ISAYA 65 - PIPÏLIA

¹ Lentöy ECHOTYON, “Kyomitan kïpsach oterchï piköchan sowutkökwa, wölo melö kisagh chane. Kyomitan kïpsach oporchï kegh chane, wölo kïtagh chane kïyaranïn. Melö kisaghanïn chane, kïrkegh kyomitan kïpsach osis, olenchini, ‘Anyï ani!’

² Kyomitan kïpsach osis atak pich cho le penyï, cho ighöy tïkwïn cho ghach akïrïpöy ortïnekwa kegh.

³ Ighanïn chane anarek ompö tïkukwa cho ighöy cho pö arasï, tötoy amörostin cho kïpelöy ompö paren akïpelöy mankoy cho ngutoy nyo karam ompö ato sogho pipö punton.

⁴ Pich cho petöy oghö kïlïtöy köpönot nko parsïkontin kïngönöy nko oy Pich cho omöy panya loturen akïyupöy suto panya tyonkïn cho le sïmnyon.

⁵ Atolapay kïlenchï pich, ‘Amal kegh, marikecha!’ Lenye pïchï ighöt nyo chilchilanïn sörun, lenye ma nyo nöghöy kwimön.

⁶ Kyomutyan kirwok pïchï, Mosisyinanye kïgh nyo kegh chane, oghokyinan chane,

⁷ kïrïp kegh nko ngokikwa nko cho pö kukötinekwa. Ompöwölo kapel chane mankoy cho ngutoy nyo karam ompö kutïngkot akumwaghanïn ompö komos. Omungan nyu chane kïrïp kegh nko ighisyewutkökwa cho kipö tagh.”

⁸ Mwoghöy ECHOTYON lö, “Möminye chi nyo nyoröy sapipun, wölo ighöy kïlïkwï dipay.* Kïlenyoni tïkwïl ompö ani. Monyoranye pikachu löwïr. Osörunan cho pöghisyewanïn.

⁹ Okönyan kïcheng monïngo Yakopo nko Yuda korenyan pö kutïnkot. Mïlöy piköchan cho pöghisyewanïn akïmang wölini.

¹⁰ “Soghanïn chane akuyakwïy kechiryekwa nko twakwa kor nyo le tömkö nyo pö Syaron nyo mi okumpö ta akïpa ntökwitïta Mpöghogh Kömpölelyö nyo mi okumpö kongasis.

¹¹ “Wölo sisitu ompö akwa chona kataghanïn, chona osösöy Sayon,* kutïngtönyan nyo tïlil, apechï asagh Kad nko Meni cho le tororötino töpkotut nko rurïny.

¹² Lïku nyoni sörömunkwa nyo omeghsot ompö megha mörkötetyö, ompöwölo melö kyongitonchekwa atanya kyokurokwa anta alïm atanya kyangalanan. Kyachamakwa akwane amasa ngalechan, aghakwa ngokï.

¹³ Nyo omwowokwa ye nyu lö nyoru omisyö nko pögh pich cho soghanïn akïrïpöy ngalechan, poto akwa cho osutyot akwamak maral. Ngörekyot chane wölo onyorunekwa arasï.

¹⁴ Tumöy chane ompö ngörekyö, wölo orirsokwa ompö nyarïl.

¹⁵ Pöghisyegho piköchan cho le kïlan kaynatenkwa kïchïpisyegho. Ani Echotyon TORORÖT nyo otïghokwa. Wölo otöninan kaynat nyo rel pich löwïr cho tekanïn.

¹⁶ Kïlenyona chi anka tïkwïl nyo mököy kisoyönöt, kïsomöy Tororöt nyo Ghanate. Akwanka tïkwïl nyo omöy muma, kuwolwolo kegh kaynata Tororöt nyo Ghanate. Weröy kömpölelut cho kipö tagh akewutyeghö.”

Ighat nyo rel

¹⁷ Mwoghöy ECHOTYON lö, “Oghan ngwïny nyo rel nko yïm nyo rel. Kïwutyeghö kïpa kokay tïkwïn cho kipö tagh.

¹⁸ Ongörekyenö, aturonchö kokay ompö kïgh nyo oghan. Ngörekyot pich tya ompö Yerusalem nyo rel nyo oghan akïturonchot pikachi.

¹⁹ Ongörökan ante tya ompö Yerusalem nko pikachi. Mörumunonye rirata orinyi akï möminye chi nyo möko kingarakat chitö anka.

²⁰ Melö tökïmeghsot mnyarkiltin ompö monïngnön akï möminye poyon nyo rörchini osiswechi. Kiyitöy pich cho kökikwit könyis 100 lö mïnkech, wölo kïchïpöy mwokïyon nyo tïng könyis 100.

²¹ Teköy chane korïn akïmang, kötkötöy keti sapipun akwa akwekwa.

²² Melö teköy akïmang chitö anka. Melö kötkötöy akwam chitö anka. Ompöwölo kïtenö wölo tenö könyiswo ket, kïtenö choni könyiswo piköchan. Ngörökyini ighisyewutkökwa cho kighota chane.

²³ Melö wiröy wuw ighisyö nyo ighöy chane, amönyorucha monekwa nyarïl. Osoyönan chane nko piko arengwa ompö osis cho pkonöy kokay.

²⁴ Oterchinan chane sowutkökwa kïrkegh kötomöcha kuwany kïsaghanïn, oyokyinan chane sowutkökwa.

²⁵ Oketïyi suyï tïkwïl nko wara kechir. Omöy ngötunywö sus le tïch amelö tökesïko meghat moroyut. Mökïminye kïgh kutïng pö Sayon* nyo ngwan anta mwokïyon.”