KINONO KIRURUT 33 - PIPÏLIA

¹ Achï kisoyönut cho kimwochï Musa nyo le chi pö Tororöt pipö Israel otini kitomö kïma.

² Kingwïna ECHOTYON kutïng pö Sinay, kipusuna Edom le asis akulïwchï pikachi kïngetunö kutïng pö Paran. Kimi nyinte nko malayken cho makïrar akimi ewunyi nyo pö tagh lyopötö.

³ Chömöy ECHOTYON pikachi, akï ghetöy kïlankachi. Kïlenyona kïrïpecha ngalechi aketerchï nyinte kirurutkachi.

⁴ Kïrïpecha kirurut cho kikonecha Musa, ompöwölo kilïkwï choni mïlata kö pö Yakopo.

⁵ Kilïkwï ECHOTYON pöytoghinto pipö Israel atanye kituyö piko ortïnekwa nko kintöghoghikwa.

⁶ Kïmwa Musa paraku pipö ara Rupen lö, “Nya kïsöp ara Rupen, kïrkegh kö ngörï chane.”

⁷ Akïmwa paraku pipö ara Yuda lö, “Iter lokekwa, we ECHOTYON! Ighomitö chane kïtuyö nko pikökwa. Iporyechï chane, we ECHOTYON, aingarak chane ompö pungkökwa.”

⁸ Akïmwa paraku pipö ara Lawi lö, “We ECHOTYON, iporï machatengu ompö Tumim nko Urim kuwerï mötworiku pipö Lawi cho ghönote. Kityamanyi chane ompö Masa aiporunyi kegh ompö pögho Meripa lö pö chane man.

⁹ Melö ki konyït yiyikwa amelö kiyang werkökwa, kisas monekwa, ompöwölo kirïp chane kirurutköku, akïlïkwï cho ghönote ompö mumengu.

¹⁰ Netöy chane pipö Israel kirurutköku, akunet monekwa ngaleku. Koninyi tïkwïn cho ngutoy cho onyïn, akïpelunyi amörostin ompö ato kïpelo amöros.

¹¹ Soyöno owesyenyi, we ECHOTYON akicham pöghisyewutkökwa. Iwany pungkökwa lömïs, amekany kïngetyö ngat.”

¹² Akïmwa paraku pipö ara Penchamen lö, “Achï pich cho chömöy ECHOTYON, gheto kegh chane nyinte, Ripöy ECHOTYON pïchoni osis löwïr, akïmang kwenungwa.”

¹³ Akïmwa paraku pipö ara Yosep lö, “Nya kusoyön ECHOTYON korengwa, akïropönchï pögh cho pkono yïm, akutö pögh cho kosuno ngwïny.

¹⁴ Nya kuyinuna akwa cho tömoghöch parenikwa, akïrïryö ompö oroyekwa.

¹⁵ Nya kïsïkönon kutïngkotikwa cho pö könyisyok ompö akwa ket, akïchangit akwa ompö komos cho pö kokay.

¹⁶ Nya kïnyïghï korengwa kïgh anka tïkwïl nyo karam, akïtöpö nko chane köromnyo ECHOTYON, nyo kingölonunö wuw nyo kinöghöy. Nya kïpka kisoyönutchete paraku Yosep, nyo le kintöghoghinto werkökwa.

¹⁷ Tïngeto Yosep owesyö nyo lata nyo pö kirïk, akïtïng kuy cho lata cho pö so. Yumtegho nyinte kuyechoni pipö punton, yonöy chane ntökwitïta sörömu ngwïny. Akï lata kuyechoni pipö Epraim cho makïrar nko cho pö Manase cho le elpun cho chang.”

¹⁸ Akïmwa paraku pipö ara Saplon nko Isakar lö, “Nya kïnyorï perur pipö ara Saplon ompö rutoghtöngwa, Akïtasa sïkönöto pipö ara Isakar ompö katangwa.

¹⁹ Kitach chane pich cho le pïnot ompö komoswekwa, akutötö amörostin ompö man. Nyoruno chane sïkönötengwa nanam, akïnyoru sïkönöt ompö söröm nanam.”

²⁰ Kïmwa paraku pipö ara Kad lö, “Nya kïsala Tororöt nyo tïsöy rotyo Kad! Syepsïyi nyinte le ngötïny, akïpul egh anta pempö möt.

²¹ Kichöghchï kegh chane kore wölo akwagh, kikitö chane kore nyo kipö kintöghoghï. Kirïp chane kirurut pö ECHOTYON löwïr atakinye kighömo kintöghoghi pipö Israel.”

²² Kïmwa paraku pipö ara Dan lö, “Lata Dan wawa ngötïny, nyo komuno Pasyan.”

²³ Kïmwa paraku pipö ara Naptali lö, “Kikisoyön Naptali keperur ECHOTYON ompö chomnyenyi, kïngata korengwa nanampa Kalilaya ntökwit okumpö ewu löt.”

²⁴ Kïmwa paraku pipö ara Asyer lö, “Nya kusoyönö Asyer kïtïl pipö ortïne walaka löwïr. Nya kïchama kegh werkökwa nyinte, Nya kïnyïghï mwaghpa arol korenyi.

²⁵ Nya kwoghïghitu kukoti kanastinechi le karïn, Nya kïtöpo nyinte ato tïghume kïtenö osis.”

²⁶ Kuwanta Musa lö, “Akwa pipö Israel, Möminye tororöt nyo karkegh nko Tororötïnkwa, nyo weru poltoy atökungarakekwa, ngwïno mïröt ompö ororyenyi.

²⁷ Tororöt nyo pö kokay nyo oryöghchinekwa, tighokwa ewunechi kokay. Kiyon nyinte pungkökwa otini kyomitekwa oletöy tagh, akïlenchokwa, ‘Apara chane lömïs.’

²⁸ Kïlenyona möngisïyi pipö Israel ompö kalya, akïmi ato tïghume kori pöghoni Yakopo ompö kor nyo chang pagh nko dipay,* owöy, ropönchini pögho yïm korenyi.

²⁹ Ochikwa ngörechote kïtya nya pipö Israel! Möminye chi nyo karkegh nko akwa, pich cho kisörï ECHOTYON, longenkwa nyinte nyo ghetokwa akï chokenkwa nyo konokwa rïntagh. Pkonchinokwa pungkökwa akïsaghsaghakwa lö, osyonchech, wölo otyökekwa chane.”