KINONO KIRURUT 14 - PIPÏLIA

¹ “Ochikwa pipö ECHOTYON Tororötïnkwa. Kïlenyona mawat nyu porwöyikwo amarwak mötöw ato ma chi.

² Ochikwa pich cho tïlilöch ompö ECHOTYON Tororötïngwo cho kikïngotokwa nyinte akakïlakwa ECHOTYON alïkuna pikachi kegh ompö kwenu puntoni walaka löwïr ompö ngwïny.

Tyonkïn cho tïlilöch nko cho le sïmnyon

³ “Mam kïgh anka tïkwïl nyo le sïmnyon.

⁴ Achï tyonkïn cho omekwa: tany nko kech nko aran

⁵ nko cheptirkich nko asarïch nko ptukö nko arta wuw nko kecha kamas nko korinya anta siran.

⁶ Omekwa tyony anka tïkwïl nyo sakate putïlyö akuntoröy ngömïgh.

⁷ Wölo mam tyonchï kïrkegh kentoröy ngömïgh anta sökote putïlöy, tamas nko plekwa nko kaner ompöwölo ntoröy ngömïgh amelö sökote putïlöy. Sïmnyon tïkuchoni ompö akwa.

⁸ Mam nkïruwen, ompöwölo kïrkegh sökote putïlöy kïmelö ntoröy ngömïgh. Sïmnyon kïyoni ompö akwa. Maswany nyo kama.

⁹ “Achï tïkwïn löwïr cho omekwa cho mi pögh: kïgh anka tïkwïl nyo tïng köpepoy nko res,

¹⁰ wölo mam anka tïkwïl nyo mötïngnye köpepoy anta res. Sïmnyon kïyoni ompö akwa.

¹¹ “Omukekwa ome törit walaka löwïr cho melö sïmnyon karamach.

^12-18 Wölo mam töritwechï: sich nko pyukïk nko sirörö nko kamchereres nko mötony nko chesampï nko kukayoy nko cheptusonkol nko wutpöghö nko kachïlïkoköch nko kongoy nko cho karkegh nko mpaw nko reres.

¹⁹ Sïmnyon tïku löwïr cho mïnkech cho tïng köpepoy, mam tïkuchoni.

²⁰ Omukekwa ome tïkuchoni walaka löwïr cho melö sïmnyon.

²¹ “Mam tyony nyo kama onkït. Omukekwa otönö ton nyo mi kestonikwa atökïnyorï kïgh nyo omöy anta olchï pipö punton walaka, ompöwölo ochikwa pich cho tïlilöch ompö ECHOTYON Tororötïnkwa. “Maghogha wawa cheko kame.

Kirurut pö kareranpa taman

²² “Otötö kareranpa taman cho pö tïkwïn löwïr cho pkono parenikwa köny anka tïkwïl.

²³ Atolapay apa wölo kakïl ECHOTYON Tororötïnkwa kesagha nyinte ama wölini kareranpa taman cho pö paghekwa nko dipay* nko mwaghpa arol nko twatan pö kyakikwa. Oghekwa lenyoni atonkïtunö okonyïtö ECHOTYON Tororötïngwo kïtenö osis.

²⁴ Kïkany ato lowit tya atoni kïsogho ompöwölo omöngekwa nyo momukekwanye okösöne wölini kareranpa taman nyo pö paghekwa cho kesoyönwokwa ECHOTYON,

²⁵ alta nyu tökïwöghökisyö kïlïkwï ropïyen ap wölini kakïl ECHOTYON Tororötïngu kutö kaynenyi.

²⁶ Atolapay olonekwa ropïyenichoni kïgh anka tïkwïl nyo kömököy, ato kö tïch anta kechir anta dipay anta kumïn anta kö kïgh kïnye anka tïkwïl nyo pïrchinokwa mu, ama tawu ECHOTYON Tororötïngwo angörekyö nko monekwo.

²⁷ “Mopïstö pipö Lawi cho omöngekwa tïkwïl, ompöwölo melö tïng chane kor nyo mïlöy nko akwa.

²⁸ Kïkany ato mi sörömu könyito sömök opï kareranpa taman cho pö tïkwïn löwïr cho kirïrwokwa könyinoni arorchï kanastinekwo.

²⁹ Atökïpka kwam pipö Lawi cho mötïngcha kor nyo mïlöy nko akwa nko to nko pönon nko mïsïktin cho mi möngöy nko akwa, atökusoyönokwa ECHOTYON Tororötïnkwa ompö kïgh anka tïkwïl nyo oghekwa.