ISAYA 51 - PIPÏLIA

¹ Mwoghöy ECHOTYON lö, “Atere ngalechan, chona omököy kesörwok, akwa cho opkonöy wölo omitan atökengarakak. Anane kogh nyo kikipat torumunökwa, köpön nyo kikïwasa koghichoni kyapkanekwa.

² Anana kukötönkwa Apraam nko Sara nyo kiyiyokwa. Melö kitïng Apraam monïng otini kyokurön nyinte, wölo kyosoyönön nyinte, aghan kïsïch monïng cho chang.

³ “Osyonchinan kanasyanta Sayon* nko pich löwïr cho möngöy kïratiskachi. Oghan kore nyo tïryal kïpïchighitu le para Eden, lïku kore wölo le surkwen para ECHOTYON. Kïnyoruno orinyi ngörekyö nko turönöt aketumo wöloni tumwöy cho sölanïn.

⁴ “Atera pikachu ngalechan, alïma kïgh nyo omwoghan. Otöninan pipö punton kinetutkachu, ipchini kirurutköchan pipö punton löpoyïn.

⁵ Ongwïnan osöru chane lawel, melö low sayenyan nyo opunan sörunöt. Opöytonan ante pipö punton. Mito koroswö cho lowöch kïkönganïn, könanïn tosörwan chane.

⁶ Otopöne köny wölnö le yïm, aros ngwïny, weröy yïmö le kapuret, kuwer ngwïnya le sïra nyo kawïr, akuwonyot pikachi lömïs le kolyong. Wölo töpo sörunötö nyo opunan kokay, amöngötönye ghetunötö nyo opunan.

⁷ “Atera ngalechan pich cho onkït man, cho okomönchini kinetutköchan mïkuliskökwo. Mowöghisyö ato roröchokwa pich akïchïpokwa.

⁸ Ompöwölo omöy chane rirïm le sïra! Wölo töpo ghetunötenyan kokay, amöminye söröm nyo pö sörunötenyan.”

⁹ Ngeta, we ECHOTYON aisörwecha! Pöghisyeghenö owesyengu tesörwecha, pöghisyeghenö le ato kipöghisyeghenyi otini le awïyay. Mö nyi nye so nyo kitörotör Raap, tyonyanya wow kimi pögh kïlïkwï mïnchïran?

¹⁰ Mö nyi nye so nyo kigh nanam kïteny, aigh or nyo kiwer pögh kwen atökumï pïchoni kisörunyi kwoghyö?

¹¹ Mïlisyot pich cho kisörï ECHOTYON Sayon, pkonöy kïtumonu ompö ngörekyö nyo wow Ngöreksot chane kokay. Roryot chane akïngörekyö, akïngeta chane nyarïl nko ngwonïn kokay.

¹² Mwoghöy ECHOTYON lö, “Ani nyo osoghsoghinyi. Kwompö ne tewöghenyi chi nyo meghöy, nyo möngötunye nyo kogh kïsir suswon?

¹³ Kewutyeghenyi so ECHOTYON nyo kighinyi, akughïtö wölnö le mïröt akïtek pchörin cho tighöy ngwïny? Akwompö ne tetöpenönyi ompö nyökoryö ompö pich cho reyinyi nko cho mi kïpsach kïparinyi? Melö tökumuköy sïngiryengwa kïswonginyi ngat.

¹⁴ Kityoköy atolekït pich cho rötote, tïpisot chane könyis cho chang amelö rörchini chane omisyö.

¹⁵ “Ochan ECHOTYON Tororötïngu, oköreran nanam atolapay aghan mirtinechi kughum. ECHOTYON Kimuktoghin kaynenyan.

¹⁶ Kotönön ngalechan kutingu, awïngchinyi rurwo ewunyan. Kyoghïtan wölnö le mïröt atek pchörin cho tighöy ngwïny. Olenchinan pipö Sayon, ‘Ochikwa piköchan!’ ”

Sörömu kiwongunöto Yerusalem

¹⁷ Chïkana, we Yerusalem! Kutkutö kegh, ainget! Kegheghanyi kölöwo ECHOTYON nyo pö kiwongunöt nyo kikoninyi ghegha ompö nörekyenyi. Kewisanyi aikwangkwanga le ptamasyan.

¹⁸ Möminye montöngu ompö akonga nyo ntöghoghunyi. Möminye nyo nöminyi egh atökumïtïn.

¹⁹ Köpkonchinyi tïkuchï le odeny, ekï ngo nyu köny nyo soghsoghinyi? Ketunyi kiwurata nko poryot nko kömeywok, ekï ngo nyu nyo syonchininyi?

²⁰ Pïtyot pikökwa ompö nyörkölelyö, ompö ara kanasyan anka tïkwïl. Lata cheptirkich nyo kanam ngöghöpo sökosin. Könyorï chane nörekyo ECHOTYON, kanam chane sïngiryo Tororöt.

²¹ Kïlenyona atere akwa pipö Yerusalem cho omi nyarïl, akwa cho kotömesyö amelö ompö dipay,*

²² lentöy ECHOTYON Tororötïngu, nyinte nyo ghetöy pikachi, “Ochengonan morikwa kölöwo tamasa, melö togheghekwa ngat kölöwo nörekyenyan.

²³ Otöninan kölöwononi pich cho kipïrokwa, pïchoni lenchinokwa, ‘Oköpïghchinö kegh ngwïny töketïkatecha akwa,’ akïtïkata kïrutayikwa le ngwïny, le or nyo werotoy pich.”