghisyechï tïkwïn cho osöchinekwa yïm cho lata asis nko arawa nko kokel nko tïkwïn cho mi yïm löwïr. Kichöghchï ECHOTYON Tororötïnkwa tïkuchoni pipö punton walaka atökïsagh.

²⁰ Wölo kisörunenokwa ECHOTYON mapa karïn ompö koro Misri atalïkuna pikachi kegh otï le ye.

²¹ Kinörekyanïn ECHOTYON ompö akwa, akwam muma lö moghyonanye lalwanï pö Yordan akïlö molïtanye koronay karam konokwa ECHOTYON Tororötïnkwa omïle.

²² Wölo omeghchinan koronete, melö kïchömwanïn oghyot lalwa Yordan, poto akwa cho oghyot, atachenga koronini karam.

²³ Orip kegh nyu atömowutyeghö muma* ECHOTYON Tororötïngwo nyo kyam nko akwa. Amoghchï kegh körkeyïntin nyo kipötöy nyo pö kïgh anka tïkwïl nyo kitaghenakwa nyinte,

²⁴ ompöwölo ECHOTYON Tororötïnkwa kï ma nyo pelöy kïgh anka tïkwïl. Kï Tororöt nyo le söstoghin ompö tororötin walaka.

²⁵ “Kïrkegh otini kökemöngisyenyi korononi könyis cho chang aisïch moneku nko moneko moneku, motöp ntoghchï ngokï ECHOTYON Tororötïnkwa, oghchï kegh körkeyïn nyo kipötöy nyo pö kïgh anka tïkwïl nyo ighöy nyinte kïnöreköy.

²⁶ Okuran yïm nko ngwïny kïlïkwï söwikwa asisete, nyo ato otöpikwa ntapeny ngalechan, owonyokwa lömïs ompö koronete oghchinonekwa lalwa Yordan atachenga. Motïpïyokwanye wöloni osis cho chang, wölo kiwonyokwa lömïs.

²⁷ Toyenokwa ECHOTYON oghömune punton walaka, atongötunökwa nyu pich cho ngörï cho otïpisot nko pïchoni.

²⁸ Atolapay apekwa nyu asagha wöloni tororötin cho kikigha ket nko köghïn, tororötin cho melö rostoy anta lïm kïgh anta am kïgh anta nguchï kïgh.

²⁹ Wölo ato ayarakwa lasiny ECHOTYON Tororötïnkwa ompö wöloni onyorunekwa, ato ayarakwa nyinte ompö mïkulöwekwa kïmïkul.

³⁰ Kïkany ato omitekwa nyarïl akïpkonchokwa tïkuchoni löwïr, oyokyï kegh ECHOTYON Tororötïngwo ompö osisweku cho pö löt ater ngalechi.

³¹ Ompöwölo ECHOTYON Tororötïnkwa kï Tororöt nyo le kisyonin, melö iwunyi nyo gha anta wanyïn anta wutyeghö mumenyi nyo kyam nko papotïnekwa.

³² “Tepe köny ngala könyisyok, osis cho kitomönye keyiyinyi, kïngata otini kigh Tororöt chi ompö ngwïny. Aiyar ngwïny kïmïkul tesïwena lö ekïmi kïgh nyo wow nyo teno nyete nyo kikwigha anta mi chi nyo kakïlïm kïgh nyo wow nyo teno nyete?

³³ Ekïmi pikö walaka cho kakïlïm kuti Tororöt nyo ngölonuno ma le wölanye kilïmanyi akïsöpchö nya?

³⁴ Anta mi tororöt anka tïkwïl nyo kakumukyï kïchengchï kegh pipö punton akonga kïngetunö piko puntoni walaka? Akïtyamakwa ECHOTYON Tororötïngwo ompö kiporut nko töngönchin nko poryot nko ompö owesyenyi nyo wow anta ompö ighisyewut cho echön cho karkegh nko chanya kyasïwekwa nyinte ompö koro Misri.

³⁵ Kikiporwokwa ngalechoni atonkïtunö lö, ECHOTYON kï Tororöt akï möminye anka kïpoto nyinte onkït.

³⁶ Kipïswokwa alïma kutinyi nyo kingwïna yïm, atökumï kunetakwa. Akïkany asïwenakwa manyi nyo wow, ompö ngwïny alïmakwa kutinyi nyo ngölonuno ma.

³⁷ Akwompöwölo kicham nyinte papotïnekwa akïkïlakwa atolapay kumïtunenokwa koro Misri ompö owesyö nyo wow.

³⁸ Atökumï kïyon pipö punton cho echön akwowesöch tya kïtïlakwa, atökumïtakwa olïtö korengwa akïkonokwa kïlïkwï korenkwa nyo ochengöy le asisete.

³⁹ Kïlenyona onkïtï ye ompö mïkuliskökwo amowutyeghö lö, ECHOTYON kï Tororöt nyo mi yïm nko ngwïny, möminye anka.

⁴⁰ Oripö nyu kirurutkachi löwïr, cho komwowokwa asete, atökuten ortïnekwa nko nyo pö monekwa nko moneko monekwa, atökïchangit osiswekwo ompö konokwa ECHOTYON Tororötïnkwa kokay.”

Kanastin cho kïryöghchini cho mi Yordan okumpö kongasis

⁴¹ Atolapay kïngot Musa kanastin sömök cho kimi lalwa Yordan antakwagh okumpö kongasis,

⁴² cho rïpchini chi nyo kapar pöröryenyi ompö lelyot amelö kötïng syala nko nyinte atökumï nyu kïchïwïta meghat ato kakïlït kanasyan akonga ompö kanastinechoni.

⁴³ Kanastinechoni kï Peser nyo mi kor nyo le tömkö akï surkwen nyo kikitö pipö Rupen nko Ramot Kiliad nyo kikitö pipö Kad nko Kolan nyo mi Pasyan nyo kikitö pipö Manase.

Kakïkonï kirurut pö Tororöt

⁴⁴ Kitö nyu Musa pipö Israel kirurut pö Tororöt.

⁴⁵ Kirurutchoni kï söwintön nko mutata ngal cho kimwochï Musa pipö Israel otini kipkana koro Misri,

⁴⁶ ompö mpöghogh nyo kilekïtö Pet Peor, koro Sion pöytoghinto pipö Amori nyo kimi kongasispa lalwa Yordan nyo kimöngöy Espon, akiporyeghö Musa nko pipö Israel nyinte akïrïnta otini kingetunö Misri.

⁴⁷ Kïchenga korenyi kïlïkwï nyingwa akïpayta nko koro Ok pöytoghinto Pasyan. Pöytoghichoni kwodeny cho kipöytoy pipö Amori cho kimöngöy kongasispa lalwa Yordan.

⁴⁸ Kitorö korononi kanasyanta Aroer nyo kimi sörömu lalwa Arnon akïpusta ntökwit kutïng pö Sirion, nyoni kï kutïng pö Ermon.

⁴⁹ Akïtuyö nko koro Arapa nyo mi okumpö kongasis nyo pö lalwa Yordan akïröytö okumpö löt ntökwit nanampa Paryan nyo mi kongasis kutïng pö Piska to.