ISAYA 52 - PIPÏLIA

¹ Ngeta! Ngeta! Awesituna we Sayon!* Laka sïroköku cho pïchighöch, we Yerusalem kanasyan nyo tïlil! Ompöwölo melö tökïlïtu ortïneku ngat chi nyo le somchon nko nyo le sïmnyon.

² Kutkutö kegh, we Yerusalem nyo kiketyakïn! Ngetunenö terïtyon aitöpö ngacharungu nyo pö paytagh! Tyaka sïrïmtin cho kikïrateninyi kat, we chepï pö Sayon* le pïnotyon!

³ Mwochini ECHOTYON pikachi lö, “Otini kyalïkukwa sekey, melö kimi ropïyen cho kikïghakta töketyakakwa.

⁴ Akwatanya kyapekwa amang koro Misri le pïnot, apekwa akwane ompö machatengwo kegh, wölo kipka pipö Asirya kïrangakwa ompö owesyö amelö kimi kïgh nyo kyalenakwa.

⁵ Anyï ye nyu kegha kïgh nyo lata nyoni ompö koro Papilon. Ochikwa rötote akï möminye kïgh nyo kikyalenakwa. Kwolöy kegh pïchoni pöytonokwa akunisonchö akïsasanïn.

⁶ Onkïtunekwa ompö osis cho pkonöy lö ochan Tororöt akwani nyo kongölonwokwa.”

⁷ Wechï mïlöy pich kesïwa chi nyo rökuno kutïngkot, akwipu lökoy cho karamach cho pö kalya! Chi nyo mwowu ngala sörunöt, akï mwochini Sayon lö, “Pöytoghin Tororötïngu!”

⁸ Teghyot pich cho ripöy kanasyan teghyot chane tïkwïl ompö ngörekyö! Sïwïyegho chane konyikwa ECHOTYON, kïmïlo kugheghu Sayon.

⁹ Ongörekyenö atum kïratischï pö Yerusalem! Söru ECHOTYON kanasyantenyi akïsaghsagh pikachi.

¹⁰ Keghïtö ECHOTYON ewunyi nyo tïlil, kïsïwïyi pipö punton löwïr. Sïwïyi pipö ngwïny kïmïkul sörunöto Tororötïncha.

¹¹ Angeta apegha yi! Angetena koro Papilon! Amaswany kïgh nyo kïkïröy. Apeghena kwenunyi atïlil kegh, akwa cho opöy kari Kö pö Tororöt.

¹² Melö osurekwa panï pö ye, amelö opertonekwa atochïwïtyenö. ECHOTYON Tororötïnkwa nyo ntöghoghwokwa akïripokwa nyinte ompö wop anka tïkwïl.

Mötworin nyo wongunote

¹³ Mwoghöy ECHOTYON lö, “Ighöy mötworintenyan ompö ngöghomnyö, kïsyolöy parak akekonyït tya.

¹⁴ Chang pich cho kyotyö ato kisïwa nyinte, ompöwölo kikinyar tokochunyi, amelö kitö kïlata ngat nyo pö ptangengmöt!

¹⁵ Wölo töngönchini ye nyu pipö punton cho chang sisyot pöytoghï lasay ompö töngönchin. Sïwïyi chane akïpköchï kïgh nyo melö kinkït chane tagh.”