KINONO KIRURUT 34 - PIPÏLIA

¹ Kïweghö Musa tömköyi Moap akïpus kutang kutïng pö Nepo akïwö ntökwit kutïng pö Piska parak kongasispa Yeriko. Kuporchineghö ECHOTYON atoni koroswechï löwïr, kïngata koro Kiliad okumpö ewu löt ntökwit kanasyanta Dan

² nko koro Naptali kïmïkul nko koroswo Epraim nko Manase nko koro Yuda akïwö kutang okumpö ta ntökwit nanampa Kwen

³ nko koro Yuda okumpö ewu tagh nko tömkö nyo wegho Soar ntökwit Yeriko kanasyanta sostin.

⁴ Atolapay kïlenchï ECHOTYON Musa, “Anyï koronanya kyoyomisyan Apraam nko Isak nko Yakopo lö otöninan monekwa. Kamïtunyi yete atesïwena, wölo melö ochömunyi wete wölini.”

⁵ Kïlenyona, kïröpösyï Musa mötworinto ECHOTYON koro Moap le ato kimwa ECHOTYON.

⁶ Kïtïpchï ECHOTYON nyinte mpöghogh nyo mi koro Moap nyo ato topönöy kanasyanta Pet Peor wölo möminye chi nyo nkït otini kikïtïpchï nyinte nko nyete le ye.

⁷ Kitïng Musa könyis 120 otini kiröpösöy. Kitökïtïng owesyö nyinte akitökurosïtoy konyichi lasiny.

⁸ Kïrirchï pipö Israel Musa osis tömönut sömök ompö tömko Moap.

⁹ Kinyïghitate ngöghomnyö Yoswö wero Nun, ompöwölo kökikïl Musa nyinte. Kïterchï pipö Israel Yoswö akïrïp kirurutkachi cho kökikutö ECHOTYON chane kuwerï Musa.

¹⁰ Amelö kitökïrumunö werkoyon koro Israel nyo lata Musa. Kingalan ECHOTYON nko nyinte tokoch ompö tokoch.

¹¹ Akï möminye werkoyonte anka nyo kigh kiporut nko töngönchin cho kigh ECHOTYON kuwerï nyinte, ompö Parao nko mötworichi nko kore kïmïkul.

¹² Akï möminye werkoyonte anka nyo kimï kwigh tïkwïn cho echön cho pö otyogh le cho kigh Musa kïsïwïyi pipö Israel löwïr.