ISAYA 61 - PIPÏLIA

¹ Kenyïghitanïn Echotyon TORORÖT Mïkulöwunyi. Kakïlanïn nyinte akïyontanïn opchï mey lökoy cho karamach, asop cho kimeghö mïkulis, amwatïta kityakata pich cho rötote nko kityakat nyo pö pich cho mi chela,

² amwatïta lö kikwitïta ato pöropchini ECHOTYON pikachi, nko asis nyo tökisïyi Tororötïnyo, tökïnyorï saghsaghat pich löwïr cho riryot,

³ akïnyorï ngörekyö nko turönöt pich cho riryegho Sayon.* Otöninan tum pö salat nyo kötönyoru kiwongunöt. Kïkuro chane keti kitenat cho kakatkat ECHOTYON atökïnyorchï nyinte ororyö.

⁴ Teköy chane ngat kanastin cho kökilïkwï kïratis könyisyok, pintitöy ngat kanastin cho kirulyö, ompö kinyarat nyo pö pïnwöy cho chang.

⁵ Pkonöy pich cho le to kuyokwïywokwa kyakikwo, kïpka pich cho monkïtökwanye kïngorwokwa parenikwo akïripkekwa sapipunekwo.

⁶ Kïkurenokwa nyu, “Tïsi ECHOTYON,” akekurokwa lö, “Mötwori Tororötïncha.” Omekwa sïkönöto pipö koros akwolökwa kegh sïkönötengwa.

⁷ Wonyot atoni arasinkwa nko kiratat nyo kikonokwa pich, omöngekwa nyu korengwo kegh, aketösöy sïkönötenkwa kïnyïl odeny. Pöyitu ngörekyenkwa kokay.

⁸ Mwoghöy ECHOTYON lö, “Ochöman man, wölo otöghan wököt nko rïmö Otöninan pikachu ropöw ompö kighanat, aman muma* nyo pö kokay nko chane.

⁹ Ororitu piko arengwa ompö pipö koros, akunkïtu chi anka tïkwïl nyo sïwïyi lö, pich chane cho kakusoyön ECHOTYON.”

¹⁰ Oturönan nyoman ompö ECHOTYON, ngörököy söpontönyan akwompö Tororötïnyan. Ompöwölo kelokwaninyi sïro pö sörunöt, ailumenaninyi sïra kitenat, le chi pö kensyö nyo kimina kegh sïrenyi nyo pïchigh, anta mïraru kensyö nyo kilaka karïn nko kaymoris.

¹¹ Ompöwölo kïle otini ghyögho kösïgh ngwïny akïpit, kïsöru Echotyon TORORÖT pikachi, sölöy nyu pipö koros löwïr nyinte.