ISAYA 43 - PIPÏLIA

¹ Kangalan ECHOTYON, nyinte nyo kighinyi we Israel lö, “Mewöghisyö, osörunyi. Kokurinyi ompö kaynengu, ichinyi nyinyan.

² Ato awerakwa pögh cho chang omitan nko akwa, mörïntonekwanye kömpölelutkökwo nyonikïny. Ato awerakwa ma, möpelokwanye. Medonekwanye kïgh tyomut cho ngwonöch cho onyorunekwa.

³ Ompöwölo ochan ECHOTYON Tororötïnkwa, Tororöt pö Israel nyo Tïlil nyo sörwokwa. Otötenan Misri tosïkökwa kityakat, otötenan tïkwïl Etopya nko Sepa ompö sörunötenkwa.

⁴ Oghan pipö punton löwïr kïsöru söponwekwa ompöwölo ochikwa pïchighöch tya ompö ani nko ompöwölo ochömokwa, akonokwa konyït.

⁵ Mowöghisïyi, ompöwölo omitan nko akwa! “Omïtunan kaw piköku kïpkana koros cho lowöch, kïngetunö wölnö le kongasis ntökwit to.

⁶ Omwochinan pipö ewu löt kïpïstö chane, amwochan cho pö ewu tagh kutyak chane. Nya kïmïlisyeghö chane koros cho lowöch, nya kïpkana koroswo ngwïny löwïr.

⁷ Piköchan chane kegh, cho kyaghan tökwipkanïn ororyö.”

Söwintöno ECHOTYON pipö Israel

⁸ Mwoghöy Tororöt lö, “Okurunö piköchan kïpka yi. Tïngeto chane konyïn, wölo köryote, akïtïng yitïn, wölo mingote!

⁹ Okurunö pipö punton kïpka kerwokyï, nya kuryam pich löwïr. Ayo nko tororötïngwa ompö akonga nyo ngoröy kïgh nyo igho? Nko ompö chane nyo kingor kïgh nyo mi ye kwigho? Akanya kwipï tororötinechoni löwïr söwikwa atökuporï lö mwoghöy chane ngala man, atökïsöwintönchï lö melö put ngalekwa.

¹⁰ “Ochikwa söwichan, we pipö Israel, kyakïlakwa alïkwï mötworichan atamukakwa onkïtwanïn aghananïn, ankïtï lö ani nyo le Tororöt onkït. Möminye tororöt anka kïpoto ani, kimöminye otini le könyisyok akï möminye su kokay.

¹¹ “Ani onkït nyo le ECHOTYON, möminye sörunin anka kïpoto ani.

¹² Kyangoran kïgh nyo igho, atolapay angwïnan angarakekwa. Möminye tororöt anka nyo kikwigh lenyoni, achikwa söwichan.

¹³ Ochan Tororöt achan Tororöt lenyoni kokay. Möminye chi nyo muköy kïchïwïtegha morichan amelö mi chi nyo muköy kïwaghach kïgh nyo oghan.”

Kechïwïtyeghö Papilon

¹⁴ Lentöy ECHOTYON Tororöt, sörunintenkwa, nyinte nyo Tïlil nyo pö Israel, “Oyontonan lïk nyo wetöy kïporyegho pipö Papilon atökesörwokwa. Ongongan ortïneko kanastinekwa atökïwaghaka pölöto pipö Papilonia kïlïkwï rira.

¹⁵ Ochan ECHOTYON Tororötïnkwa nyo Tïlil. Kyaghakwa, we pipö Israel, achan pöytoghintenkwa.”

¹⁶ Kigh ECHOTYON könyisyok ara mït kuwer nanam, or nyo weröy pögh cho chang.

¹⁷ Kintöghoghchï lïk nyo awes kïpa kïpörisyö, lïk nyo kitïng nkaritin nko angoletin. Rusot löwïr ngwïny amökïngetöcha ngat, potyot chane akemis le kitampi!

¹⁸ Wölo lentöy ECHOTYON, “Manan ngal cho kipö tagh amakany kususok tïkwïn kighisyö könyisyok.

¹⁹ Okönö kïgh nyo rel nyo oghan. Kïgh nyo kikwigha omukekwa osïwïye nyete le ye! Oghan ara mït nyo weröy wölo le siriron akonokwa ompö wöloni lalwatïn cho yintegho pögh.

²⁰ Konyïtanïn ompö chini le tyonkïn tïkwïl, sölanïn chepkonöw nko cheptusonkoltin, otini kaghan wölo le siriron kuyintegha pögh atökïnyorï pögh kïlankachan.

²¹ Piköchan chane cho kyaghan akïlchan kegh, tökïtumwanïn chane sölut!”

Ngoki pipö Israel

²² Lentöy ECHOTYON, “Nkoghochekwa nko ani, nya we pipö Yakopo, nkïmasaghanïkwanye, nya we pipö Israel!

²³ Melö kyopkanïkwa ropöwekwa cho pö kechir, amelö kyokonyïtanïkwa ompö amörostinekwa. Melö kyochikyokwa lö okono ropöw, anta osusokwa lö opelwo tïkwïn cho ngutoy cho onyïn.

²⁴ Melö kyolwanïkwa tïkwïn cho ngutoy cho onyïn, anta apaghenanïn sunetko kyakikwo opïghyö, wölo kyatungenanïkwa nïkisïnto ngokikwa. Kyaghachan lö nyal ompö lelutkökwa cho kyaghakwa.

²⁵ Ani ante onkït nyo ochï Tororöt nyo löstoghchini pich ngokikwa. Oghan lenyoni ompö kaynatenyan kegh, amelö torwokyinokwa ompö ngokikwo.

²⁶ “Apkana kepe ka kirwok, opunö ngalekwo! Ato porunö lö melö kalelakwa!

²⁷ Kinya paponkwa nyo pö tagh kwigh ngokï, akwighwanïn tïkwïl kintöghoghikwa ngokï.

²⁸ Kïlenyona kyataghan tïsikwa ompö Konyan nyo tïlil, atyorchan kiwurat pipö Yakopo, ay, apïsyan pipö Israel kechïp.”