KINONO KIRURUT 32 - PIPÏLIA

¹ “Tere we yïm ngalechan, ailïm ngwïnya kutinyan!

² Röröku kinetutköchan le rop, le röyön ompö sökö. Pïspisu ngalechan le pkopïs cho ropönchini sus cho ngwïrngwïröch akïkarkegh nko pögh cho rörökyini sikoryon.

³ Omwotïtenan kaynata ECHOTYON, kïsal pikachi wowïn pö Tororötïncha!

⁴ “Ghat ECHOTYON akutenate ighisyenyi, ompöwölo pö man ortïnechi. Tororöt nyinte nyo möwöghokonye nyo puryö lelut, ighöy nyo karam amöminye lïsa.

⁵ Wölo kowöghökisyekwa amelö mïchini kekurenokwa pikachi ochikwa mwokïyis achï lïsï.

⁶ Oghchinekwa ECHOTYON so kïgh nyo gha lenyoni, akwa sölwöyichï söngengöch? Paponkwa nyinte nyo kighakwa, akïkonokwa söpon.

⁷ “Anane ye osiswo köny, aros pïnwöy cho kikuwer, atepe papotïnekwo atökuporwok, akïtö poyikwo atökïmwowok.

⁸ Kitö nyo Töror Tya punton koroswekwa, otini kichaghachagh chane, akichöghchï rotyotïnekwa Kïrïp kegh nko werpö Tororöt.

⁹ Ompöwölo kikïl ECHOTYON pipö ara Yakopo akïlïkwï pïchoni karerantanyi.

¹⁰ “Kinyorchï nyinte chane surkwen, wölo tïryal akï pö otyogh. Kïrïp chane akïkaman, le kontanyi nyini tuw.

¹¹ Kïle wölini netöy sich warechi kupiltoy akïnama chane köpepokachi, lenye nyoni wölo kiriptö ECHOTYON pipö Israel atömepïtyö.

¹² ECHOTYON onkït nyo kintöghoghchï pikachi melö kimi tororöt anka nyo le ton.

¹³ “Kitö chane kïpayta kor wölo le mösop, akwam tïkwïn cho kipkono paren. Akïlany ponit pö ghatoy, kïpita ketikwa cho pö arol wölo le kaghnötyan.

¹⁴ Kikosu kyaki Pasyan nyoman, kitïng chane kechir nko ngaror nko tïch, kikas nkanun cho törosöch akïgha dipay* cho pïchighöch.

¹⁵ “Kinöryö pipö ECHOTYON, wölo kimen, kinöryö chane akïpïghyö, atolapay kïpïstö Tororöt nyo kigh chane, akïsas Ghatyengwa nyo pö sörunöt.

¹⁶ Kigh chane ECHOTYON kïlïkwï söstoghin, ompö saghata tororötin walaka, kïnarek nyinte ompö ngokikwa.

¹⁷ Kipelchï chane amörostin tororötin cho möle, tororötin cho kimenkïtcha chane tororötin cho sis cho kimökonyïtcha kukötinekwa.

¹⁸ Kïwutyeghö chane Ghatyengwa, Tororöt nyo kigh chane. Tororöt nyo kitö chane söpon.

¹⁹ “Nyini kisïwa ECHOTYON lenyoni, kïnarek akïtagh monechi.

²⁰ Atolapay kïlö, ‘Melö tongörokan chane ngat, atasïwan kïgh nyo igho ompö chane, ompöwölo pïn nyete nyo chumpönote, monïng cho puryö kighanat.

²¹ Keghanïn chane alïkwï söstoghin ompö saghata kïgh nyo melö tororöt, keghanïn chane anarek ompö körkeyïntinekwa. Kïlenyona oghan chane kïlïkwï söstoghï ompö pich cho melö piköchan, oghan chane kïsasta punton cho le sölwöy.

²² Nöghöy nörekyenyan le lyopöt, akïnaghata ntökwit ngwen, pelöy kïgh anka tïkwïl nyo mi ngwïny, akïpel pchörino kutïngkot.

²³ “ ‘Otöninan chane nyarïl nyo puryö söröm, awutonan pïchoni kotichu löwïr.

²⁴ Tïghöy chane kömöy, akuwonyö ompö kilayat, wonyegho sömewut cho ghach. Oyonchinan tïpö wudïn kwam nko moroyut cho ghach kïsïr chane.

²⁵ Kisyepo chokon chane ompö sany, kïmi mïghöto meghat kö ori, meghsot karachïna nko tipïn, amelö ngötu mnyarkiltin anta poy.

