KINONO KIRURUT 16 - PIPÏLIA

¹ “Irip arawa Apip* aighchï ECHOTYON Tororötïngu Pasaka, ompöwölo kimïtuneninyi arawanoni nyinte koro Misri oghö kwen.

² Kïlenyona, iyenchï ECHOTYON Tororötïngu omisyo Pasaka, nyo pö kechiryeku anta twaku ompö wölini kakïl kesagha nyinte.

³ Akwotini omenyi omisyononi, meam nko makatin cho kakitö mumar, omenyi osis mut nko odeny makatinechoni, choni kï makatina kichopat, ompöwölo kirïpuneninyi koro Misri. Atenana ompö osisweku löwïr asisoni kiwuwunenyi koro kichopat.

⁴ Amekany kesöchï mumar kestonikwo löwïr ompö osis mut nko odeny amekany kïngotï peny ntökïyech nyo iyengenyi asisto tagh ato le nangat.

⁵ Ameyenchï omisyo Pasaka kareran anka tïkwïl nyo pö korononi koninyi ECHOTYON Tororötïngu,

⁶ kïpoto wölini kakïl kesagha nyinte. Igh lenyoni mönon otini karich kïröytö asis, ato teno atanye kingwïnenyi koro Misri.

⁷ Ighogh atyamena wölini kakïl ECHOTYON Tororötïngu kesagha, atolapay imïla asïyech tökwoghö katangu.

⁸ Omenyi makatin cho puryö mumar ompö osis mut nko akonga. Kïkany asisto mut nko odeny kïtuyechï pich wölo mi ECHOTYON Tororötïngu ompö saghat amegh ighisyö anka tïkwïl asisoni.

Ichon pö Ilö

⁹ “Iyit wïkin mut nko odeny kïngata asisini ketowunyi il pagheku.

¹⁰ Atolapay igh Ichon pö Ilö, ipï ropöwo chomnyogh ikonyïtö ECHOTYON Tororötïngu kïrïp kegh nko wölini kesoyöntinyi nyinte.

¹¹ Ngörökyinö nyu ECHOTYON Tororötïngu, nyi nko moneku nko mötworiku löwïr nko pipö Lawi nko ton nko panan nko mïsïk cho mi kanastineku. Igh lenyoni ompö wolini kakïl ECHOTYON kesagha nyinte.

¹² Ainan lö kichinyi sekeyon tïkwïl ompö Misri, irip nyu kirurutchï löwïr.

Ichon pö Tunkun

¹³ “Kïkany otini kewany ilïw pagheku löwïr aipïr akweku cho pö sapipun, igh Ichon pö Tunkun ompö osis mut nko odeny.

¹⁴ Aingarak nyu nko moneku nko mötworiku nko pipö Lawi nko ton nko panan nko mïsïk cho mi kanastineku.

¹⁵ Aikonyït ECHOTYON Tororötïngu otini omenyi Ichon pö Tunkun ompö osis mut nko odeny ompö wölini kakïl ECHOTYON kesagha nyinte, ompöwölo soyöninyi nyinte ompö pagheku kïmïkul nko ighisyewutköku, atemuka ngaraka nyoman.

¹⁶ “Pkonöy piköku löwïr cho le mïrön wölo mi ECHOTYON Tororötïngu kïnyïl sömök ompö köny anka tïkwïl ompö wölini kakïl kesagha nyinte, ompö Ichon pö Pasaka nko Ichon pö Ilö nko Ichon pö Tunkun. Mekany kïpka pich wölo mi ECHOTYON Tororötïngu nko morïn cho tïryolöch.

¹⁷ Akany kutötö chi anka tïkwïl kïle ato kemuköy, kïrïp kegh nko kisoyönöt nyo ketö ECHOTYON Tororötïngu nyinte.

Wölo kïrïptoy ngala man

¹⁸ “Kira kirwokï nko yetïntin cho pö kanasyan anka tïkwïl nyo koninyi ECHOTYON Tororötïngu, atökurwokyï pich ompö man.

¹⁹ Makany kïmas chane ngala man amakany kïrïwochï wop akonga anta cheng asoya, ompöwölo konyi pich cho ngöghomöch, akuryal ngala man.

²⁰ Irïp ngala man kïpoto, atesöpö aicheng kor nyo koninyi ECHOTYON Tororötïngu.

²¹ “Ametö körkeyïn pö ket nyo pö Asyera* atolekïtö ato kïpelo amöros pö ECHOTYON Tororötïngu.

²² Ametek pchöri kogh nyo kïsogho körkeyïntin, ghöchini nyoni ECHOTYON Tororötïngu.