KINONO KIRURUT 17 - PIPÏLIA

¹ “Ameyenchï ECHOTYON Tororötïngu amöros nyo pö egh anta kech nyo melö tenate anta nyo le sölwö, ompöwölo ghöchini nyoni ECHOTYON Tororötïngu.

² “Kïkany ato rumunö chi kanastinekwa cho koninyi ECHOTYON Tororötïngu, ato kö mïrön anta korka nyo ighöy tïkwïn cho ghach akï peny mumenyi,

³ kïpöghisyechï akïsagh tororötine walaka cho lata asis anta arawa anta kokel cho kyataghan,

⁴ ato ilïmanyi ngölyon nyo lata nyoni, ikït nyu lasiny. Nyini inkïtunyi nyo pö nyoman lö kigha kïyoni gha ompö kwenu Israel,

⁵ imït nyu chichoni kegh kïyoni gha kïweghö kanasyantengu aiwira koghïn ntökïma.

⁶ Kïtïghöy chichoni ompö söwintöno pich odeny anta sömök wölo motïgh nyinte ompö söwintöno chi akonga.

⁷ Ikany kïnya pïchoni le söwï kïwir chichoni kïtïgh, atolapay kïwir nyu pikö walaka. Aranoni nyo omukekwa onoteghone ghöyityö ompö kwenunkwa.

⁸ “Ato mi ngölyon nyo kepölinyi nyo pö tïkwïn cho kiporöy kïmoyot anta chi nyo kakïrïng anta chi nyo kakïpar ompö lelyot anta nyo kakïpar ompö kwötyin, iwö wölini kakïl ECHOTYON Tororötïngu kesagha nyinte,

⁹ wölo mi tïsï cho le pipö Lawi aitep kirwokin nyo mi kïpöghisïyi osiswechoni, atökuporun wölo kïmutïtoy kirwoke.

¹⁰ Poru chane wöloni kamutïta kirwokengwa. Irïp ngalechoni löwïr omwowunyi chane,

¹¹ Amerop kamas itang ewu tagh anta nyo pö löt ompö kirwokengwa.

¹² Kïtïghöy chi anka tïkwïl nyo penyöy ngala tïsin nyo mi kïpöghisïyi osiswechoni anta kirwokin. Aranoni onkït nyo iwongonyi ghöyityö nyo lata nyoni ompö Israel.

¹³ Lïmöy nyu chi anka tïkwïl akuwöghisyö, amelö tökïmi nyu chi anka nyo tökumukyini kwighöy lenyoni.

Wölo kïkïltoy pöytoghin

¹⁴ “Otini katakwa koronini konokwa ECHOTYON Tororötïnkwa atechenga amang, alekwa kïmököy pöytoghin le pipö punton cho kimang kuwitecha,

¹⁵ aros nyu lasiny lö kakïl ECHOTYON chichoni oghekwa kïlïku pöytoghin. Akïl chichoni ompö pikökwo kegh. Metöp ntakïl chi nyo le pïnotyon kïlïkwï pöytoghin.

¹⁶ Merokonye kïtösyï kegh pöytoghintö angoletin anta yonta pich kïpa Misri kïrongwï angoletin atökïtas, ompöwölo kilenchokwa ECHOTYON, ‘Momïlonchenö ngat koronini.’

¹⁷ Amömïchininye kïtas nyinte kor cho chang, atömötöp mïkulöwunyi ntökïwaghaka ompö ECHOTYON amakany kuchangit tya ropïyen nko koltin.

¹⁸ “Akwotini kalïkwï pöytoghin nyinte, kuroko kïtïng kitapu kirurut pö Tororöt nko kinetut cho pkono kitapï nyo tïng tïsï cho le pipö Lawi.

¹⁹ Mïchini kutö nyinte kitapunoni kamasunyi akusomön osis löwïr otini tökïsatate nyinte, atökumï kïkonyït ECHOTYON akïrip ngalechi cho mwoghöy.

²⁰ Ighöy nyoni pöytoghintononi kwip kegh ngwïny atökunkïtï lö karkegh nyinte nko pipö Israel walaka, tömötöp ntökïpeny kirurut pö ECHOTYON ompö or anka tïkwïl. Pöytoy nyu nyinte ompö könyis cho chang. Akïpayta monechi Israel ompö pïnwöy cho chang.