ISAYA 5 - PIPÏLIA

Tum pö para sapipun

¹ Nyotumchan chamanenyu, tum nyo sölöy parenyi pö sapipun. Kitïng kongenyan para sapipun, nyo akwagh nyo mi kutïng.

² Kïngas chichay paranay akïwösï koghïn cho kimi pare, akïkatkat sapipun cho pïchighöch. Akïtek kïtar nyo ripsyegho, akïpel wölo kitïgho akweko sapipun. Atolapay kïköngisyö ntökïrïr sapipunechay, wölo kïlö achamcham kïngwonöchitu akwechay.

³ Kïlenyona lentöy ye nyu kongenyan, “Orwokyine nyu ani nko parenyan pö sapipun pich cho omöngöy Yerusalem nko Yuda.

⁴ Ne nyo kingötï nyo melö kyoghchan parenyu? Kwompö ne tökuyinu akwa cho ngwonöch cho melö kyokönan, nyinö kiteyinu cho karamach?

⁵ “Anyï nyu kïgh nyo oghchinan paranï pö sapipun. Ongongan karatu kïtïryalit angany nayatu nyo körtoy tökwam tïpö wudïn akïtïkatïk.

⁶ Mopïtinanye rötökwö, amopïtinanye ketiko sapipun anta angor pare, wölo opïsyan kïpituna tïkawkaw nko kato. Otöghonan poltoy möropönchï paranoni!”

⁷ Israel nyo le para ECHOTYON Kimuktoghin, akï pipö Yuda cho le keti sapipun cho kikatkat nyinte Kikönöy lö ighöy chane nyo karam, wölo kïmïltegha kisön pungkökwa, akwigh kungeyö kïyöröy keghchï man.

Ghöyityö nyo ighöy pich

⁸ Heywey, ochech pich cho tusot korïn nko paren kïnapasa ntömelö tökïmi pöroyïn ngat, ntökïlïkwï akwane opïn cho omöngöy kore!

⁹ Kalïman ECHOTYON Kimuktoghin ato lentöy, “Lïku kïratis korïn cho chang, cho echön cho pïchighöch.

¹⁰ Ompöwölo yinu akwa ekteni tamanï cho pö para sapipun dipay* cho pö liten odeny kïpoto, akenyorunö kösïgho pagh cho pö liten 80 liten 18 cho pö pagh kïpoto.”

¹¹ Heywey, ochech pich cho ngetöy nyini le kiwasan tökïyarata kumïn, cho gheghsïyi ntökïpölolön oghö ntökïtömesyö lasiny!

¹² Pöghisyegho ompö okortinekwa, pïkantis nko pkurerun nko kumïn. Wölo menkïtcha kïgh nyo ighöy ECHOTYON anta sïwa ighisyewutko ewunechi.

¹³ Nka nyoni tökerang piköchan kïlïkwï mampustin, ompöwölo kisölwontön chane. Kipar kömöy kintöghoghikwa cho konyïtote, kïpar maral söpïchtöngwa.

¹⁴ Nka nyoni tökïtas ngwen pïrchintanyi akïyat kutinyi kïpöroyit. Nyïkwïdoy nyu pöytoghi Yerusalem kïmi nko söpïch pö pich kïmïkul cho teghyotoy nko anka tïkwïl nyo ngörokini ompö kwenungwa, röytoy wöloni lömïs.

¹⁵ Nyoru chi anka tïkwïl arasï kimïnïngitöy chi anka tïkwïl nyo syolöy kegh.

¹⁶ Wölo kikusöy ECHOTYON Kimuktoghin ompö man akuporu tïlilyenyi ompö kirwok nyo rwokyini pikachi.

¹⁷ Oketïyi nyu ato mi wara kechir le wölo koketïyi kïnomnyö, akwam to lödo kïpïstö.

¹⁸ Heywey, ochech pich cho memuköy otyokone kegh ngokikwo!

¹⁹ Omitekwa olentöy, “Akanya kungwïn ECHOTYON lawel atökwigh kini lentöy oghöy atökesïwenacha. Akanya kwigh Tororöt pö Israel nyo Tïlil machatenyi atökesïkunöcha.”

²⁰ Heywey, ochech pich cho kuro ghöyityö köromnyö kïkurö köromnyö ghöyityö. Kawaghakakwa tuwïn kïlïkwï löpoyïn awaghach löpoyïn kïlïkwï tuwïn. Kotönökwa ngwonïn kuker onyïniö kuker onyïnio ngwonïn!

²¹ Heywey! Ochech pich cho ngöghomöch ompö konyikwa kegh, asïwïyi lö kïchï chïreröch tya.

²² Heywey! Ochech pich cho köromöch kïgha dipay* cho le nyökon, mïrön cho owesöch cho kulkulyot kumïn cho ngwonöch,

²³ cho tyoköy rïmï ompö roput, akïmasa man pich cho pö man!

²⁴ Kïlenyoni ye, kïle wölo peltoy lyopöto ma mopö nko wölo wonyot kïlïkwï suswö cho kikïyomö ompö lyopöto ma, kïlenyoni wölo nïntoy ighïnengwa, akekutïtoy tapïkengwa parak kïkarkegh nko terïtyon, ompöwölo köpïstö chane kiyomisut pö ECHOTYON Kimuktoghin akïsas ngölyonto Tororöt pö Israel nyo Tïlil.

²⁵ Kïnagh nyu nörekyo ECHOTYON ompö pikachi akughïtö ewunyi atö kunyaril kong chane. Potonchot kutïngkotï atökesupchï mïntïruch ortïna kanasyan le samï. Amelö choni opïn, melö wonyot nörekyenyi, wölo tökughïtoy ewunyi kïnömöy sitenyi nyo mungoy pikachi.

²⁶ Porchini ECHOTYON pipö punton cho lowöch kïporchini. Kutini chane pirimpi kïpkana söremwok pö ngwïny. Arose, achï keti akïmi kïryowu chane lawel!

²⁷ Möminye ompö akong ompö chane nyo oghököy, anta nyo pïtyini ngwïny. Amöminye nyo muköy anta rï rïwön. Möminye angwa mu nyo kipörchochöy anta angwa kweghyon nyo kingat.

²⁸ Ngötipöch kotikwa, akukichote kïwantinekwa tïkwïl. Ongeröch putïlöyiko kelyeko angoletinekwa le koghïn cho ongeröch tya.

²⁹ Karkegh kelyeko nkarinekwa nko ngötuny cho kapar tyony akïmi kwipöy kutang wudöngwa wölo memukönye ntökösörunö chane.

³⁰ Mororchini Israel ato itï asisoni kïmarikit kïkarkegh nko nanam. Arosa koronï! Kilum tuwïn nko nyarïl! Kanyïkwïda tuwïn löpoyïn ompö tuwïntanyi.