KINONO KIRURUT 10 - PIPÏLIA

¹ “Atolapay kïlenchanïn ECHOTYON, ‘Pata koghïn odeny cho töpölölöch cho karkegh nko chanya pö tagh, atolapay ipusï kutïng wölï omitan aigh Santukï nyo pö ket

² atokirchan koghichoni ngalechanye kimi koghichanya pö tagh kitïghönyi, atetönö Santukunoni.’

³ “Kïlenyona aghan Santukï nyo pö tilak, atolapay apatan koghïn odeny cho töpölöl cho karkegh nko chanya pö tagh, apön apus kutïng.

⁴ Kukirchï ECHOTYON koghichay ngalechanya pö tagh le kirurut taman, chanye kökimwowokwa nyinte ompö kutïng kïngetunö ma ompö asisanye kyotuyeghekwa kutïng. Atolapay kïkonanïn ECHOTYON koghichoni.

⁵ Kïlenyona orökunan kutïngay atönön koghichay santukunoni lenyini kimwowanïn ECHOTYON.”

⁶ (Kïpegha pipö Israel kori pöghon cho pö pipö Yakan, akïpa kutang Mosera. Kïrapas Aron ompö wöloni aketïpchï korononi. Kïlïkwï tïsin werïnyi Eleasar kuker nyinte.)

⁷ Kïpegha atoni ntökwit Kudkoda akïpegha atoni kutang Yotpata, kor nyo kinyïghï pögh.

⁸ Kïkïl ECHOTYON osiswechoni pipö ara Lawi kwip Santukunay pö Muma* atökïpöghisyechï ECHOTYON, atökusoyön chane pich ompö kaynenyi nko nyete le ye.

⁹ Kïlenyona, mötïngnye pipö Lawi kor nyo mïlöy. ECHOTYON nyo le mïlatengwa lenyini kiyomisyï ECHOTYON Tororötïnkwa chane.

¹⁰ “Ompurön wölini le kutïng le nyanye pö tagh ompö osis tömönut angwan nko nöngötuskökwa. Kïterwanïn ngat ECHOTYON sowutkachu. Melö kitökïcham nyinte kuwanyokwa.

¹¹ Kïlenchanïn ECHOTYON, ‘Ngeta aiwö intöghoghchï pïchï atökïcheng kor nyo kyawalwalan lö, otönan papotïnekwa.’

Kïgh nyo mököy Tororöt

¹² “Atere ye nyu pipö Israel kïgh nyo mökenokwa ECHOTYON Tororötïnkwa. Okonyïtö ECHOTYON arip ngalechi löwïr cho kimwa. Chama apöghisyechï ompö mïkuliskökwo kïmïkul nko ompö söponwekwo kïmïkul.

¹³ Orip kirurutkachi löwïr cho omwowokwa asete atökuten otöptönkwa.

¹⁴ Pö ECHOTYON yïmwöy nko ngwïny nko tïkwïn löwïr cho mi ori.

¹⁵ Wölo kicham ECHOTYON papotïnekwa nyoman, ntökïkïlakwa kïtïl pipö punton löwïr, wölo lata asisï.

¹⁶ Kïlenyona, nya kïlïkwï mutatenkwa machey nyo poru wölo ochömtokwa ECHOTYON ompö mïkulöwekwa amalïkuna ngat pich cho ongeröch mötöwöy.

¹⁷ Ompöwölo ECHOTYON Tororötïnkwa, kï Tororöt pö tororötin akï Echotyonto echot. Tororöt nyinte nyo awes nyo kiwöghöy akekonyïtöy nyo melö chomöy pich walaka kïtïl walaka anta cham asoya.

¹⁸ Nyinte nyo ngöroköy nyo le panan nko mïsïk akïchömöy ton akutöni omisyö nko sïro.

¹⁹ Nyo mïchinokwa achama to, ompöwölo kyochikwa to ompö koro Misri.

²⁰ Okonyïtö ECHOTYON Tororötïngwo apöghisyechï nyinte. Otuyö kegh nko nyinte lasiny awalwal ompö kaynenyi.

²¹ Sala nyinte, ompöwölo Tororötïnkwa nyo kighwakwa tïkwïn cho pö töngönchin akï pö otyogh cho kyasïwekwa.

²² Ki pich 70 kïpoto papotïnekwa cho kipa kïröytö koro Misri, wölo kitasakwa ye ECHOTYON Tororötïnkwa achangituna le kokelya yïm.