ISAYA 47 - PIPÏLIA

¹ Lentöy ECHOTYON, “Rökunenö we Papilon, ngacharungu nyo pö paytagh, rökunö aingwïn itöpö terïtyon. Kilatenyi tagh chepkïltït, kanasyan nyo awes, melö tökïkurinyi pich ngat lö nyo tapïlïl akï nyo ngarngar! Kelïkunyi ye nyu sekeyon!

² Nama ngisya aingagh pagh! Nganya sïra nyo iyenonyi mötïngu! Ngwïsa sïroköku cho pïchighöch cho iloköy! Syolö cherötöyengu, aioghyö lalwatïn!

³ Rumu nyu chïrutïntöngu lasiny akïsïwa pich arasingu. Otökan amöminye chi nyonikïny nyo osyonchinan.”

⁴ Tyokecha Tororöt pö Israel nyo Tïlil, ECHOTYON Kimuktoghin kaynenyi.

⁵ Lentöy ECHOTYON, “Nyi we Papilonia, sisa lasay alït wölo tuw, mökïminye chi nyo tökïkuroninyi ngat lö pöytoghinto pipö koros.

⁶ Kyonörekyan pikachu, kyoghchan chane le atomelö kitökïpiköchan ngat. Nka nyoni kyotönön chane ewuneku amelö kisyonchinyi chane kïrkegh ompö chini le poy.

⁷ Kinonchinyi kegh lö olïku pöytoghin kokay, ntökupölinyi nonchinö mïkulöwungu anta inonchï kegh wölo lïku sörömuto ngalechoni.

⁸ “Tera nyu ngölyontonï, nyi nyo ichömöy tïkwïn cho ngörokini por, nyi nyo ilenchini kegh momo kïgh, ainonöy lö oköröy kegh nko Tororöt, ailö, ‘Möminye chi anka kïpoto ani. Molïkunanye kokay mïsïk amömeghenanïnye monïngö.’

⁹ Wölo ighisyot tïkuchoni kwodeny lawel ompö nyi. Kïrkegh kepöghisyeghenyi ponintön nyo wow lö ne, Kïmegheninyi santengu nko moneku.

¹⁰ “Kilentenyi omitö ato tïghume otini kighenyi ngokiku kinonenyi lö melö kimi chi nyo kisïwïyinyi. Kimïtinyi ngöghomnyengu nko chïreryengu ara kipotöt, nka nyoni kilenyi, ‘Ochan Tororöt amöminye chi anka kïpoto ani.’

¹¹ Kïlenyona, itunyi ghöyityö, akï möminye panengu nyo muköy kuyoda. Mirinyi kiwurata lawel nyo melö kikönenyi!

¹² Leta ye tagh nko chepsoköynengu, supchinö kegh pönutköku kïchangit, cho kisïngenyi kïtenö ichinyi mïnïng. Manan ngörokinyi tïkuchoni, töptoy imukenyi iotyeghö punköku.

¹³ Kesusönyi kegh kwïle ompö kiruröt nyo keyörchinyi kegh. Kanya nyu kïsörunyi pich cho nkït ngala kokel, pich cho chorönöy yïmwöy, akïmwowunyi lö ne nyo igho ompö nyi, arawanï nko arawe nyïna.

¹⁴ “Lata chane mopö cho kiyomö, pelöy ma chane lömïs! Amemukönye ompö ntökïsörï kegh chane, ompö lyopöt pö mayoni nöghöy. Melö ma nyoni nyo lentöy chi oyïwöy, melö ma pat nyo töni chi lölöngyö!

¹⁵ Nka nyoni kïgh nyu wölo lïku kiruriku, choni kirurinyi kïtenö ichinyi mïnïng. Pïstoninyi chane akïpechï kegh pantangwa amelö ngötu ompö akonga nyo sörunyi.”