KALATIA 5 - PIPÏLIA

Akaman kityakatengwo

¹ Kïchicha tyokote akï Kristo* nyo ketyakecha! Oghyongö nyu lasiny amakanya ngat kerötyok mïchoki sekeynön.

² Atere ya ngalechan! Ante Paulö nyo ongölonöy nko akwa lö, ato achamakwa ape tum, kïmonyorunokwanye Kristo kïgh nyonikïny.

³ Oliman ngat orirwokwa lö, chi anka tïkwïl nyo chömchini kegh kemutöy, kïmïchini kïrïp kirurut löwïr.

⁴ Ato omökekwa keyitwokwa man ompö ara kirurut, kï kopesyekwa nko Kristo amitekwa sanypa pöropcho Tororöt.

⁵ Kikönecha cho le acha lö, ighecha Tororöt ketene nko nyinte ompö owesyo Mïkulögh nka nyete kikönisïyecha ompö ara kighanat.

⁶ Ompöwölo ato kaketuyecha nko Kristo Yeso kïmelö kïgh ato kakïpa tum anta ewo. Kïgh pat nyo pïchigh kï kighanat nyo pöghisïyi ompö chomnyogh.

⁷ Wechï kyoghekwa nyo karam! Ngo nyo kighakwa nyo atagha man nya?

⁸ Melö Tororöt nyini kikurokwa nyoni kitaghenakwa.

⁹ Kïmwoghöy lö, “Ighöy mumar cho ngörï makatyan kïkutï!”

¹⁰ Otïngetan kikönöt nyo wow ompö akwa ompö Echotyon lö melö ochikwa pich cho otïngetö kinonut cho sis nko chichan. Kïkany chi anka tïkwïl nyo susokwa ato kö ngo anta ngo kuchopöy kong Tororöt nyinte.

¹¹ Wölo monkïtönye nyo le ani werköcho lö, ekwompö ne tökemi kegheghchinanïn otini tomitan omwochini pich lö, mïchini kepa tum? Ntökilenyoni, kitö melö ipu arasï nyonikïny amtaghtanyan nyo pö kimurtöwonto Kristo.

¹² Wechï kötomökan lö, tölat kegh pïchoni luklukokwa.

¹³ Wölo cho le akwa, werköcho, kikïkurokwa otyokisyenö ompö pïrchintino ngwïny, wölo makany kwighakwa kityakatengwo opöghisyechinö möchut pö por, nyinö kötölïku nyoni, opöghisyechï kegh ompö chomnyogh.

¹⁴ Ompöwölo kiwontegho kirurut löwïr kichiköt akonga nyo lentöy, “Chama pöröryengu le wölo ichömtonyi kegh.”

¹⁵ Wölo ato asïrakwa kegh anyagh kegh le tïpö wudïn akwane nko akwane, orip kegh tömawany kegh akwane nko akwane!

Otöp nyo pö mïkulögh nko nyo pö ngwïnyinï

¹⁶ Omwoghan nyu lö, opïsinö Mïkulögh kïpaytakwa amarïpa ngat möchut pö por.

¹⁷ Ompöwölo poryegho pïrchintino por möchut pö Mïkulögh, kïporyegho Mïkulögh pïrchintino por. Pung nyu chane kwodeny akuporu lö momukekwanye oghe tïkwïn cho komökekwa.

¹⁸ Ato ntöghowokwa Mïkulögh, kïmelö tökïpöywokwa kirurut ngat.

¹⁹ Melö wïngote nyu ighisyewut pö por kïsïwïyegho: alomi, sïmnyontön, möchut cho ghach,

²⁰ saghata körkeyïntin, ponintön, punyontön, syala, sastaghnan, nörekyö, semsem, kimölöto kegh, arata kegh.

²¹ Kepö kegh sikong, tamasa, chepomutnön nko ngale walaka cho karkegh nko choni. Orirwokwa ye le atanye kökyarirwakwa tagh lö, mömïlöcha Pöyunöto Tororöt pich cho ighöy tïkwïn cho lata choni.

²² Wölo okin nyo yinu Mïkulögh kï: chomnyogh, ngörekyö, kalya, mïkukönöt, tölosyö, köromnyö, kighanat,

²³ ipöto kegh ngwïny nko pïröto kegh. Möminye kirurötö nyo töghöy ngalechoni.

²⁴ Kikïwudochï chane cho kikïpöyit Kristo Yeso kimurtöwon otöptöngwa nyo pö por nko pïrchintinechi cho ghach.

²⁵ Kwoto kïmöngecha ompö Mïkulögh, kï mïchini kuntöghoghwecha nyinte.

²⁶ Mökekwol kegh nyu anta kisus kegh anta kyomchï kegh nyonyintön.