ISAYA 7 - PIPÏLIA

Ngölyon nyo kikïmwochï pöytoghin Aas

¹ Kitowï poryot otini kipayta koro Yuda Aas wero Yotam, kuköto Usia. Kiporyeghö Yerusalem Resin pöytoghinto Sirya nko Peka wero Remalia pöytoghinto Israel, wölo kimemukcha kïnam kanasyantanoni.

² Nyini kilïm pöytoghinto Yuda lö kikwitï pipö lïk cho pö Sirya koro Israel, kïmïgh tya nyinte nko pikachi ntökïkarkegh nko ket cho ketimtim yomat.

³ Kïlenchï ECHOTYON Isaya, “Mïta werïngu Syearyasyup wölo mi pöytoghintö Aas. Onyorchinekwa nyinte ara mït ato nöpo pich sïro, ato le sörömu kongpa pögh nyo pkono pögh cho kosini ngarpïl.

⁴ Omwochini kïtöpö kïpsach akïlïkwï nyakan, atömewöghisyö. Melö kïgh nörekyo pöytoghin Resin nko Sirya nko wero Remalia, karkegh chane pat nko ighot nyo ngwïno lïkip odeny.

⁵ Ompöwölo kewunyi Sirya ghöyïn nyo lata nyï, kïmi nko Israel nko wero Remalia, akïmi kïlentöy,

⁶ Mököy kïpa kïporyeghö Yuda akwotyeghö pikachi tökïnam akutö wero Tapeel kïpayta chane.

⁷ “Wölo kataghan ante Echotyon TORORÖT lö, meghonye ngölyontononi.

⁸ Ompöwölo melö körom Sirya kïsir Damaska, kanasyantenyi nyini wow, amelö körom Damaska kïsir pöytoghin Resin. Kitoytoyot pipö Israel könyis 65 ntömelö tökeyitöy lö kor ngat.

⁹ Melö körom Israel kïsir Samaria, kanasyantenyi nyini wow, amelö körom Samaria kïsir pöytoghin Peka. “Kïkany ato maghanakwanye, kïmelö ochïchïmekwa nyonikïny.”

Kiporunöt nyo pö Imanuel

¹⁰ Kïngölonchï ECHOTYON Aas ngat kïlenchï,

¹¹ “Somö ECHOTYON Tororötïngu kiporunöt, somö ato kengwïno ngwen anta kengwïno yïm parak.”

¹² Wölo kïmölyongwï Aas lö, “Mosomanye, akï melö otyöman ECHOTYON.”

¹³ Kuyokyï Isaya nyinte lö, “Atera nyu we pipö ara Daudi! Kïgh nyo mïnïng so ompö akwa, aghakwa pich kwoghochö, ntamachakwa agha Tororötïnyan tïkwïl kwaghach?

¹⁴ Kïlenyona nyu konokwa Echotyon nyinte kiporunöt. Arosa lö sïkisïyi mïrar akïyï worö nyo kuro kaynenyi Imanuel.

¹⁵ Omöy nyinte kölomot nko kumot otini kenkïtï wölo kïtöghtoy ghöyityö, akïkïl nyo karam.

¹⁶ Ompöwölo kisuro koroswechoni otyegheninyi pöytoghikwa kwodeny kïtoma kunkïtï monïngoni wölo kïtöghtoy ghöyityö, akïkïl nyo karam.

¹⁷ “Ipunyi ECHOTYON akwipchï piköku nko koto papongu osis cho ghach kïtïl asis anka tïkwïl kïngeta otini kipesyö paytaghpa Israel nko Yuda. Ipu pöytoghinto Asirya!

¹⁸ “Kutöy ECHOTYON pirimpi otini ketï tökuporchï machey pipö Misri kupilu le kolyong cho piluno mori keti lalwa Nile, cho mi pakata, akïkut pipö Asirya kïpkana korengwa le sakam.

¹⁹ Pkonöy kunyïghitöy kïghömï renkeröy nko köpönot cho mi ghatoy nko wuw pö kato nko wölo oketïyi kyakï tïkwïl.

²⁰ “Olöy Echotyon chi nyo le rwokin nyo ngwïno lalwa Yuparet antakwagh ato itï asisoni nyinte kï pöytoghinto Asirya! Rwoköy nyinte tamughayikwa lömïs nko cho pito mötöwekwa nko porwoyikwa tïkwïl.

²¹ “Otini ketï asisoni, pöghöy chi mösör akonga nko kechir odeny.

²² Akwompöwölo kïkögho chö cho chang kyakichoni, omöy chichoni kölömot. Omöy nyu chi anka tïkwïl nyo kingötï kölömot nko kumot.

²³ “Pituno tapalak nko kato asisoni wop anka tïkwïl nyo kimi keti sapipun cho le 1,000, cho kikïnyorunö ropïyeni silpa cho le 1,000.

²⁴ Petöy nyu pich nko kïwantis nko koti korononi kïsökösiyi, pituno tapalak nko kato kore kïmïkul.

²⁵ Mörikönye chi asisoni kutïngkoti löwïr cho kikïngoröy, ompöwölo kilum kato, wölo lïku koroswechoni acheyu tïch nko ngaror.”