KINONO KIRURUT 23 - PIPÏLIA

¹ “Möminye chi nyo kikelat anta nyo kakemutïta pïrïtenyi kïtas kegh nko pipö ECHOTYON.

² “Möminye chi nyo le kighosan nyo tuyot nko pipö ECHOTYON anta chini le monechi ntökwit pïnwöy taman.

³ “Möminye chi pö pipö Amon anta nyo pö pipö Moap nyo tuyot nko pipö ECHOTYON anta chini le monechi ntökwit pïnwöy taman.

⁴ Ompöwölo kitagh chane kïkonokwa omisyö nko pögh atakinye kyopkonokwa Misri, akwal Palaam wero Peor nyo ngwïno Petor nyo mi Mesopotamia kïchïpokwa.

⁵ Wölo melö kïchömchï ECHOTYON Tororötïnkwa Palaam lenyoni, wölo kïwaghach chïpötonay kïlïkwï kisoyönöt, ompöwölo kichamakwa nyinte.

⁶ Kïlenyona, motöp lö kingöroköy puntonichoni kïsïch kalya anta sïkönöt kokay.

⁷ “Motöp lö osösöy pipö Edom, ompöwölo werkökwa chane amasas pipö Misri, ompöwölo kyochikwa ton ompö korengwa.

⁸ Muköy monekwa cho pö pïnta nyo pö sömök kïtuyö nko pipö ECHOTYON.

Kitïlilöto wölo möngöy pipö lïk

⁹ “Akwotini omitekwa möngot ato le osiswo poryot, olowitö kegh kïgh anka tïkwïl nyo ighokwa orusitunö.

¹⁰ Ato mi chi anka tïkwïl ompö akwa nyo kerwotïtö akwam menyon akany kïweghö möngot kutang sany akïtöpö wöloni.

¹¹ Wölo otini karich kwimön akany kïmwat kegh apïsyï kïlït möngot otini köröytö asis.

¹² “Akï mïchini kïmi wölo wetöy chi kïsiröy ompö möngot.

¹³ Mïchini kïtïng chi köpompö ompö korichi nyo ato mököy kusiröy, kïpal ngwïny akwotini kewonyö kïtïp.

¹⁴ Agha möngengwo kïtïlilit, ompöwölo mi nko akwa ECHOTYON Tororötïnkwa möngot, atökïkonokwa owesyö nyo irïntegho punkökwo. Irip kegh nyu tömegha kïgh nyo le sïmnyon, atö megh nyinte kïwaghaka akïpïstokwa.

Kirurutkö walaka

¹⁵ “Mayoda sekeyon ato perunö wölo mi echotyontenyi akungwïn wölo omitekwa lö tagheta nyinte.

¹⁶ Opïsyinökwa kïmang kanasyan anka tïkwïl nyo kakïl nyinte. Amakany kerey nyinte.

¹⁷ “Kïkïro tipö Israel nko werkö cheporesnan ompö Kö pö Tororöt.

¹⁸ Amopï Kö pö ECHOTYON Tororötïngwo ropïyen cho kakïnyorï ompö or nyo lata nyoni ataghakteghena kiwalwalatengwo, ompöwölo ghöchini ECHOTYON Tororötïnkwa ngalechoni.

¹⁹ “Akwoto ipösönchï werïngwo chi pö srael ropïyen anta omisyö anta kïgh anka tïkwïl, maghak tösöw.

²⁰ Omukekwa oghoke chi nyo le ton tösöw ompö kïgh nyo kopösönchikwa, wölo mopösönchï werïngwo chi pö Israel aghach tösöw, atenyorunenö kisoyönöt ECHOTYON Tororötïngu ompö kïgh anka tïkwïl nyo ighekwa ompö korononi opetekwa ochengöy.

²¹ “Ato awolwolchikwa kïgh ECHOTYON Tororötïngwo, atötö lawel, ompöwölo mökonokwa nyinte kïyoni. Akïlïku ngokï ompö akwa ato motötekwanye.

²² Wölo ato melö kowolwolchikwa nyinte kïgh, kïmelö ngokï ompö akwa.

²³ Irip lasiny agh kïgh nyo kengwïna kutïwekwo, kïrïp kegh nko kiwalwalatengwo ompö ECHOTYON Tororötïngwo.

²⁴ “Ato awerata pareto pöröryengwo nyo pö sapipun, omukekwa omey sapipun ntopïghyö, wölo motö walaka mïlotwekwo.

²⁵ Ato iwerata pareto pöröryengwo nyo pö matay omukekwa opoke yiti, wölo makas.