KINONO KIRURUT 30 - PIPÏLIA

¹ “Ato pkonchokwa tïkuchï löwïr le, kisoyönut nko chïput anan ECHOTYON Tororötïngwo ompö wölini köyonchokwa nyinte ompö puntonichoni omöngekwa tïkwïl,

² amïlonchö nko monekwo wölo mi ECHOTYON ompö mïkuliskökwo kïmïkul aterchï nyinte ngalechi chete omwowokwa ye.

³ Syonchinokwa nyu ECHOTYON Tororötïnkwa akuyokunenokwa puntonichoni löwïr kiyonchokwa nyinte akuperurokwa.

⁴ Ato mi pikökwa cho kikitoyö kïghömï ngwïny, kuyokunö ECHOTYON Tororötïncha wöloni,

⁵ atökumïtwakwa ECHOTYON Tororötïngwo apkana kor nyo kipö papotïnekwa atökïlïkwï nyinkwa, atökuperur tïkukwa kïtösisyö achangitukwa kïtïl papotïnekwa.

⁶ Nya kïlïkwï mutatenkwa machey nyo poru wölo ochömtokwa nko monekwo ECHOTYON Tororötïngwo ataleta tagh osöpchenö.

⁷ Wöghököy nyinte chïputchoni tökwam pungkökwa cho kighöchokwa akuchopokwa kong,

⁸ atamuka arïpa ngalechï omwowokwa asisete.

⁹ Perurokwa ECHOTYON osïkö ompö kïgh anka tïkwïl nyo oghekwa. Konokwa monïng cho chang nko kyak nko omisyö nyo wow, ompöwölo ngörökyinekwa ECHOTYON otini kaghakwa nyo karam kïle wölini kingörokyï nyinte papotïnekwa.

¹⁰ Wölo mïchinokwa oripö ngal löwïr cho kirote kitapunï pö kirurut. Owöghökisyenö nyu arïp ECHOTYON Tororötïngwo ompö mïkuliskökwo kïmïkul nko ompö söponwekwo kïmïkul.

¹¹ “Melö aghïgh tya ompö akwa kirurutyonï omwowokwa ye amelö low.

¹² Melö mi yïm nyo olentekwa, ‘Ekï ngo nyo pustoy wölini atökurekwecha, atökemuka kelïma akerip?’

¹³ Amelö mi nanam antakwagh nyo kötö omwoghekwa lö, ‘Ekï ngo nyo oghyot nanam atökwipkecha atökemuka kelïma akerip?’

¹⁴ Wölo mi ngölyontononi ato lekïtenokwa nyoman, onkïtökwa akïmi mïkulöwekwa. Kïlenyona, orip.

¹⁵ “Akïla asisete söpon anta meghat, köromnyö anta ghöyityö.

¹⁶ Ato achamakwa ECHOTYON Tororötïngwo orip kirurutkachi löwïr cho omwowokwa asisete, osöpchokwa nyu atösisyö akusoyönokwa nyinte ompö koronini opetekwa ochengöy.

¹⁷ Wölo ato ataghakwa arïpa ECHOTYON, asagh tororötin,

¹⁸ omwowokwa nyoman asisete lö owonyokwa lömïs. Ngörïngitu osiswekwa ompö koronini opetekwa ochengöy ompö lalwa Yordan antakwagh.

¹⁹ Akïla ye nyu söpon anta meghat, kisoyönöto Tororöt anta chïpötenyi. Okuran yïm nko ngwïny kïlïkwï söwikwa ompö kïyoni kakïlakwa. Akïla nyu söpon atosöpchenö nko monekwo.

²⁰ Achama Echotyon Tororötïngwo arip ngalechi anomnyotö nko nyinte, atosïkö söpön akïtösisyö osiswekwo, atamuka otïpinö korononi kiyomisyï ECHOTYON papotïnekwa Apraam nko Isak nko Yakopo lö otöni chane.”