ISAYA 46 - PIPÏLIA

¹ “Kikwitïta sörömu tororötino Papilon! Pel nko Nepo cho kikïsoghöy könyisyok, wölo kakïkasana ye nyu chane sïkïröy, nïkisïn nyo kituny kyak kwoghochö.

² Melö söru kegh körkeyïntinö, kïnömöy chane akerit. Sörömu tororötino Papilon nyete!

³ “Alïme ngalechan akwa pipö ara Yakopo akwa löwïr cho le ngötunön pö piköchan. Kyoripokwa kïngeta otini kikïyiyokwa.

⁴ Ochan Tororötïnkwa akomönokwa, ntökïtenö angaghakwa karwal. Kyaghakwa aripokwa, ongörokokwa asörwokwa.

⁵ “Ayo, okongityonanïkwa nko ngo nya? Ekïmi chi anka nyo körökegh nko ani?

⁶ Yotöy pich mïlotwekwa cho ipo koltin akïlasta Pimöy chane ropïyen ompö kilen akwala kitongin nyo ighchini chane tororöt atolapay kïkïtïngchï chane akïsagh.

⁷ Syolöy akïkasana puwayikwa kwip, nyini ketïta kutö kötönkenyi kughyongö atoni, amemukönye ntökunaka atoni kakitö. Kïkany kïlö chi osoghöy, kïmemukönye kïter anta sörunö chichoni kömpölelutkachi.

⁸ “Anana ngölyontonï mwokïyischï, akanya ya kïpköchokwa kïgh nyo kyaghan.

⁹ Anana kïgh nyo kigha otini le könyisyok, acham lö ochan Tororöt akï möminye anka nyo kikongityot nko ani.

¹⁰ Kyangoran kïgh nyo igho kïngeta otini le awïyay, kyanyaghan angor könyisyok kïgh nyo igho. Kyamwaghan lö ighisyot tötutköchan nyo mötïny, aghan kïgh anka tïkwïl nyo kyamachan agh.

¹¹ Okuran chi kungwïna kongasis, nyo wokini kïgh ompö ngwïny le sirörö atökupuntö kïgh nyo kyatatan. Kangalanan akwigho lenyini.

¹² “Atere ngalechan, akwa penyichï, akwa cho ononöy lö low rïntagh.

¹³ Opunan asispa sörunötenkwa kïlekïtit, melö tökïlow. Melö pöghönöy nyo kogh sörunötenyan. Osörunan Sayon* akwompö Israel nyo le ororyenyan.”