ISAYA 48 - PIPÏLIA

¹ Atere ngölyontonï, akwa pipö Israel, akwa cho opkono koro Yuda, cho owolwolo kegh kaynata ECHOTYON amwoghöy lö kïsoghöy Tororöt pö Israel, akwanyï melö osoghekwa ompö man.

² Akwanyï okwolekwa kegh omwoghöy lö, ochikwa pipö kanasyan nyo tïlil, atwoytokwa kegh Tororöt pö Israel, nyo kïkuro ECHOTYON Kimuktoghin.

³ Mwochini ECHOTYON pipö Israel lö, “Kyangoran könyisyok kïgh nyo itu, akwigha kini lawel lenyini.

⁴ Kyonkïtön lö kyochikwa penyï, cho kiyomö kotwonï le karïn, akïkarkegh tokochwekwa nko taghoy.

⁵ Nka nyoni kyomwowunyi könyisyok wölo lïku osiswekwa. Kyomwowan tïkwïn cho ighisyot kïtomö kwitï atömemwaghanyi lö, ‘Kighisyö ompö körkeyïntinecha, körkeyïntinecha cho kikigha karïn cho kingor.’

⁶ “Kesïwenyi yenyu tïkwïn cho kikwighisyö, tïkwïn cho kyangoran könyisyok, mïchini achamakwa lö man ngalechan cho kyangoran. Omwowokwa ye tïkwïn cho relach cho ighisyot, tïkwïn cho kyawïngenekwa ato le tagh.

⁷ Oghan ye nyu tïkwïn kwighisyö, tomönye kwigha kïgh nyo lata nyete asistanka, nyo memukenyinye mwoghe lö, ‘Möchaye nye kyasïwan chete!’

⁸ Kyonkïtön lö melö kyochikwa pich cho kighönöy, pich cho le penyï kïnomnyö. Nka nyoni melö kyalïmakwa nyonikïny ngölyontononi, akunka nyoni tömömi ngölyon nyo kyalïmekwa yitikwo.

⁹ “Monyoghanye oporu nörekyenyu atökïsal pich kaynatenyan. Kayodan nörekyenyan atömawanyakwa.

¹⁰ Kyatyamakwa ompö nyörïlwok, le wölo kidoy silpa kïpïchighit ompö mapa kopan. Wölo kyasïwan lö melö kyosïkekwa kinyiwut nyonikïny.

¹¹ Kaghan chete akwompö kaynenyan kegh, mochömchinanye kesas kaynenyan, amelö oporan ororyenyu nko anka.”

Sayras nyo kikïl ECHOTYON kïlïkwï kintöghoghin

¹² Lentöy ECHOTYON, “Atere ngalechan pïchï pö Yakopo, akwa pipö Israel cho kyokurokwa! Ochan Tororöt, ochan nyo pö tagh nko nyo pö löt, Tororöt nyo le ante onkït!

¹³ Kigh ewunechan pchörino ngwïny, akughïtö wölnö le mïröt. Otini kokurön ngwïny nko yïm pkonöy chane panini.

¹⁴ “Aghamïta kegh akwane ater! Nko tororötïnkwa ompö akonga nyo kimï kïngor lö tïkuchï? Ochöman ante ECHOTYON Sayras, nyinte nyo lïtitöy kerötenyan ompö Papilon, ay, nyinte nyo pöröy pipö Papilonia.

¹⁵ Ani kegh nyo kyongölonchï akur nyinte. Kyontöghoghchan nyinte asoyön arenyi.

¹⁶ “Apkana nyu arikuna atalïma kïgh nyo omwowokwa. Kyangalanan kïlöpo kïngeta otini le tagh, aghan kïtenö osis ngalechan kïrumu lö man.” Kayontanïn ye nyu Echotyon TORORÖT, akïkonanïn owesyo Mïkulöwunyi.

Tatat nyo pö Tororöt ompö pikachi

¹⁷ Mwoghöy ECHOTYON, sörunintenkwa, Tororöt pö Israel nyo Tïlil lö, “Ochan ECHOTYON Tororötïnkwa, nyo netokwa atonyorunö kinyiwut, ontöghoghwokwa arïpa or nyo mïchini.

¹⁸ “Ntö kile nyo kyarïpakwa kiyomisutköchan! Kitö kïmïlwokwa kisoyönut cho lata lalwa nyo mötengönye! Kyomïlunyi mantangu le mirtino pögho nanam,

¹⁹ akitö chongitu monekwa le ngayam, akitö oripan chane tömökiwany ompö tawunyan.”

²⁰ Apeghena koro Papilon, kiketyakakwa! Amwatïtena lökoye ompö ngörekyö, akanya kenkïtunö wop anka tïkwïl lö, “Kösörï ECHOTYON mötworintenyi Yakopo!”

²¹ Melö kiwongwï ompö maral pipö ECHOTYON, otini kimït nyinte chane kuwer surkwen. Kigh ghat kïkosunö pögh cho kigha chane, kikarer ghat kïpesyö kïmïluna kegh pögh.

²² Lentöy ECHOTYON, “Mötïngcha mwokïyis wölo tïghume.”