ISAYA 50 - PIPÏLIA

¹ Mwoghöy ECHOTYON lö, “Olentekwa so kotulön pikachu, le chi nyo tyoköy korkenyi? Akwato ononekwa lenyoni, kunko nyu palaltina kityakat? Olentekwa so kyaltakwa ape koro pïnotön le ato oltoy chi monechi kïpa kïlïkwï sekey? Ewo, kyapekwa alïkwï nanam ompö ngokikwa kegh, kikitulokwa ape wölo low akwompö penyutkökwa.

² “Kilö ne tömonyorwan chi atanya kyorutowokwa? Kilö ne tömöngitonchö chane ato kyokursyan? Ayo, tangogh so ewunyan nyo momukanye osöru chane? Omukan oghöy nanam kïteny ompö ngölyontenyan, awaghach lalwatïn kïlïkwï surkwen, kïmeghyö kaghagh cho mi oringwa ompö rörchin pö pögh.

³ Omukan owöghököy wölnö le mïröt kïtuwit, alokyï sarankwachtin le ato kïriröy chi nyo kama.”

Konyït pö mötworinto ECHOTYON

⁴ Kikonanïn Echotyon TORORÖT Kimuktoghin ngalyap, nyo omukan okil pich cho kikwoghochö. Konanïn makat tökwoghö anka tïkwïl, atamuk alïm kïgh nyo mököy kunetanïn.

⁵ Kökonanïn Echotyon TORORÖT pköchin, akïtomönye apenyan anta awaghakegha wölo mi nyinte.

⁶ Kyopïsyan pich kïmunganïn patagh, apïsyan kuchïtanïn tamugh. Melö kyakartan tokochunyu otini kimi kumwoghanïn akïngwïtyinanïn.

⁷ Wölo medonanïnye kïgh chïputkökwa, ompöwölo ngörokanïn ECHOTYON Kimuktoghin. Nka nyoni okilan kegh amïkukönöy, ankïtön lö monyorunanye arasï,

⁸ ompöwölo lekït Tororöt nko ani, akuportoy nyinte lö motïngetanye lelut. Ekïmi chi nyo le ompö akonga nyo rwokyinanïn ngokï nya? Akanya kepecha tïkwïl nko nyinte ka kirwok! Akanya kwipï nyinte ngalechi!

⁹ Nyinte Echotyon TORORÖT nyo le ngörokanïn, ngo nyu nyo rwokyinanïn lelut? Toyot pich löwïr cho rwokyinanïn, yositu chane le sïra nyo kam rirïm.

¹⁰ Ngo ompö akwa nyo konyïtöy ECHOTYON nya? Akï ngo nyo rïpöy ngaleko mötworintenyi? Kïrkegh kötuw lö ne or nyo orïpekwa wölo aghanakwa ECHOTYON, otighenö kegh Tororötïngwo.

¹¹ Wölo akwa cho ochömöy onoghe mot, cho olentöy tökewangena pikö walaka, wonyokwa lömïs mangwo nyoni. Nyinte ECHOTYON nyo lïtitöy choni, awongunekwa nyu ompö nyarïl nyo wow.