²⁶ Kötowongan chane lökarpïs, atömökïmi chi nyo tökunonöy pïchoni ngat.

²⁷ Wölo melö opïsyinan pungkökwa kïkwol kegh lö, kakiwany piköchan akwanyï ante kegh nyo kawany chane.’

²⁸ “Melö ngöghomöch pipö Israel nyonikïny, amelö tïng chane sïkunöt.

²⁹ Ntökingöghomöch chane, kitenkïtu kïgh nyo kigho!

³⁰ Kïlö ne tökïyon chi akong pich cho le elpu akonga, akïyon pich odeny opïn pich elpun taman? Kïpoto ato kyalta ECHOTYON chane, akïpïstö Ghetintengwa chane.

³¹ Nkït pungkökwa lö, melö tïng tororötinekwa owesyö, amelö karkegh nko Tororöt pö Israel.

³² Chumpönote pungkökwa le pipö Sodoma nko Komora, karkegh chane nko keti sapipun cho rïröy akwa cho ngwonöch le ködöwï,

³³ lata dipaykakwa ngwono moroyut.

³⁴ “Wölo pïchighöch pipö ECHOTYON ompö nyinte, kïrorchï chane kaplwawachtanyi.

³⁵ Tököy ECHOTYON akuchop kong pïchoni, itïtoy asista ato pïtyot chane, ompöwölo karik asis nyo kiwongöy chane, akwitïta lawel nyarïltangwa.

³⁶ Söru ECHOTYON pikachi otini kasïwa lö kewonyö owesyengwa. Syonchini pich löwïr cho pöghisyechini nyinte, otini kasïwa nyörkölölyo pïchoni löwïr.

³⁷ Atolapay kïtep ECHOTYON pikachi lö, ‘Mi onö tororötinekwa, ghatyanay koghïponekwa?’

³⁸ Kyapaghekwa chane sunet pö amörostin, atökwa dipay. Akanye kïpka ye kungarakekwa akany kïpka kïsörwokwa.

³⁹ “ ‘Onkïtune ye nyu lö, ani onkït nyo ochï Tororöt, möminye tororöt anka kïpoto ani. Opöran atönan osopan, okotönan asop amelö mi chi nyo töghöy kïgh nyo oghan.

⁴⁰ Ochan Tororöt nyo söpöy, osyolan ewunyu awalwal lö,

⁴¹ Olïtan chokenyu kuryal asïwa lö kegha man. Otökan achop kong punkachu, amungön pich cho reyanïn.

⁴² Pïröchitu kotichan ompö kisönkökwa, pöröy chokenyan chi anka tïkwïl nyo töghanïn. Motukanye chi anka tïkwïl nyo poryeghenanïn owonyan löwïr kïrkegh cho kikekotön anta cho kikerat.’

⁴³ “Asala pipö ECHOTYON, akwa pipö punton, nyörilöy ECHOTYON kong pich löwïr cho pöröy pikachi akïlöstoghchï pikachi ngokikwa.”

⁴⁴ Kukorchï nyu Musa nko Yoswö wero Nun pipö Israel tumoni.

Ngala Musa cho pö söröm

⁴⁵ Otini kiwany Musa kïmwochï pïchoni kinetut pö Tororöt,

⁴⁶ kïlenchï, “Orip lasiny kirurutchï löwïr komwowokwa asete anet monekwo atökumï kïrip kirurut pö Tororöt osis löwïr.

⁴⁷ Molenchï kegh pö kwïle kinetutchï, wölo konokwa söpon. Arïpa atosöpchenö ompö osis cho chang ompö koronini oghchinekwa ompö lalwa Yordan atachenga.”

⁴⁸ Atolapay kïlenchï ECHOTYON Musa asisoni,

⁴⁹ “Pustena kutïngï pö Aparim mi koro Moap nyï topönöy kegh nko Yeriko aipusta kutïng pö Nepo atetopönö korononi pö Kanan karich otönön pipö Israel.

⁵⁰ Iröpösyinenyi kutïngï le atanya kiröpösï werïnkwa Aron kutïngoni pö Or,

⁵¹ ompöwölo kyosïmnyonökwa kaynenyan ompö kwenu pipö Israel, atanye kyagheghakwa pögh ompö Meripa, ato lekïto kanasyanta Kades nyo kimi surkwen pö Sin.

⁵² Itopönenyi kwïle koronini ompö wölo low, wölo melö ilïtenyi korononi otöninan pipö Israel.”