ISAYA 55 - PIPÏLIA

¹ Mwoghöy ECHOTYON lö, “Nyonö chi anka tïkwïl nyo omin maral, achï pöghe ghegha! Nyonö nyo chopöy ropïyen, nyonö ala aiyomisyö! Nyonö ala dipay* nko chö! Melö mito kïgh nyo itötonyi akï puryö olyot!

² Ompö ne topöghisyeghenö ropïyen ompö tïkwïn cho metöni chi pïghyöny? Ompö ne tasïngena tïkwïn cho mesöy pich? Atere lasiny ngalechan tama cho karamach, angörökyï cho okwoghöch.

³ “Atera nyu pikachu, apkonchanïn. Apkana wölo omitan atonyorunö söpon! Ononan mumenyan nko akwa kokay, akonokwa chomnyogh nyo kyoyomisön Daudi.

⁴ Kyaghan nyinte kïlïkwï kintöghoghin, akïlïkwï yetïn pö pipö punton, atökunkïtwanïn chane lö ochan ngo.

⁵ Ikurenyi ye nyu koros cho menkïtönyinye, koros cho melö nkïtinyi akïryöwu kïsorinyi. Igho lenyoni akwompö ani ECHOTYON, Tororötïngu, Nyo Tïlil nyo pö Israel. Okonokwa konyït nko ororyö.”

⁶ Ayara ECHOTYON otini tökenyoru, okurö nyinte otini tökïlekït.

⁷ Akanya kïtagh pich cho ghach ortïnekwa, akïwaghach mwokïyis kinonutkökwa, nya kïwöghökyï kegh chane ECHOTYON, akïpechï Tororötïnyo nyo mi kïpsach kïlöstoghchï chane.

⁸ Ompöwölo lentöy ECHOTYON, “Melö karkegh kinonutköchan nko chikwa akïlowöch ortïnechan nko chikwa.

⁹ Ompöwölo kile wölini löw yïmö nko ngwïny, kïlowöch ortïnechan nko chikwa, akïlowöch kinonutköchan nko chikwa.

¹⁰ “Ompöwölo kïle wölo rökuno rop nko takarïs yïm, amelö tökuyodo kegh yïm ngat, wölo pïsöy ngwïny akwigh tïkwïn kïpit, kutö ngorin kösïgh akutö pich omisyö,

¹¹ kïlenyoni tïkwïl ngölyontenyan nyo omwowunan, mömïlonye kwïle amegh kïgh. Wetöy kwighöy machatenyan, akulïtit kerötenyan.

¹² “Ongetokwa koro Papilon ompö ngörekyö, kimïtunenokwa opkonone kanasyan ompö kalya. Teghsot kutïngkotï nko komos akïtum ompö ngörekyö.

¹³ Pito saypras wölo kötö pito tïkawkaw, kïpita kapïrïmen wölo kötö pito panyïrit. Machey nyoni nyo töpo kokay, lïku kinonutyo kïgh nyo kaghan ante ECHOTYON.”