KINONO KIRURUT 21 - PIPÏLIA

¹ “Ato kïnyorï chi nyo kakïpar amenkïtnye chi lö ngo nyo kapar ompö koronini konokwa ECHOTYON Tororötïnkwa

² akany kïtuyö poyikwa nko kirwokikwa, atökïpka kupim koghïn kïngeta otini kakïnyorchï mïntïrïch ntökwit kanastin cho lekïtöch.

³ Atolapay kïyörï poyi kanasyantanoni lekïto atoni kakïnyorchï mïntïrïch mösör nyo tomönye kepöghisyeghö.

⁴ Akïkat ntökwit ato lekïto champilwa nyo mi pögh cho melö tengöy, wölo tomönye kengor, atolapay kïkwïl.

⁵ Petöy wölini tïkwïl pipö Lawi cho le tïsï, ompöwölo chane cho kikïl ECHOTYON Tororötïnkwa atökïpöghisyechï nyinte akusoyön pich ompö kaynenyi. Akï chane cho sötöy syölut anka tïkwïl nko ngala pich cho kïporyö akeghöy kïrïp kegh nko ngalekwa.

⁶ Wuno nyu poyi kanasyantanoni lekïto atoni kömeghchï chi morikwa paraku mösörunoni kakïkwïl ompö le champilwa,

⁷ akïlö, ‘Melö kakïtïghöcha chichï amelö kinkïtöcha lö ngo nyo kötïgh.

⁸ Heywey! ECHOTYON, ilöstoghchï piköku Israel cho kimïtunenyi koro Misri. Ilöstowecha amekany kwamecha kisön pö chi nyo puryö lelut.’

⁹ Mökwomokwanye nyu kisönchay puryö lelut, ompöwölo kaghakwa kïgh nyo mököy ECHOTYON.

Ngala kor cho kakïnama poryot

¹⁰ “Ato asetekwa lïk atoporyenö nko punkökwo, akutö ECHOTYON Tororötïnkwa chane morikwa arangakwa chane kïlïkwï naman,

¹¹ akïsïwa chi korka nyo pïchigh ompö kwenungwa, nyo mököy lö roko kop.

¹² Kwip katanyi akïrwach akïmut sighokachi,

¹³ akïwaghach sïrokachi. Akïkany kïtöpö kïrir pikökwa ompö arawa akonga. Atolapay kwip nyu.

¹⁴ Ato mi löt kïtagh nyinte, kutyak ametöp lö oltoy ompö ropïyen le sekeyon ompöwölo kikirïwotenyi nyinte.

Ngala mïlata worö nyo le poret

¹⁵ “Ato ip chi koruchi odeny akïcham anka kïsas anka akïsïch chane kwodeny monekwa, akïlïkwï poret weri nyo pö kokonay kïsösöy,

¹⁶ akwotini mököy nyinte kuporchini monechi tïkwïn, kïmelö mïchini kïcham weri nyo pö kokonay le chaman akwigh nyinte kïlïkwï poret nyinö kötö lïku weri nyo pö kokonay kïsösöy.

¹⁷ Wölo mïchini kutö poretyenyi tïkwïn cho kitöni kïnyïl odeny, kïrkegh kö weri nyo pö kokonay kïsösöy, ompöwölo ki poretyenyi tagh nyinte. Nyo mïchini kïnyorï monïng nyo le poret mantanyi.

Ngala worö nyo aghïgh möt

¹⁸ “Ato tïng chi worö nyo aghïgh möt akï penyöy ngal akï melö teröy kuti yiyichi kïrkegh kakïmuny lö ne, kï melö terchini chane,

¹⁹ akany nyu kïnam yiyichi akumïtyï poyi kanasyantenyi atökerwokyï.

²⁰ Mwochini chane poy lö, ‘Aghïgh möt werï akï penyöy ngal, mölïmönye kïgh, chi nyo pöghisyegho ropïyen nyo gha akï tömösin.’

²¹ Wiro nyu nyinte koghïn mïrön pö kanasyantanoni ntökïma. Aranoni nyo omukekwa onoteghone ghöyityö ompö kwenunkwa, ato lïm pipö Israel kuwöghisyö.

Kirurutkö walaka

²² “Ato igh chi ngokï cho mïchini kïmegha aketïgh nyinte akewusö ket,

²³ mopïsyï kïrï ketoni ntökïyech, ompöwölo mi chïpöto Tororöt paraku chi nyo kiwuso, kïlenyona otïp nyinte asisoni atömosïmnyon kor nyo konokwa ECHOTYON Tororötïnkwa.