ISAYA 8 - PIPÏLIA

¹ Kïlenchanïn ECHOTYON, “Chenga kerony nyo tapes atekirchinö parakunyi ngal cho kimuköy kesomön cho lentöy, ‘Pokyinö Lawel, Ritö Pöröw.’

² Mörunö pich odeny cho kighönöy, tökekany kïlïkwï chane söwï, tïsin Uriya nko Sakaria wero Yeperekia.”

³ Kiwer osiswö cho te, kïsïkisyö korkenyan akïyï weri, kïlenchanïn ECHOTYON, “Kurenö kaynatenyi, ‘Pokyinö Lawel, Ritö Pöröw.’

⁴ Ompöwölo ghömïtöy pöytoghintö Asirya Damaska kïmïkul nko pöröwo Samaria löwïr kïtomö kumï monïngoni kïmwa lö, ‘Yoyo,’ nko ‘Papo.’ ”

Ngwïnöy pöytoghinto Asirya

⁵ Kïlenchanïn ECHOTYON ngat,

⁶ “Ompöwölo katagh pïchï pögho Siloa cho rotöy mut akïngörökyï pöytoghin Resin nko pöytoghin Peka.

⁷ Ani Echotyon nyo omïtu pöytoghinto Asirya nko pikachi kïmïkul pö lïk atökïpka kïporyeghö Yuda. Pokyini chane korononi le puseryon nyo kawir lalwa Yuparet nyo nyïghiti pöghechi akïpa sany wölo low.

⁸ Pukotoy koro Yuda ompö puseryon nyo itöy pugh, akulum kïgh anka tïkwïl.” Mi Tororöt nko acha! Körtoy köpepokachi cho kakikarkar koronete.

⁹ Aghamïta kegh, pipö punton ompö nyökoryö! Atera, akwa koroswo ngwïny cho lowöch. Anapa kegh ompö poryot, wölo omïghyö! Owöy anapa kegh, wölo omïghyö!

¹⁰ Atata tötutkökwo! Wölo mötïngcha kinyiwut. Angalana ntökumuchö, wölo lïku choni lapay kwïle, ompöwölo mi Tororöt nko acha.

Körirchï ECHOTYON werkoyon

¹¹ Ompöwölo kirirwanïn ECHOTYON ompö owesyenyi nyo wow lö merïp or nyo rïpöy pich. Kimwa nyinte lö,

¹² “Metuyö kegh nko pïchï, amewagh tïkwïn cho wöghöy chane.

¹³ Poto ani ECHOTYON Kimuktoghin nyo okonyïtekwa, akanya kutang kiwaghatenkwa wölo mi nyinte onkït.

¹⁴ Lïku nyinte wölo tïlil, wölo karkegh nko kogh nyo kwötöy pich akïlïkwï ghat nyo pïtyegho koro Israel kwodeny, akïlïkwï ngöghöp nyo nömöy pich cho möngöy Yerusalem.

¹⁵ Kïkwötöy pich cho chang ompö wöloni, atökupïtyö akwilyö. Kïnömo chane ngöghöp.”

Rirunat kengalan nko pich cho kimeghö

¹⁶ Ochikwa rïpankachan, nyo mïchinokwa arïpa kiyomisut cho kökonanïn Tororöt.

¹⁷ Kawïnya kegh ECHOTYON pikachi, wölo oghönan akïtö okönan nyinte.

¹⁸ Omitan yi nko monïng cho kökonanïn ECHOTYON. Kayontecha ECHOTYON Kimuktoghin nyo mi ngacharunyi nyo pö paytagh kutïng pö Sayon* kelïkuna lökoyechi cho söpchot cho kipchini pipö Israel.

¹⁹ Wölo mito pich cho tepokwa lö otepunenö ngal pich cho pöghisyegho oy nko ponï, cho ngölonöy le törit. Lenchinokwa chane, “Möminye kïgh ato tepunö pich lökoy mïkulis pö pich cho kimeghö ompö paraku pich cho söpsot.”

²⁰ Oyokyinekwa pïchoni lö, “Atera ngalechï mwowokwa ECHOTYON! Moteröy ngala oy, ompöwölo melö onyorunokwa chane löpoyïn pö kiwasan.”

Osiswo nyörilwok

²¹ Tompöroryegho nyu pich kor atoni, meghsot mutïnö nyoman akwam kömöy. Chïpöy nyu chane pöytoghintengwa nko Tororötïngwa otini mi chane nyarïl ompö kömöy nko nörekyö. Kïrkegh kïlentöy kïtopönöy yïm,

²² anta topön ngwïny, wölo mösïwïyicha kïgh, kïpoto kömpölelyö nko tuwïn, tuwïn nyo pö otyogh, wölini kïrorchini chane asïyech.