ISAYA 6 - PIPÏLIA

¹ Kyasïwan Echotyon könyi anka ato kirapas pöytoghinto Usia. Kimpuröy Echotyon ngacharunyi nyo pö paytagh, ki töror akimi park tya, kighömï sïrenyi Kö pö Tororöt* kïmïkul.

² Kiwit nyinte tyonkïn cho kilata lyopöt. Kitïng anka tïkwïl ompö chane köpepoy mut nko akonga. Kiluma kïgh anka tïkwïl tokochunyi köpepoy odeny, akuluma portanyi köpepokö walaka odeny, atolapay kupilö köpepokö chinö walaka le odeny.

³ Kimi kïkuröy kegh kïlentöy! “Tïlil, tïlil, tïlil! Tïlil ECHOTYON Kimuktoghin! Nyïghiti ororyenyi ngwïny.”

⁴ Kutimtimisyö pölöwo Kö pö Tororöt ompö kutinay kingölonu, atolapay kïnyïghï ighot Kö pö Tororöt.

⁵ Olan nyu, “Ochech nyo le ani! Ompöwölo weröy ngalyapunyan ngölyon anka tïkwïl nyo le sïmnyon nyo ongölonan, akwanyï omöngan nko pich cho ngölonöy ngölyon anka tïkwïl nyo le sïmnyon. Akwanyï ye kasïweghan konyichu ECHOTYON. Kasïwan Pöytoghin, ECHOTYON Kimuktoghin!”

⁶ Atolapay kupilchanïn akong ompö tyonchay nyo kipoy ewunyi ngösöt nyo kichengunö wölay kïpelo amörostin.

⁷ Kïswanga kutinyan ngösötonay akïlö, “Kaswany ngösötonï kutingu, kakechengeninyi ye ghöyityengu akelöstowunyi ngokiku.”

⁸ Atolapay alïman kuti Echotyon ato kilentöy, “Oyokan ngo? Akï ngo nyo wetöy ompö acha?” Oyokyan lö, “Owetan! Yokanïn!”

⁹ Kïyontanïn nyu owö omwochï pich ngölyontonï, “Kïrkegh kalïmakwa lö ne wölo mosïkunekwanye, akïkwïrkegh kotopönökwa lö ne, wölo monkïtukwanye.”

¹⁰ Atolapay kïlenchanïn, “Igha mïkulis pö pïchï kwongeröchitu, aigh yitikwa kïminyö, akïköryö konyikwa atömökumï chane kurosïta anta lïm kïgh anta sïkwï kïgh, atömötöp ntökurosïtegha konyikwa akïlïma yitikwa akïsïkunö mïkuliskökwa, akïmïlisyö wölo omitan atosopön chane.”

¹¹ Atepan lö, “Akïlïku nyoni nko oyï nya Echotyon?” Kuyokï lö, “Ntökïtenö kepar kanastin lömïs, ntökïtenö kepïstö korïn kïtïryolöchitu, ntökïtenö kïlïkwï kore nyinte kïmïkul surkwen.

¹² Owuwan tïkwïl pich kïpa wölo low nyoman, aghan kore kïlïkwï surkwen.

¹³ Kïrkegh köngötï chi akonga ompö pich taman ompö korononi, kïmöngötunye tïkwïl, le mïsïkyo ket pö oron anta lilwö nyo kökïtör wölo tökïmi tökïsöpöy mïsïkyenyi.” (Kimustoy mïsïk kösïghyon nyo pö kitoröt nyo rel nyo pö pipö Tororöt.)